8600 કિલોમીટરનું અંતર કાપી મક્કા પહોચ્યો
ખાસ-ખબર સંવાદદાતા
કહેવાય છે કે જો જુસ્સો હોય તો કશું જ અશક્ય નથી. એક વ્યક્તિએ કેરળથી પવિત્ર શહેર હજ મક્કા સુધીની યાત્રા પગપાળા જ કવર કરી હતી. ગયા વર્ષે 2 જૂને શરૂ થયેલી આ યાત્રામાં આ વ્યક્તિએ 8600 કિલોમીટરનું અંતર પગપાળા 370 દિવસમાં કાપ્યું હતું. આ પ્રવાસમાં આ વ્યક્તિ પાકિસ્તાન, ઈરાન, ઈરાક, કુવૈત અને છેલ્લે સાઉદી અરેબિયા થઈને પવિત્ર શહેર મક્કા પહોંચ્યો હતો.
- Advertisement -
કેરળના મલપ્પુરમ જિલ્લાના વાલાંચેરીના રહેવાસી શિહાબ ચોટૂરે 2 જૂન 2022ના રોજ હજ કરવા માટે સાઉદી અરેબિયાની મેરેથોન યાત્રા શરૂ કરી હતી. તે આ મહિને મક્કા પહોંચી ગયો છે. તેના પદયાત્રા દરમિયાન, શિહાબે ભારત, પાકિસ્તાન, ઈરાન, ઈરાક અને કુવૈતનો પ્રવાસ કર્યો અને મેના બીજા સપ્તાહમાં કુવૈતથી સાઉદી અરેબિયાની સરહદ પાર કરી. સાઉદી અરેબિયામાં પ્રવેશ કર્યા પછી, શિહાબ મદીનાના ઇસ્લામિક તીર્થસ્થળ પહોંચ્યા. મક્કા જતા પહેલા આ વ્યક્તિએ મદીનામાં 21 દિવસ વિતાવ્યા હતા.
શિહાબે મદીના અને મક્કા વચ્ચેનું 440 કિલોમીટરનું અંતર નવ દિવસમાં કાપ્યું હતું. કેરળથી તેની માતા ઝૈનાબા શહેરમાં આવ્યા બાદ શિહાબ હજ કરશે. કેરળનો આ વ્યક્તિ યુટ્યુબર પણ છે. તે તેની ચેનલ પર નિયમિતપણે તેની મુસાફરીને અપડેટ કરતો હતો. કેરળથી મક્કા સુધીની સફરમાં તેણે અનુભવેલી દરેક ક્ષણને તેણે કેદ કરી. ગયા વર્ષે જૂનમાં તેની હજ યાત્રા શરૂ કર્યા પછી, શિહાબ દેશના ઘણા રાજ્યોમાંથી પસાર થઈને વાઘા બોર્ડર પહોંચ્યો જ્યાંથી તે પાકિસ્તાનમાં પ્રવેશવા માંગતો હતો.
