ગયા મહિને જ ગૃહ મંત્રાલયે સુખદેવ ગોગામેડીની હત્યાની તપાસ નેશનલ ઇન્વેસ્ટિગેશન એજન્સી (NIA)ને સોંપી હતી, NIAએ આરોપીઓની પૂછપરછ કરતાં મળેલી માહિતીના આધારે દરોડા પાડવામાં આવ્યા
સુખદેવ ગોગામેડી હત્યા કેસમાં મોટા સમાચાર સામે આવ્યા છે. રાષ્ટ્રીય રાજપૂત કરણી સેનાના પ્રમુખ સુખદેવ ગોગામેડીની હત્યાના કેસમાં નેશનલ ઇન્વેસ્ટિગેશન એજન્સી (NIA) એ આજે રાજસ્થાન અને હરિયાણામાં 31 સ્થળો પર દરોડા પાડ્યા છે. ગયા મહિને જ ગૃહ મંત્રાલયે આ હત્યાની તપાસ નેશનલ ઇન્વેસ્ટિગેશન એજન્સી (NIA)ને સોંપી હતી. આ તરફ NIAએ આરોપીઓની પૂછપરછ પણ કરી છે. પૂછપરછ દરમિયાન મળેલી માહિતીના આધારે આજે આ દરોડા પાડવામાં આવ્યા છે.
- Advertisement -
સૂત્રોના જણાવ્યા અનુસાર આ હત્યામાં ગેંગસ્ટરની સંડોવણી હોવાને કારણે કેસ NIAને સોંપવામાં આવ્યો હતો. 5 ડિસેમ્બરે ગોગામેડીને જયપુરમાં તેમના ઘરમાં ગોળી મારીને હત્યા કરવામાં આવી હતી. સુખદેવ સિંહ ગોગામેડીની હત્યાની જવાબદારી ગેંગસ્ટર રોહિત ગોદારાએ લીધી હતી, જે ભારતમાંથી ફરાર હતો. રોહિત ગોદારા લોરેન્સ બિશ્નોઈ ગેંગ સાથે સંકળાયેલો છે. થોડા મહિના પહેલા રોહિત ગોદારાએ સુખદેવસિંહ ગોગામેડીને દુબઈના નંબર પરથી ફોન કરીને ધમકી આપી હતી.
સુખદેવ ગોગામેડીની હત્યાના આરોપી રોહિત રાઠોડ અને નીતિન ફૌજી સુખદેવ સિંહના ઘરે પહોંચ્યા હતા. રોહિત રાઠોડ રાજસ્થાનના અલવરનો રહેવાસી છે, જ્યારે નીતિન ફૌજી હરિયાણાના મહેન્દ્રગઢનો રહેવાસી છે. નીતિન સેનામાં સૈનિક છે. તેમની પોસ્ટિંગ રાજસ્થાનના અલવરમાં છે. 8 નવેમ્બરના રોજ તેઓ બે દિવસની રજા લઈને ઘરે પહોંચ્યા હતા, પરંતુ તે પછી તેઓ ફરજમાં જોડાયા ન હતા.
નોંધનિય છે કે, ગોગામેડી ફિલ્મ પદ્માવત અને ગેંગસ્ટર આનંદપાલ એન્કાઉન્ટર કેસ બાદ રાજસ્થાનમાં વિરોધ પ્રદર્શનને કારણે ચર્ચામાં આવ્યા હતા. સુખદેવ સિંહ ગોગામેડી રાષ્ટ્રીય રાજપૂત કરણી સેનાના રાષ્ટ્રીય અધ્યક્ષ હતા. કરણી સેનાની રચના 2006માં થઈ હતી. લોકેન્દ્ર સિંહ કાલવીએ અલગ સંગઠન રાજપૂત કરણી સેના બનાવી. વર્ષ 2012માં સુખદેવ સિંહ ગોગામેડીને શ્રી રાજપૂત કરણી સેનાના પ્રદેશ અધ્યક્ષ બનાવવામાં આવ્યા હતા, પરંતુ બાદમાં કાલવી અને ગોગામેડી વચ્ચે વિવાદ થયો હતો. સુખદેવ સિંહ ગોગામેડીએ 2017માં શ્રી રાષ્ટ્રીય રાજપૂત કરણી સેનાના નામથી અલગ સંગઠન બનાવ્યું હતું.
