38 વર્ષ બાદ અમિતાભ અને કમલહાસન ‘પ્રોજેકટ કે’માં સાથે જોવા મળશે

-વર્ષો પહેલા બચ્ચન અને કમલ હાસન ‘ખબરદાર’ ફિલ્મમાં સાથે આવવાના હતા પણ વાત નહોતી બની

આદિપુરુષની નિષ્ફળતાને ખંખેરીને પ્રભાસે આગામી ફિલ્મ પ્રોજેકટ કે પર ધ્યાન વધાર્યું છે. આ ફિલ્મમાં પ્રભાસની સાથે અમિતાભ બચ્ચન અને દીપિકા પાદુકોણ પણ લીડ રોલમાં છે. સાઉથ અને બોલીવુડનું કોમ્બીનેશન ધરાવતી આ ફિલ્મમાં કમલ હાસનની એન્ટ્રી થઈ છે. આ સાથે કમલ હાસન અને અમિતાભ બચ્ચન 38 વર્ષ બાદ સાથે કોઈ ફિલ્મમાં કામ કરશે.

પ્રોજેકટ કે માં કમલ હાસનના સમાવેશ અંગે લાંબા સમયથી અટકળો ચાલી રહી હતી. ટ્રડ એનાલિસ્ટ તરણ આદર્શે એક વિડીયો શેર કર્યો છે, જેમાં કમલ હાસનના રોલના વિઝયુઅલ્સ જોવા મળે છે. આ નાના વિડીયોની સાથે ઈન્ટ્રોડકશન પણ અપાયું છે. જેમાં જણાવાયું છે અમિતાભ બચ્ચન, પ્રભાસ, દીપિકા પાદુકોણ અને દિશા પટાણી બાદ હવે કમલ હાસને પણ પ્રોજેકટ કે જોઈન કરી છે. નાગ અશ્ર્વિન આ ફિલ્મનું ડાયરેકશન કરી રહ્યા છે.

અગાઉના રિપોર્ટસ મુજબ, પ્રોજેકટ કે માં કમલ હાસન વિલનનો રોલ કરે તેવી શકયતા હતી. ઓફિશિયલ એનાઉન્સમેન્ટમાં કમલ હાસનના રોલ અંગે સ્પષ્ટતા કરાઈ નથી. જો કે આ ફિલ્મ માટે કમલ હાસનને રૂા.150 કરોડની ફી અપાઈ હોવાનું કહેવાય છે. ફિલ્મનું લગભગ 70 ટકા શુટીંગ પુરું થઈ ગયું છે અને આગામી મહિને દીપિકા પદુકોણ-અમિતાભ બચ્ચનના ભાગનું શુટીંગ પણ પુરું થઈ જશે.

ઉલ્લેખનીય છે કે, બોલીવુડ અને સાઉથનું કોમ્બીનેશન ચાર દાયકા અગાઉ ખૂબ મજબૂત હતું. તે સમયે બોલીવુડના એન્ગ્રી યંગમેન અમિતાભ બચ્ચનની સાથે સાઉથના સુપર સ્ટાર કમલ હાસન અને રજનીકાંતે પણ ફિલ્મો કરી હતી. છેલ્લે 1985ના વર્ષમાં આ ત્રણેય સ્ટાર્સ ગિરફતાર ફિલ્મમાં ભેગા થયા હતા. રજનીકાંતે અમિતાભ બચ્ચનના મિત્રના રોલમાં કેમીયો કર્યો હતો. તે વર્ષે સૌથી વધુ આવક મેળવનારી ફિલ્મ આ હતી.

ગિરફતાર પહેલાં અમિતાભ બચ્ચન અને કમલ હાસન ‘ખબરદાર’ ફિલ્મ સાથે કરવાના હતા. ફિલ્મનું શુટીંગ ચાલી રહ્યું હતું ત્યારે અમિતાભ બચ્ચને અચાનક છેડો ફાડયો હતો. આ ફિલ્મમાં શ્રીદેવી લીડ રોલમાં હતી. અમિતાભ બચ્ચન અને રાજેશ ખન્નાની સુપરહિટ ફિલ્મ આનંદ જેવી સ્ટોરી ખબરદારમાં હતી.

સાઉથની ઈન્ડસ્ટ્રીના પ્રોડયુસર્સ આ ફિલ્મ બનાવી રહ્યા હતા. ફિલ્મમાં અમિતાભ બચ્ચને ગંભીર પ્રકૃતિના ડોકટરનો રોલ કર્યો હતો અને મનમોજી દર્દીના રોલમાં કમલ હાસન હતા. બચ્ચને અધવચ્ચે ફિલ્મ પડતી મુક્તાં એવી ચર્ચા ચાલી હતી કે, ફિલ્મમાં કમલ હાસનને વધારે મોટો અને અસરકારક રોલ અપાયો હોવાનું લાગતાં તેમણે ફિલ્મ છોડી દીધી હતી.