ઈંગ્લેન્ડની પ્રથમ ઈનિંગ 237 રનમાં સમેટાઈ હતી
ખાસ-ખબર સંવાદદાતા
ઓસ્ટ્રેલિયાએ ઈંગ્લેન્ડ સામેની ત્રીજી એશિઝ ટેસ્ટમાં ભારે ચડાવ-ઉતાર બાદ બીજા દિવસના અંતે કુલ મળીને 142 રનની સરસાઈ મેળવી લીધી હતી. જોકે આ દરમિયાન તેમણે ચાર વિકેટ ગુમાવી હતી. ઓસ્ટ્રેલિયાના પ્રથમ ઈનિંગના 263ના સ્કોર સામે ઈંગ્લેન્ડની પ્રથમ ઈનિંગ 237 રનમાં સમેટાઈ હતી. ઓસ્ટ્રેલિયાએ આ સાથે 26 રનની સરસાઈ મેળવી લીધી હતી. ઓસ્ટ્રેલિયાએ બીજી ઈનિંગમાં 47 ઓવરમાં 4 વિકેટે 114 રન નોંધાવ્યા હતા. ઈંગ્લેન્ડે તેની પ્રથમ ઈનિંગ 68 રનમાં 3 વિકેટથી બીજા દિવસે આગળ ધપાવી હતી.
- Advertisement -
જોકે તેઓ રુટ (19), બેરસ્ટો (12), મોઈન (21) અને વોક્સ (10)ની વિકેટ ગુમાવી હતી. સ્ટોક્સ છ ચોગ્ગા અને પાંચ છગ્ગા સાથે 108 બોલમાં 80 રન ફટકાર્યા હતા. તેની પ્રાઈઝ વિકેટ મર્ફીને મળી હતી. કમિન્સે 91 રનમાં છ વિકેટ ઝડપી હતી. સ્ટાર્કે બે વિકેટ મેળવી હતી. ઓસ્ટ્રેલિયાની બીજી ઈનિંગની શરુઆત સારી રહી નહતી. વોર્નર 1 રને બ્રોડનો શિકાર બન્યો હતો. મોઈન અલીએ લાબુશેન (33) અને સ્મિથ (2)ની વિકેટ ઝડપી હતી. ખ્વાજાની 43 રનની ઈનિંગના સંઘર્ષનો અંત વોક્સે આણ્યો હતો. હેડ 18 અને મિચેલ માર્શ 17 રને ક્રિઝ પર હતા.
