ખાસ-ખબર ન્યૂઝ રાજુલા
રાજુલા તાલુકાના હિંડોરણા ગામે આવેલ ન્યૂ મોર હેલ્થ નામની ડાયપર બનાવાની ફેક્ટરીમાં ભીષણ આગ લાગવાની ઘટના બનવા પામી હતી. આ ધટના પગલે રાજુલા નગરપાલિકાની બે ફાયર બ્રિગેડ અને સ્થાનિક કંપનીના બે કુલ ચાર ફાયર બ્રિગેડ ધટના સ્થળે પહોંચ્યા હતા. અને આગ પર પાણીનો મારો ચલાવી આગને કાબુમાં લેવાં પ્રયત્નો હાથ ધરવામાં આવ્યા હતા. જોકે સાંજના સમયે લાગેલ આગે વીકરાળ સ્વરૂપ ધારણ કર્યું હતું જેથી દુર દુર સુધી ધુમાડાના ગોટેગોટા જોવા મળ્યા હતા. જાણવા મળેલ માહિતી મુજબ શોર્ટ સર્કિટના કારણે ડાયપરની ફેક્ટરીમાં આગ લાગી હોવાનું અનુમાન લાગી રહ્યું છે. આ સાથે રાજુલા પોલીસ અને વહીવટી તંત્રની ટીમ ધટના સ્થળે પહોંચી હતી. આ ધટનાને લઇ લોકોના ટોળેટોળા એકઠા થયા હતા. આગ લાગતા ડાયપર બનાવાની ફેક્ટરીમાં લાખોનું નુકસાન થવા પામ્યું હતું. આગે વિકરાળ સ્વરૂપ ધારણ કરતા અમરેલી ફાયર કંટ્રોલ રૂમને જાણ કરવામાં આવી હતી. જે બાદ અમરેલી ફાયર ઓફિસર એચ.સી.ગઢવી સહિત ફાયર વિભાગની ટીમ બે તેમજ સાવરકુંડલા એક રાજુલા પહોંચી હતી. આગની ઘટનામાં કુલ સાત ફાયર બ્રિગેડની મદદ લેવાઇ હતી. અને આગને કાબુમાં લેવાં માટે પ્રયાસો હાથ ધર્યા હતા. સતત 6 કલાકથી આગ પર કાબુ મેળવવાનો પ્રયાસ કર્યો હતો. ફાયર વિભાગની ભારે જહેમત બાદ મોડીરાતે આગ પર કાબુ મેળવવા તંત્રએ રાહતનો શ્વાસ લીધો હતો.
