પ્રિન્સિપાલે આરોપી વિધ્યાર્થીની બેગ ચેક કરતાં છરી મળી આવી
સમગ્ર ઘટના સીસીટીવીમાં કેદ : છાત્રને સ્કૂલમાંથી કાઢી મૂકતાં ફરિયાદ કરવાનું ટાળ્યું
ખાસ-ખબર ન્યૂઝ રાજકોટ
રાજકોટના રેલનગરની આશીર્વાદ સ્કૂલમાં ધો. 10માં ભણતો વિદ્યાર્થી છરી લઈને સ્કૂલે પહોંચ્યો હતો અને સાથી મિત્રને હાથમાં ઘા ઝીંકી દીધો હતો. શહેરમાં લુખ્ખાગીરી બેફામ વધી રહી છે ત્યારે એક 15 વર્ષનો સગીર પણ સ્કૂલ બેગમાં છરી લઈ પહોંચતા ખળભળાટ મચી ગયો છે. ઇજાગ્રસ્ત વિદ્યાર્થીને સિવિલ હોસ્પિટલ ખસેડાયો હતો. વિદ્યાર્થી સ્કૂલે છરી લઇને પહોંચ્યો હોવાના ક્લાસ રૂમના સીસીટીવી ફૂટેજ વાઈરલ થઈ રહ્યા છે. જે બાદ સમગ્ર મામલો પોલીસ મથકે પહોંચ્યો હતો બાદમાં કોઈ ફરિયાદ નોંધાઈ ન હતી. રેલનગરની આશીર્વાદ સ્કૂલના ઈજાગ્રસ્ત વિદ્યાર્થીના માતાએ જણાવ્યું હતું કે, 15 વર્ષીય પુત્ર ધો. 10માં અભ્યાસ કરે છે તેની સાથે જ ભણતો આરોપી વિદ્યાર્થી અવારનવાર તેને હેરાન કરતો હતો અગાઉ 2 વખત સ્કૂલમાં શિક્ષકો અને પ્રિન્સિપાલને ફરિયાદ કરી હતી છતાં આરોપી વિદ્યાર્થી મારા પુત્રને હેરાન કરતો હતો આજે મારો પુત્ર સ્કૂલે ગયો હતો. જ્યાં ક્લાસ રૂમમાં આરોપી વિદ્યાર્થીએ પોતાના બેગમાંથી મોટી છરી કાઢી હતી અને પુત્રના હાથમાં મારી દીધી હતી જેથી મારો પુત્ર શિક્ષક પાસે ગયો હતો જ્યાં શિક્ષક અને સ્કૂલ સંચાલકે આરોપી વિદ્યાર્થીની બેગ ચેક કરતા મોટી છરી નીકળી હતી પુત્ર ઘરે આવાત તેને હાથમાં છરી વાગ્યાની જાણ કરી હતી જેથી તેને સિવિલ હોસ્પિટલ લઈ ગયા હતા બીજી તરફ શાળા સંચાલકોએ કહ્યું હતું કે, અમે આરોપી વિદ્યાર્થીને સ્કૂલમાંથી કાઢી મુકીશું પણ તમે પોલીસ ફરિયાદ ન કરતા જોકે પરિવારને પોલીસ ફરિયાદ કરવી હોય તેથી પોલીસને જાણ કરી હતી જો કે અંતે આ મામલે આરોપી સામે શાળા સંચાલકોએ આકરા પગલાં લેતા પરિવારજનોએ ફરિયાદ કરવાનું ટાળ્યું હતું આ ઘટનાના સીસીટીવી પણ વાયરલ થયા હતા.
