બજેટ 2022 : ભૂપેન્દ્ર પટેલ સરકારનું અંતિમ બજેટ રજૂ

2,43,965 કરોડનું બજેટ : કોઈ નવો કરવેરો નહીં

ત્રણ નવી મેડિકલ કોલેજની જાહેરાત : 20 વર્ષમાં માથાદીઠ આવક 19 હજારથી વધી 2.14 લાખ થઈ

ખાસ-ખબર સંવાદદાતા

ગુજરાત બજેટ 2022 આજે રજૂ કરવામાં આવ્યું છે. નાણામંત્રીએ 2 લાખ 43 હજાર 965 કરોડ બજેટનું રજૂ કર્યું છે. બપોરે નાણામંત્રી કનુભાઈ બજેટને લઈને આવી પહોંચ્યા હતા. જ્યારે મુખ્યમંત્રી ભૂપેન્દ્ર પટેલે કહ્યું હતું કે પ્રજાલક્ષી અને સર્વ સમાવેશી બજેટ હશે, લોકોની અપેક્ષા પૂર્ણ કરનારું બજેટ રહેશે. બજેટ પૂર્ણ થયા પહેલાં જો કોઈ મીડિયા માહિતી આપશે તો ઔચિત્યભંગનો ગુનો ગણાશે. પહેલીવાર નાણાં વિભાગે આ પ્રકારનો આદેશ કર્યો છે. આ બજેટમાં બોટાદ, વેરાવળ, જામ ખંભાળિયામાં નવી મેડિકલ કોલેજો શરૂ કરવાની જાહેરાત કરવામાં આવી છે.

મોટી જાહેરાતો

1. 80 વર્ષથી વધુની વયના વૃદ્ધોને 1250 અને 60થી વધુ વયના વૃદ્ધોને રૂ.1 હજાર પેન્શન
2. જસદણ, લીંબાયત, પાલિતાણા, બગસરામાં નવી કોલેજો શરૂ કરાશે.
3. 4 હજાર ગામોને ફ્રી વાઇફાઈની સુવિધા અપાશે.
4. સુરેન્દ્રનગર ખાતે આયુર્વેદિક કોલેજ, નવસારી જિલ્લાના બીલીમોરામાં સરકારી આયુર્વેદિક હોસ્પિટલ ઊભી કરાશે.
5. મોરબીમાં 400 કરોડના ખર્ચે વૈશ્વિક કક્ષાનો ઇન્ટરનેશનલ સિરામિક પાર્ક સ્થાપવામાં આવશે.
6. પીએચડી કરતા વિદ્યાર્થીઓને રૂ.1 લાખની સહાય.

ઑનલાઇન બજેટનાં અરમાન ફરી અધૂરાં

ગુજરાત વિધાનસભામાં આ વખતનું બજેટ ઓનલાઇન રજૂ કરવા માટે સરકારના કેટલાક અધિકારીઓએ રાતે ઉજાગરા કર્યા, પણ અંતે એના અરમાન અધૂરા રહી ગયા છે. બજેટ ઓનલાઇન રજૂ કરવા માટે છેલ્લા કેટલાક દિવસોથી સચિવકક્ષાના અધિકારીઓએ તેમની ટીમ સાથે મોડી રાત સુધી ઉજાગરા કરીને IFMS-2 નામના સોફ્ટવેર મારફત તનતોડ મહેનત કરી હતી, જેમાં બજેટલક્ષી કેટલીક ઝીણી ઝીણી બાબતો કેટલાક વિભાગોમાંથી સમયસર અને વ્યવસ્થિત ના આવતાં સંપૂર્ણ બજેટને સોફ્ટવેરમાં સમાવવામાં મોડું થઈ ગયું હતું. પરિણામે, ફરી એકવાર ગુજરાતનું બજેટ ઓનલાઈન રજૂ કરવામાં સરકાર ઊણી ઊતરી ગઈ છે.

કયા ક્ષેત્ર માટે કેટલી જોગવાઈ

• સમગ્ર દેશમાં કોરોનામાં 177 કરોડથી વધુ રસી નિ:શુલ્ક આપી છે. પડકારો અમને હંફાવી ન શક્યા, અમે પરિશ્રમથી પ્રગતિની કેડી કંડારી છે, અમે અમૃતકાળની વાત પકડી છે.
• માથાદીઠ આવક 20 વર્ષમાં 19,823થી વધીને 2,14,809 થઈ છે. ગૌ સંવર્ધન માટે ખાનગી સંસ્થા કામ કરી રહી છે. મુખ્યમંત્રી ગૌમાતા પોષણ યોજનાની જાહેરાત કરી હતી, જેના માટે 500 કરોડની ફાળવણીની જાહેરાત કરી છે.
• સ્કૂલ ઓફ એક્સિલન્સ શરૂ કરવાની જાહેરાત. અના માટે 10 હજાર કરોડની ફાળવણી.
• કચ્છમાં મોટા ચેકડેમ બનાવવા 65 કરોડ.
• બનાસકાંઠામાં સિંચાઈનો લાભ આપવા 70 કરોડ.
• ધરોઈ બંધ પરિક્ષેત્રને પ્રવાસનક્ષેત્ર તરીકે વિકસાવવા 200 કરોડ.
• અમદાવાદ જિલ્લાના નળકાંઠા વિસ્તારનાં ગામોને સિંચાઈ માટે 25 કરોડ.
• કૃષિ વિભાગ માટે રૂ.7737 કરોડની જોગવાઈ.
• રાજ્યમાં પ્રાકૃતિક કૃષિ વિકાસ બોર્ડની રચના કરાશે.
• જળ સંપત્તિ વિભાગ માટે રૂ.5339 કરોડની જોગવાઈ.
• પાણી પુરવઠા વિભાગ માટે રૂ.5451 કરોડની જોગવાઈ
• આરોગ્ય વિભાગ માટે રૂ.12240 કરોડની જોગવાઈ
• શિક્ષણ વિભાગ માટે રૂ.34884 કરોડની જોગવાઈ
• સ્કૂલ ઓફ એક્સલન્સ પ્રોજેક્ટ માટે રૂ.500 કરોડ
• મહિલા, બાળ વિકાસ વિભાગ માટે રૂ.4976 કરોડ
• મુખ્યમંત્રી ગૌમાતા પોષણ યોજના માટે રૂ.500 કરોડ
• ગૌશાળા, પાંજરાપોળ નિભાવ ખર્ચ માટે રૂ.500 કરોડ
• ખેડૂતોને રવિપાક માટે વ્યાજ સહાય યોજના
• સુપોષિત માતા, સ્વસ્થ બાળ યોજના જાહેર, રૂ.4000 કરોડની જોગવાઈ
• ધાત્રી માતાને 1000 દિવસ સુધી અપાશે રાશન. 1 કિલો તુવેરદાળ, લીટર તેલ, 2 કિલો ચણા અપાશે
• ગૃહ વિભાગ માટે રૂ.8325 કરોડની જોગવાઈ
• ગૃહવિભાગમાં વિવિધ સંવર્ગની 1094 જગ્યા ઉભી કરાશે
• સુરત અને ગિફ્ટ સીટીમાં નવા પોલીસ મથક બનશે
• અન્ન અને નાગરિક પુરવઠા વિભાગ માટે રૂ.1526 કરોડ
• સામાજિક ન્યાય, અધિકારિતા વિભાગ માટે રૂ.4782 કરોડ
• કાયદા વિભાગ માટે રૂ.1740 કરોડની જોગવાઈ
• આદિજાતિ વિભાગ માટે રૂ.2909 કરોડની જોગવાઈ
• પંચાયત અને ગ્રામ વિકાસ વિભાગ માટે રૂ.9048 કરોડ
• શહેરી વિકાસ વિભાગ માટે રૂ.14297 કરોડ
• ઉદ્યોગ વિભાગ માટે રૂ.7030 કરોડની જોગવાઈ
• પ્રવાસન વિભાગ માટે રૂ.465 કરોડની જોગવાઈ
• વિજ્ઞાન અને પ્રોદ્યોગિકી વિભાગ માટે રૂ.670 કરોડ

  નાણામંત્રી દેસાઈ સંસ્કૃતિની ઝલકવાળા લાલ રંગનાં બોક્સમાં બજેટ ભાષણ રાખ્યું

  

  આજે પોતાનું પ્રથમ બજેટ રજૂ કરી રહેલા નાણામંત્રી કનુભાઈ દેસાઈએ આદીજાતિ સંસ્કૃતિની ઓળખ સમાન વારડી પેઇન્ટીંગ અને કચ્છની ભાતીગળ બોર્ડર અંકિત કરેલા લાલ રંગના બોક્સમાં પોતાનું બજેટ ભાષણ લઇને આવ્યા હતા અને તેના પર ભારતનું રાજચિહ્ન અશોક સ્તંભ પણ દર્શાવ્યો હતો. આમ તેઓએ આઝાદીના અમૃત મહોત્સવ અને આદીવાસી સમાજની ઓળખ બંનેને એકસાથે સાંકળીને બજેટ પ્રેઝન્ટેન્શનની તૈયારી કરી હતી.

  ચૂંટણી પહેલાં ભાજપ-કોંગ્રેસ માટે આ બજેટસત્ર મહત્ત્વનું

  મુખ્યમંત્રી ભૂપેન્દ્ર પટેલની સરકારનું આ પ્રથમ બજેટસત્ર સત્તાપક્ષ અને વિપક્ષ વચ્ચે તોફાની બની રહેવાની પ્રબળ શક્યતાઓ સેવાઇ રહી છે. એટલું જ નહીં, ગુજરાત વિધાનસભાની આવી રહેલી ચૂંટણીઓ પહેલાં મળતું આ સત્ર ભાજપ અને કોંગ્રેસ માટે પણ મહત્ત્વનું સાબિત થઈ શકે છે. એક તરફ રાજ્ય સરકાર ફૂલગુલાબી બજેટ રજૂ કરવા માટે મથામણ કરી રહી છે તો બીજી બાજુ આ સત્ર દરમિયાન વિપક્ષ સરકારને વિવિધ મોરચે ભીડવવા માટે તખતો તૈયાર કરી રહ્યું છે.

  કૃષિ યુનિ. અને જમીન પચાવી પાડતા વિધેયક રજૂ કરાશે
  
  આ બજેટસત્ર 22 દિવસ સુધી ચાલશે. બજેટમાં શિક્ષણ, આરોગ્ય, સામાજિક ન્યાય અધિકારિતા, કૃષિ વિભાગની ગ્રાન્ટમાં વધારો કરવામાં આવશે. વિધાનસભામાં બજેટ પર 4 દિવસ ચર્ચા થશે તેમજ વિધાનસભા ગૃહમાં ઓર્ગેનિક કૃષિ યુનિવર્સિટી સુધારા વિધેયક અને ગુજરાત જમીન પચાવી પાડનાર પ્રતિબંધક સુધારા વિધેયક રજૂ કરવામાં આવશે.