સીએમ યોગી આદિત્યનાથ માત્ર ભૌગોલિક રીતે જ નહીં, પરંતુ વિચારધારાની દ્રષ્ટિએ પણ ઘૂસણખોર છે: અખિલેશ યાદવ

સમાજવાદી પાર્ટીના અધ્યક્ષ અખિલેશ યાદવે ઘૂસણખોરો વિશે વાત કરતાં યુપીના સીએમ યોગી આદિત્યનાથ પર કટાક્ષ કર્યો અને તેમની તુલના ‘ઘૂસણખોર’ સાથે કરી. સપા પ્રમુખે કહ્યું કે, ‘અમારા યુપીમાં પણ ઘૂસણખોરો હાજર છે, કારણ કે મુખ્યમંત્રી પોતે ઉત્તરાખંડના છે. અમે તો ઈચ્છીએ છીએ કે તેમને તેમના મૂળ રાજ્યમાં પાછા મોકલી દેવામાં આવે.’

અખિલેશ યાદવનો કટાક્ષ

અખિલેશ યાદવે પત્રકારો સાથેની વાતચીતમાં જણાવ્યું કે, ભાજપના આંકડાઓ ખોટા છે. તેમણે કહ્યું કે, ‘જે લોકો પલાયનના આંકડા આપે છે, તેના પર વિશ્વાસ કરવામાં આવે તો વ્યક્તિ ગેરમાર્ગે દોરાઈ શકે છે. સપા અધ્યક્ષે ભારપૂર્વક કહ્યું કે ઉત્તર પ્રદેશમાં પણ ઘૂસણખોરો છે, કારણ કે મુખ્યમંત્રી પોતે ઉત્તરાખંડના છે અને તેથી અમે ઈચ્છીએ છીએ કે તેમને ઉત્તરાખંડ પાછા મોકલી દેવામાં આવે.’

અખિલેશ યાદવનો અમિત શાહના નિવેદન પર પલટવાર

સપા અધ્યક્ષે કહ્યું કે સીએમ યોગી આદિત્યનાથ માત્ર ભૌગોલિક રીતે જ નહીં, પરંતુ વિચારધારાની દ્રષ્ટિએ પણ ઘૂસણખોર છે. યોગી ભાજપના સભ્ય નહોતા, પરંતુ અન્ય કોઈ પક્ષના સભ્ય હતા, એવામાં હવે સવાલ એ થાય કે આ ઘૂસણખોરોને ક્યારે હટાવવામાં આવશે.

આ નિવેદનને કેન્દ્રીય ગૃહમંત્રી અમિત શાહના તાજેતરના દાવાનો જવાબ માનવામાં આવી રહ્યો છે, જેમાં અમિત શાહે કહ્યું હતું કે અમુક રાજકીય પક્ષો ઘૂસણખોરોને વોટ બેન્ક માને છે અને ગુજરાત-રાજસ્થાનની સરહદો પર ઘૂસણખોરી કેમ નથી થતી, તેવો સવાલ ઉઠાવ્યો હતો.’

રાયબરેલી મોબ લિંચિંગ કેસ પર અખિલેશ યાદવે યોગી સરકાર પર પ્રહારો કર્યા

સમાજવાદી પાર્ટીના નેતા રામ મનોહર લોહિયાને તેમની પુણ્યતિથિ પર શ્રદ્ધાંજલિ આપવા માટે લોહિયા પાર્ક પહોંચ્યા હતા. તેમણે કહ્યું કે ડો.લોહિયાએ તેમના સમગ્ર જીવન દરમિયાન અન્યાય અને બેજવાબદારી સામે લડત આપી હતી. “આજે, અમે તેમણે ઉઠાવેલા મુદ્દાઓ પર લોકો સુધી પહોંચવા, તેમને જાગૃત કરવા અને તેમના બતાવેલા માર્ગ પર ચાલીને દરેક માટે આર્થિક અને સામાજિક ગૌરવ સુનિશ્ચિત કરવા માટે પ્રતિજ્ઞા લઈએ છીએ. ડૉ. લોહિયાએ જાતિ

પ્રથા નાબૂદ કરવાની હાકલ કરી હતી,” યાદવે કહ્યું.

રાયબરેલી મોબ લિંચિંગ કેસ પર, તેમણે કહ્યું, “જો આપણે NCRB ડેટા પર નજર કરીએ, તો તે સ્પષ્ટપણે દર્શાવે છે કે આ સરકારમાં દલિતો પર સૌથી વધુ અત્યાચાર થયા છે. તાજેતરમાં, અમે જોયું કે કેવી રીતે વાલ્મિકી સમુદાયના એક યુવકની હત્યા કરવામાં આવી. દલિતો અને પછાત સમુદાયો સાથે મોટા પાયે અન્યાય થઈ રહ્યો છે.”

તેમણે ઉમેર્યું હતું કે સરકારના ઝીરો ટોલરન્સના દાવાની જમીન પર કોઈ અસર નથી. “પોલીસ, જેનું કામ કાયદો અને વ્યવસ્થા જાળવવાનું છે, તે રાજકીય વિરોધીઓ સામે ખોટા કેસ દાખલ કરવામાં વ્યસ્ત છે. પરિણામે મહિલાઓ અસુરક્ષિત રહે છે.”

તેમણે આરોપ લગાવ્યો, “ભાજપ પોતાની નિષ્ફળતાઓ છુપાવવા માંગે છે, અને મુખ્ય પ્રધાન સફેદ ટેબલ પર બેસીને કાળું જૂઠ બોલે છે… જે સફેદ ટેબલ પર તેઓ લોકોને મળે છે. સત્ય એ છે કે સૌથી વધુ ઉત્પીડન અને અન્ય આવી ગંભીર ઘટનાઓ યુપીમાં થઈ રહી છે. ભ્રષ્ટાચારની તમામ હદો તૂટી ગઈ છે. ભ્રષ્ટાચાર દરેક વિભાગમાં છે.”

“એ જ સરકાર કે જેણે એક સમયે દાવો કર્યો હતો કે તે 45 મિનિટમાં કાનપુર પહોંચી શકે છે, તે હવે ગુનેગારોને રક્ષણ આપી રહી છે,” તેમણે કહ્યું. યાદવે એમ પણ કહ્યું કે, “આ પાર્ક (લોહિયા પાર્ક) નેતાજી (મુલાયમ સિંહ યાદવ)ના સમયમાં બનાવવામાં આવ્યો હતો. આ સરકારમાં માત્ર કામ રોકવા અથવા તેને બરબાદ કરવાના પ્રયાસો થઈ રહ્યા છે.”