રાજકોટમાં બેકાબૂ કારે મોર્નિંગ વૉકમાં નીકળેલા આધેડને ઉડાડતા કરૂણ મોત

દુકાનના પગથિયે બેઠેલી યુવતીઓ પર કાર ચડાવી ચાલક ફરાર
ખાસ-ખબર સંવાદદાતા
રાજકોટના ભક્તિનગર સર્કલ પાસે આવેલા સહકાર મેઈન રોડ ઉપર આજે સવારે કારચાલક યુવાને કાર પરનો કાબૂ ગુમાવ્યો હતો. મોર્નિંગ વોકમાં નીકળેલા આધેડને ઉડાવી 15 ફૂટ સુધી ઢસડયા હતા અને ત્યારબાદ દુકાનના પગથિયે બેસેલી યુવતીને હડફેટે લઈ કાર દુકાન સાથે અથડાઈ હતી. આ શ્ર્વાસ થંભાવી દેતા ગંભીર અકસ્માતના સીસીટીવી સામે આવ્યા છે. અકસ્માત બાદ કારચાલક ઘટનાસ્થળેથી ફરાર થઈ ગયા હતો. પોલીસે ફરાર કારચાલક યુવકની શોધખોળ હાથ ધરી છે. આ ઘટનામાં આધેડને ગંભીર ઈજા પહોંચતા સારવાર અર્થે હોસ્પિટલમાં ખસેડાયા હતા, જ્યાં તેઓનું મોત નીપજ્યું હતું. યુવતીને સદનસીબે સામાન્ય ઈજાઓ થતાં સારવાર માટે ખસેડાઇ હતી.
આ બનાવની પ્રાપ્ત વિગત મુજબ, રાજકોટ શહેરના ભક્તિનગર સર્કલ પાસે આવેલા સહકાર મેઈન રોડ ઉપર ત્રિશૂલ ચોક પાસે કારચાલક (ૠઉં 03 ખઇં 4905) યુવાન પૂરપાટ ઝડપે કાર ચલાવી રહ્યો હતો. જે દરમિયાન કારચાલક યુવાને ડાબી તરફથી અચાનક કારનું સ્ટીયરિંગ જમણી તરફ ફેરવી નાખ્યું હતું. જેને લીધે મોર્નિંગ વોકમાં નીકળેલા 50 વર્ષીય નલીનભાઈ નરોતમભાઈ સિદ્ધપુરાને હડફેટે લઈ લગભગ 15 ફૂટ સુધી ઢસડ્યા હતા. ત્યારબાદ ચોકમાં દુકાન પાસે બેસેલી 18 વર્ષીય વિદ્યાર્થિની કુમકુમ મહેશભાઈ કાનાણીને પણ કારચાલક હડફેટે લીધી હતી. જે બાદ કાર દુકાન સાથે ધડાકા સાથે અથડાઇ તુરંત રિવર્સ જતી રહી હતી.
આ ઘટનાના ઈઈઝટ પણ સામે આવ્યા છે, જે શ્ર્વાસ થંભાવી દે તેવા છે. જેમાં જોઈ શકાય છે કે, પૂરઝડપે આવતી કાર અચાનક ડાબી તરફ વળે છે અને રોડની સાઈડમાં પાર્ક કરેલા એક્ટિવાને હડફેટે લઈ રોડ પરથી પસાર થતા આધેડને ઉડાવે છે. જે બાદ કાર રોકાવાને બદલે આગળ વધી દુકાનના પગથિયે બેસેલી 3 યુવતી તરફ જાય છે. જેમાં બે યુવતી ઝડપથી ખચી જતા એક યુવતી કારની ઝપેટમાં આવી જાય છે, જે કાર અને દુકાનના શટર વચ્ચે દબાઈ જાય છે. જોકે, યુવતીને હડફેટે લીધા બાદ કાર તુરંત પાછળ ધસી જાય છે. આ અકસ્માત બાદ કારચાલક ઘટનાસ્થળેથી ફરાર થઈ જાય છે.
આ ઘટના અંગે દુકાનદાર કૌશિક ખુંટે જણાવ્યું હતું કે, આજે સવારે 7.30 વાગ્યે દુકાન ખોલતો હતો, ત્યારે સહકાર મેઈન રોડ ઉપર એક કારચાલક પૂરપાટ ઝડપે આવતો હતો. સામેની તરફ પાર્ક કરેલા એક્ટિવાને હડફેટે લઈ કાર ડાબેથી જમણી તરફ વળી ગઈ હતી, જેને લીધે મોર્નિંગ વોકમાં નીકળેલા આધેડ 15 ફૂટ સુધી ઢસડાયા હતા. તેને માથામાં ગંભીર ઈજા પહોંચી હતી, જેથી તેમને સિવિલ હોસ્પિટલમાં સારવાર માટે ખસેડવામાં આવ્યા હતા. આ કારચાલકે દુકાન પાસે બેસેલી યુવતીને પણ હડફેટે લીધી હતી અને ઈજા પહોંચાડી હતી. અકસ્માત થતાની સાથે જ કારનો ચાલક ફરાર થઈ ગયો હતો.
આ ઘટનામાં ગંભીર રીતે ઈજાગ્રસ્ત થયેલા આધેડ નલીનભાઈ નરોતમભાઈ સિદ્ધપુરાએ સારવાર દરમિયાન હોસ્પિટલના બિછાને દમ તોડ્યો છે. નલીનભાઈ નરોતમભાઈ સિદ્ધપુરા ત્રિશૂલ ચોક વિસ્તારમાં રહેતા હતા. સમગ્ર ઘટનાને લઈને ડીસીપી જોન-1 અને ટ્રાફિક ડીસીપી ઘટનાસ્થળ પર પહોંચ્યા હતા. ભક્તિનગર પોલીસ દ્વારા આરોપીને પકડવા માટેની તજવીજ હાથ ધરવામાં આવી છે.