સુરેન્દ્રનગરમાં સુશાસન દિવસની ઉજવણી અંગે કાર્યક્રમ યોજાયો

ખાસ-ખબર ન્યૂઝ  સુરેન્દ્રનગર, તા.26
ગાંધીનગર ખાતે મુખ્યમંત્રી ભુપેન્દ્રભાઇ પટેલના અધ્યક્ષસ્થાને સુશાસન દિવસની ઉજવણી કરવામાં આવી હતી. જેમાં મુખ્યમંત્રીના વરદ હસ્તે કેન્દ્ર અને રાજ્ય સરકારની યોજનાઓ અને સેવાઓની માહિતી એક જ પોર્ટલ પરથી મળી રહે તે માટે માહિતી અને પ્રસારણ વિભાગ નિર્મિત ’મારી યોજના’ પોર્ટલનો શુભારંભ તેમજ વિવિધ વિભાગોના પ્રકલ્પોનું ઇ-લોકાર્પણ કરવામાં આવ્યું હતું. જેના ભાગરૂપે સુરેન્દ્રનગર કલેક્ટર કચેરી ખાતેથી ઉચ્ચ અધિકારીઓની હાજરીમાં સુશાસન દિવસની ઉજવણી કરવામાં આવી હતી. સાથે જ વિડિયો કોન્ફરન્સના માધ્યમથી સહભાગી બની અધિકારીઓએ રાજ્યકક્ષાના કાર્યક્રમનું જીવંત પ્રસારણ નિહાળ્યું હતું. રાજ્ય કક્ષાના કાર્યક્રમમાં મુખ્યમંત્રીના હસ્તે “મારી યોજના” પોર્ટલનું લોન્ચીંગ કરવામાં આવ્યું હતું. જેમાં રાજ્ય અને કેન્દ્ર સરકારની પ્રજાલક્ષી 680 યોજનાઓ સમાવી લેવામાં આવી છે. આ પોર્ટલ થકી અરજદાર વિવિધ કલ્યાણકારી યોજનાઓની જાણકારી અને લાભ મેળવી શકે તે પ્રકારનું આયોજન કરાયું છે.