બોપન્નાની 22 વર્ષ બાદ નિવૃત્તિ
ખાસ-ખબર ન્યૂઝ નવી દિલ્હી, તા.30
- Advertisement -
ભારતીય ટેનિસ સ્ટાર રોહન બોપન્નાએ રવિવારે પેરિસ ઓલિમ્પિકના મેન્સ ડબલ્સના પ્રથમ રાઉન્ડમાં પરાજય બાદ નિવૃત્તિની જાહેરાત કરી હતી. 44 વર્ષનો બોપન્ના 22 વર્ષથી ભારત માટે રમી રહ્યો હતો. તેણે 2002માં દેશ માટે ડેબ્યૂ કર્યું હતું. રવિવારે રમાયેલી મેચમાં તેઓ ગેલ મોનફિલ્સ અને એડૌર્ડ રોજર વેસેલિનની ફ્રેન્ચ જોડીએ 5-7, 6-2થી પરાજય પામ્યા હતા. આ સાથે ભારતીય જોડી ટુર્નામેન્ટમાંથી બહાર થઈ ગઈ હતી.
તે 6 ગ્રાન્ડ સ્લેમ મેન્સ ડબલ્સ મેચમાં ફાઇનલિસ્ટ હતો. 2017માં મિક્સ્ડ ડબલ્સમાં ફ્રેન્ચ ઓપન અને 2024માં મેન્સ ડબલ્સમાં ઑસ્ટ્રેલિયન ઓપન જીતી છે. પેરિસ ઓલિમ્પિક પહેલાં, બોપન્નાએ છેલ્લે એશિયન ગેમ્સ 2023માં ભારતનું પ્રતિનિધિત્વ કર્યું હતું, જેમાં તેણે રૂતુજા ભોસલે સાથે મિક્સ્ડ ડબલ્સમાં ગોલ્ડ મેડલ જીત્યો હતો. બોપન્નાએ પ્રથમ રાઉન્ડમાં હાર બાદ નિવૃત્તિની જાહેરાત કરી હતી. “દેશ માટે આ ચોક્કસપણે મારી છેલ્લી ઇવેન્ટ હશે. હું સંપૂર્ણ રીતે સમજું છું કે હું ક્યાં છું અને હવે, જ્યાં સુધી આ ચાલુ રહેશે ત્યાં સુધી હું ટેનિસ સર્કિટનો આનંદ માણતો રહીશ. હું જ્યાં છું તેનો મને ગર્વ છે,” તેણે પીટીઆઈને કહ્યું હું 22 વર્ષ પછી પણ ભારતનું પ્રતિનિધિત્વ કરીશ એવું મેં ક્યારેય વિચાર્યું નહોતું. બોપન્નાની આ ત્રીજી ઓલિમ્પિક હતી. બોપન્નાએ લંડનમાં 2012માં ઓલિમ્પિકમાં પ્રવેશ કર્યો હતો, જ્યાં તે મહેશ ભૂપતિની ભાગીદારીમાં મેન્સ ડબલ્સમાં બીજા રાઉન્ડમાં પહોંચ્યો હતો. રિયો 2016માં, બોપન્ના અને સાનિયા મિર્ઝા મિક્સ્ડ ડબલ્સમાં બ્રોન્ઝ મેડલ મેચ હાર્યા બાદ ચોથા સ્થાને રહ્યા હતા. બોપન્ના ટોક્યો 2020 ઓલિમ્પિકમાં જગ્યા બનાવી શક્યો નહોતો. આ વર્ષની શરૂઆતમાં, બોપન્ના 43 વર્ષ અને નવ મહિનાની ઉંમરે તેના પાર્ટનર મેથ્યુ એબ્ડેન સાથે ઓસ્ટ્રેલિયન ઓપન જીત્યા બાદ ટેનિસના ઓપન યુગમાં ગ્રાન્ડ સ્લેમ ટાઇટલ જીતનાર સૌથી મોટી ઉંમરનો ખેલાડી બન્યો હતો. ઓસ્ટ્રેલિયન ઓપન 2024ની જીત બોપન્નાનું બીજું ગ્રાન્ડ સ્લેમ ટાઇટલ હતું. તેણે 2017માં ફ્રેન્ચ ઓપનમાં મિક્સ ડબલ્સ જીતી હતી. બોપન્ના અને એબ્ડેને ગયા મહિને ફ્રેન્ચ ઓપનની સેમિફાઇનલમાં પણ જગ્યા બનાવી હતી.
બોપન્ના આ વર્ષે 29 જાન્યુઆરીએ એસોસિયેશન ઑફ ટેનિસ પ્રોફેશનલ્સ (અઝઙ) રેન્કિંગમાં વિશ્વનો નંબર-1 મેન્સ ડબલ્સ ખેલાડી બન્યો હતો. તે સમયે બોપન્ના 43 વર્ષના હતા.
- Advertisement -
43 વર્ષની ઉંમરે, તે વિશ્વનો નંબર-1 મેન્સ ડબલ્સ પ્લેયર બનનાર સૌથી મોટી ઉંમરનો ખેલાડી છે. હાલમાં તેની એટીપી રેન્કિંગ 4 છે.
