ભાજપે હરિયાણા સર કર્યું

એક્ઝિટ પોલથી વિપરીત પરિણામ: હરિયાણામાં ભાજપની હેટ્રિક: ભાજપ 20 જીતી, 30 પર આગળ: કોંગ્રેસને 20 પર લીડ, 15 પર જીત: મોદીએ મુખ્યમંત્રી સૈની સાથે વાત કરી

ખાસ-ખબર ન્યૂઝ નવી દિલ્હી, તા.8

હરિયાણામાં ચાલી રહેલા ટ્રેન્ડ અનુસાર ભાજપ ત્રીજી વખત સરકાર બનાવવા જઈ રહી છે. રાજ્યમાં આવું કરનાર તે પ્રથમ પક્ષ હશે. પાર્ટીને કુલ 90 સીટોમાંથી 32 સીટો પર લીડ છે. 18 બેઠકો જીતી છે

બીજી તરફ કોંગ્રેસ 20 સીટો પર આગળ છે. 15 બેઠકો જીતી છે. મુખ્યમંત્રી નાયબ સૈની અને કોંગ્રેસ નેતા ભૂપેન્દ્ર હુડ્ડા પોતપોતાની બેઠકો પર આગળ ચાલી રહ્યા છે. બીજી તરફ કોંગ્રેસે ચૂંટણી પંચ પર ઈરાદાપૂર્વક પરિણામોને ઈલેક્શન કમિશનની વેબસાઈટ પર ધીમેથી શેર કરવાનો આરોપ લગાવ્યો છે. શું ભાજપ વહીવટીતંત્ર પર દબાણ લાવવાનો પ્રયાસ કરી રહી છે?

દોઢ કલાકમાં ટ્રેન્ડ કોંગ્રેસના હાથમાંથી નીકળી ગયો સવારે 8 વાગ્યાથી મતગણતરી શરૂ થઈ હતી. વલણો આવતાની સાથે જ કોંગ્રેસે આગેવાની લીધી હતી અને થોડા જ સમયમાં એકતરફી જીતના માર્ગે હતી. પાર્ટી 65 સીટોને સ્પર્શી ગઈ હતી. ભાજપ 17 બેઠકો પર સમેટાઈ ગયું.

9:30 ની સાથે જ ભાજપ સ્પર્ધામાં આવી ગયું અને બંને વચ્ચે બે બેઠકોનો તફાવત હતો. સવારે 9:44 વાગ્યે એક સમય એવો આવ્યો જ્યારે બંને પક્ષો 43-43 સીટો પર પહોંચી ગયા. આ પછી બીજેપી 51 સીટો પર પહોંચી ગઈ છે. સવારે 11 વાગ્યા સુધીમાં ભાજપની સીટો 47 થી 51 વચ્ચે રહી છે. આ વખતે હરિયાણામાં 67.90% મતદાન થયું છે. છેલ્લી ચૂંટણીમાં 68.20% મતદાન થયું હતું. હિસારની આદમપુર સીટ પર રિકાઉન્ટિંગ ચાલી રહ્યું છે. ભાજપના ઉમેદવાર ભવ્ય બિશ્ર્નોઈ અહીંથી પાછળ રહ્યા હતા. જ્યારે કોંગ્રેસના ઉમેદવાર ચંદ્ર પ્રકાશ આગળ હતા. આ પછી ભવ્યના પિતા કુલદીપ બિશ્ર્નોઈ ત્યાં પહોંચ્યા. હવે રિકાઉન્ટિંગ કરવામાં આવી રહ્યું છે. ભવ્ય બિશ્ર્નોઈ પૂર્વ સીએમ ભજનલાલના પૌત્ર છે. ભવ્યએ તેના પિતા કુલદીપના રાજીનામા બાદ આદમપુરથી પેટાચૂંટણી જીતી હતી.

કેન્દ્રીય મંત્રી ગિરિરાજ સિંહે કહ્યું કે, અમે ’એક મોદી બધા ઉપર ભારી’ના પરિણામો જોઈ રહ્યા છીએ…હરિયાણાના લોકોએ તેમને (રાહુલ ગાંધી)ને પાઠ ભણાવ્યો છે. જનતા રાહુલ ગાંધીના નિવેદનો પર વિશ્ર્વાસ નથી કરતી, પરંતુ પીએમ મોદી પર વિશ્ર્વાસ કરે છે. તમામ ખેડૂતો અને કુસ્તીબાજો અમારી સાથે છે, અમે જમ્મુ-કાશ્ર્મીરમાં પણ કોંગ્રેસ પાર્ટીને હરાવી છે. તેઓ ભાજપની સામે ક્યાય નથી ટકતા.

પ્રમુખ જેપી નડ્ડાએ હરિયાણામાં ભાજપની આગેવાની અંગે નાયબ સૈની સાથે ફોન પર વાત કરી છે. સૈનીએ તમામ સીટોનું અપડેટ સ્પીકરને આપ્યું હતું. ચૂંટણી પંચના જણાવ્યા અનુસાર ભાજપે અત્યાર સુધીમાં 2 બેઠકો જીતી છે. જેમાં સોનીપતના ખરખોડાના પવન અને જીંદના કૃષ્ણા મિદ્ધાનો સમાવેશ થાય છે. જ્યારે નુહથી કોંગ્રેસ જીતી છે. આફતાબ અહેમદ અહીંથી જીત્યા છે. હરિયાણા ભાજપના રાજ્ય મુખ્યાલયમાં ઉજવણીનો માહોલ છે. પૂર્વ સાંસદ સંજય ભાટિયા અને સંગઠન મંત્રી ફણીન્દ્રનાથ શર્માએ કાર્યકરોનું મોઢું મીઠું કરાવ્યું હતું.સંજય ભાટિયાએ કહ્યું કે હરિયાણાની જનતાએ ભાજપની નીતિઓ પર વિશ્ર્વાસ વ્યક્ત કર્યો છે. 8મા રાઉન્ડ બાદ પૂર્વ ગૃહમંત્રી અનિલ વિજ 2520 મતોથી આગળ છે. તે શરૂઆતથી જ પાછળ હતા. આ પછી, અંબાલામાં પાર્ટી કાર્યાલયમાં ઉજવણી શરૂ થઈ ગઈ છે.
હરિયાણામાં બીજેપીને બહુમત મળવાની સંભાવનાને જોતા હરિયાણા બીજેપી પ્રભારી ધર્મેન્દ્ર પ્રધાન દિલ્હીમાં પૂર્વ સીએમ અને કેન્દ્રીય મંત્રી મનોહર લાલ ખટ્ટરને મળ્યા છે.