વંથલીમાં પ્રાચીન ગરબીઓની રંગત જામી: 100 વર્ષ જૂની પરંપરાનું જતન

નવરાત્રીના પાવન પર્વ નિમિત્તે જ્યાં એક તરફ અર્વાચીન ગરબીઓનું ચલણ વધી રહ્યું છે, ત્યાં વંથલી શહેરમાં આજે પણ પ્રાચીન ગરબીઓની પરંપરા જીવંત રહી છે. આ ગરબીઓ લોકો માટે આકર્ષણનું કેન્દ્ર બની રહી છે. વંથલીની બ્રાહ્મણવાડની ગરબી આશરે 100 વર્ષ જૂની પરંપરા જાળવી રહી છે, જ્યાં બાળાઓ માતાજીના છંદો પર રાસ રમી રહી છે. અહીંનો દોરી અડિંગો રાસ જોવા માટે મોટી સંખ્યામાં લોકો ઉમટી પડે છે. તેવી જ રીતે, વામનજી ગરબી મંડળ, પટેલ ચોક અને ભાણાવાવ ચોક ખાતેની જય અંબે ગરબી પણ ખાસ આકર્ષણનું કેન્દ્ર છે. જય અંબે ગરબીનો પ્રખ્યાત ભીલની રાસ ભારે લોકપ્રિય છે. આ ઉપરાંત, 50 વર્ષથી કાર્યરત રાવલપરા ચામુંડા ગરબીને વંથલીની બાળાઓ માટે ટ્રેનિંગ સેન્ટર તરીકે ઓળખવામાં આવે છે. અહીં બે વર્ષથી નાની બાળાઓથી લઈને મોટી ઉંમરની બાળાઓ પણ રાસ રમે છે. અહીંના ભુવા રાસ, કાનગોપી અને ડાકલા રાસ ખૂબ જ પ્રખ્યાત છે. એક સમયે પ્રખ્યાત ગણાતી ખોડિયાર ગરબીમાં ચાલતી ઇલેક્ટ્રિક ટ્રેન જોવા માટે આસપાસના ગામોમાંથી પણ લોકો આવતા હતા. જોકે, કેટલીક ગરબીઓ હવે બંધ થઈ ગઈ છે અને અર્વાચીન ગરબીના કારણે બાળાઓની સંખ્યા ઓછી થઈ છે, તેમ છતાં ગરબીના આયોજકો દ્વારા આ પ્રાચીન પરંપરાને જીવંત રાખવાનો પ્રયાસ કરવામાં આવી રહ્યો છે.