કૉંગ્રેસ અને આપના ઉમેદવાર લાખોપતિ, ભાજપના કરોડપતિ

વિસાવદર પેટા ચૂંટણી સોંગદનામામાં ભાજપ, કૉંગ્રેસ અને આપની કેટલી મિલકતો

આપના ઈટાલીયા સામે રાજ્યના અનેક શહેરોમાં ગુનાઓ
ભાજપના કિરીટ પટેલ સામે 2017માં ફરજ રુકાવટનો એક ગુનો

ખાસ-ખબર ન્યૂઝ જૂનાગઢ, તા.12
વિસાવદર વિધાનસભા પેટા ચૂંટણીમાં ઉમેદવારી પત્રો ભરાય ચુક્યા છે જેમાં ભાજપ, કોંગ્રેસ અને આપના ઉમેદવારોએ ઉમેદવારી પત્રમાં સોગંધનામામાં પોતાની પાસે કેટલી મિલકતો છે તે દર્શાવી હતી જેમાં કોંગ્રેસના નીતિન રાણપરીયાએ રૂપિયા 26 લાખની મિલકત દર્શાવી હતી જેમાં 16 લાખ લોનના દર્શાવ્યા છે જયારે આપના ગોપાલ ઈટાલીયાએ 14.18 લાખની સંપત્તિ દર્શાવી છે અને રાજ્યના જુદા જુદા શહેરોમાં 21 ગુના નોંધાયા છે જયારે ભાજપના કિરીટ પટેલની આઠ વર્ષની મિલકતમાં 10 કરોડનો વધારા સાથે કુલ રૂ.31 કરોડની સંપત્તિ દર્શાવી છે આમ કોંગ્રેસ અને આપના ઉમેદવાર લખપતિ અને ભાજપ ઉમેદવાર કિરીટ પટેલ કરોડોની સંપત્તિ દર્શાવી હતી.

ભાજપ ઉમેદવાર કિરીટ પટેલ પાસે 31 કરોડની સંપત્તિ…
વિસાવદર વિધાનસભાની પેટા ચૂંટણીના ભાજપના ઉમેદવાર કિરીટ પટેલે આજે પોતાનું ઉમેદવારી ફોર્મ રજુ કર્યું જેમાં તેઓએ સોગંદનામું કર્યું છે, જેમાં તેમની પાસે કુલ 31.07કરોડથી વધુની સંપત્તિ હોવાનું જાહેર કર્યું છે, જયારે તેમના પત્નીના નામે 2.67 કરોડની મિલકત હોવાનું દર્શાવ્યું છે, 2017 ની સરખામણીએ કિરીટ પટેલની સંપત્તિમાં 10 કરોડનો વધારો થયો છે. તેમની કુલ સંપત્તિની વાત કરીએ તો, હાલના સમયમાં કિરીટ પટેલ પાસે 12,49,35,846 ની જંગમ મિલકત અને 18,58,59,525 ની સ્થાવર મિલકત છે, જેમાં હાથ ઉપર રોકડા રૂ.9,97,084, એક કરોડની ફિક્સ ડીપોઝીટ બેંકમાં, 6,62,289 ની કીમતનું 187 ગ્રામ સોનું, તેમજ સ્થાવર મિલકતમાં અમદાવાદ, ગાંધીગામ, જૂનાગઢમાં મકાન અને ફ્લેટ અને દુકાનો ધરાવે છે. જયારે તેમના પત્નીના નામે રૂ. 69,14,243 ની જંગમ મિલકત અને રૂ.1,98,85,250 ની કીમતની સ્થાવર મિલકત છે. વર્ષ 2017 માં જયારે કિરીટ પટેલ વિસાવદરમાં ચૂંટણી લડયા હતા, તે સમયે તેમની પાસે કુલ રૂ.21,48,32,711 ની કીમતની સંપત્તિ હતી, આજે આઠ વર્ષ પછી તેમની પાસે કુલ રૂ.31,07,95,371 ની મિલક્ત ધરાવે છે. તેમજ 2017માં તેમના ઉપર 35,54 લાખની જયારે 2025 માં 45.10 લાખની આર્થિક જવાબદારી છે.

કોંગ્રેસના ઉમેદવાર નીતિન રાણપરીયા પાસે 26 લાખની સંપત્તિ…
વિસાવદર વિધાનસભા પેટા ચુંટણીમાં કોંગ્રેસના ઉમેદવાર નિતીન રાણપરીયાએ ઉમેદવારી નોધાવી છે, જેઓ ધોરણ-10 પાસ છે, જયારે વ્યવસાયે ખેતી અને વેપાર કરે છે, તેઓએ આજે ઉમેદવારી ફોર્મ ભર્યું જેમાં રજુ કરેલા સોગંદનામાંમાં પોતાની મિલકતની વિગતો જાહેર કરી છે. જેમાં જણાવ્યું છે કે, તેમની પાસે કુલ 26,80,473 ની મિલકત છે, જેમાં રૂ.11,80,473 ની જંગમ મિલકત, અને 15 લાખની સ્થાવર મિલકત છે, જંગમ મિલકતમાં 70 હજાર રોકડા, એક એકટીવા અને એક કાર ધરાવે છે, જયારે 3.20 લાખની કીમતનું 40 ગ્રામ સોનું છે, જયારે તેના ઉપર 12.88 લાખની આર્થિક જવાબદારી છે, કારણ કે, તેઓએ 7.98 લાખની એક કાર લોન લીધી છે, અને 4.90 લાખની ગોલ્ડ લોન લીધી છે, જેથી તેમની કુલ સંપત્તિ 26 લાખની સામે 12 લાખ તો લોનના છે, જયારે તેમના પત્ની પાસે પ.20 લાખનું 70 ગ્રામ સોનું ધરાવે છે.

આપના ગોપાલ ઈટાલીયા પાસે 14.18 લાખની સંપત્તિ…
આપના ઉમેદવાર પાસે એક પણ ફરવ્હીલ નથી માત્ર એક 30 હજારની કિંમતનું બાઇક છે. આ ઉપરાંત 7.53 લાખનું 70 ગ્રામ સોનુ, 37 હજારનો મોબાઈલ, 25 હજારનું કોમ્પ્યુટર, જેઆઈએનસી લીગલ ભાગીદારી પેઢીમાં 25 હજારનું રોકાણ, પરિવારની 28 હજારની હેલ્થ પોલીસી, બેંક ખાતામાં 73,278 બીજા ખાતામાં 5 હજાર અને ચૂંટણી ખર્ચ માટેના ખાતામાં 11 હજાર તથા હાથ પર 4.27 લાખની રોકડ દર્શાવેલ છે. જ્યારે તેમના પત્નીના એકાઉન્ટમાં માત્ર 1846 રૂપીયા દર્શાવેલ છે. આ ઉપરાંત ગોપાલ ઈટાલીયા પાસે જમીન કે મકાન નથી તેવું સોગંદનામામાં દર્શાવેલ છે. વ્યવસાયમાં પોતે વકીલાત અને લીગલ ક્ધસલ્ટીંગ દર્શાવેલ છે જ્યારે તેમના પત્ની ઘરકામ કરી રહ્યા છે. છેલ્લા પાંચ વર્ષની વાર્ષિક આવક 4.39 લાખથી વધુમાં વધુ 5.88 સુધીની હોવાનું રિટર્ન ભરેલું છે. પોતાનું મતદાર યાદીમાં નામ ભાવનગર જિલ્લાના ગઢડા વિધાસનભામાં નોંધાયેલુ છે. જયારે આપના ઉમેદવાર ગોપાલ ઇટાલીયા સામે રાજ્યના અનેક શહેરોમાં 21 જેટલા ગુના નોંધાયા છે.