ઈનામી ડ્રોના કાર્ડ દ્વારા 2 કરોડની છેતરપિંડી કરનારના જામીન મંજૂર

 આરોપીઓની ગેરકાયદે રીતે ધરપકડ થઈ હતી: વકીલ ભગિરથસિંહ ડોડીયાની ધારદાર રજૂઆત

ખાસ-ખબર સંવાદદાતા
રાજકોટમાં રહેતાં કમલેશભાઈ માધુભાઈ ભટ્ટીએ તા. 20-6-2022ના રોજ ફરિયાદ નોંધાવેલ હતી અને જેમાં જણાવેલ કે આ કામના આરોપીઓ (1) અસ્માબેન કાસમાણી, (2) રંજનબેન માવજીભાઈ રાઠોડ, (3) વિક્રમભાઈ રાઠોડ, (4) ભુપત રામજીભાઈ વાઢેર, (5) કેતન ઉર્ફે ટીનો પ્રવિણભાઈ ભટ્ટ, (6) રજાકભાઈ કાસમાણી, (7) સાહીદભાઈ આમદભાઈ વિગેરેએ સ્ટાર ગ્રુપ ઈનામી ધમાકાના નામે ઈનામી ડ્રોના કાર્ડ છપાવી ટૂંકા સમયમાં એકના ડબલની લાલચ આપી જુદા જુદા સમયે ભવ્ય ઈનામી ડ્રો યોજી સ્ટાર ગ્રુપના સભ્યો તથા તેના પરિવારના સભ્યોની ડીનર પાર્ટી યોજી રોકાણકારોને લાલચમાં નાખી તેમના ગ્રાહકો પાસેથી કુલ રૂા. 1,97,94,800ની રકમ ઉઘરાવી ઉપરોક્ત રકમ તથા સોનાના દાગીના રોકાણકારો પાસેથી મેળવી રોકાણકારોએ નાણા પરત માગતા તેઓને નાણા પરત ન આપી જુદા જુદા વાયદાઓ કરી પૂર્વયોજિત કાવતરુ રચી ફરિયાદી તથા અન્ય લોકોના નાણા ઓળવી જઈ ફરિયાદી તથા ગ્રાહકો સાથે છેતરપિંડી અને વિશ્ર્વાસઘાત કરેલ છે. એ ડીવીઝન પોલીસ સ્ટેશન દ્વારા આરોપી વિક્રમભાઈ રાઠોડ તથા ભુપત રામજીભાઈ વાઢેરની ધરપકડ કરવામાં આવેલ હતી અને ત્યારબાદ તેઓને નામદાર કોર્ટમાં ત્રણ દિવસના રીમાન્ડ સાથે રજૂ કરવામાં આવેલ હતા. જેમાં એ ડીવીઝન પોલીસ સ્ટેશન દ્વારા જુદા જુદા મુદ્દાઓના આધારે રીમાન્ડ માંગવામાં આવેલ હતા પરંતુ આરોપી તરફે એ મતલબની રજૂઆત કરવામાં આવેલ કે હાલના આરોપીઓની ધરપકડ જ ગેરકાયદે રીતે કરવામાં આવેલ છે અને જો તેઓની ધરપકડ કરવામાં આવે તો તેઓને યોગ્ય જામીન લઈને મુક્ત કરવાના હોય છે અને તે માટે જરૂરી કારણો દર્શાવવા જરૂરી છે પરંતુ આ કેસમાં તપાસ કરનાર અધિકારી દ્વારા આવા કોઈ કારણો કોર્ટમાં રજૂ કરેલ નથી કે આરોપીઓની તપાસના કામે જરૂરિયાત ન હોવા છતાં ખોટી રીતે ધરપકડ કરેલ છે.

આમ ઉપરોક્ત દલીલો તથા નામદાર ગુજરાત હાઈકોર્ટ, સુપ્રિમ કોર્ટના વિવિધ ચુકાદાઓ અને સુઓમોટો એપ્લીકેશન તેમજ પ્રોડકશન અને રીમાન્ડના કાગળો વગેરે ધ્યાને લઈ નામદાર કોર્ટ દ્વારા આરોપીની ધરપકડ ગેરકાયદે ઠેરવીને તેઓને રૂા. 15,000ના જામીન મુક્ત કરવામાં આવેલ હતા અને તપાસ કરનાર અધિકારી દ્વારા માંગવામાં આવેલ રીમાન્ડ પણ નામદાર કોર્ટ દ્વારા રદ કરવામાં આવેલ હતા. આ કામમાં બચાવ પક્ષે ભગીરથસિંહ ડોડીયા, જયવીર બારૈયા, ખોડુભા સાકરીયા, મીલન જોષી, દીપ વ્યાસ, રવિરાજસિંહ જાડેજા, જયપાલસિંહ સોલંકી, સાગર પરમાર એડવોકેટ તરીકે રોકાયેલ હતા.