મુખ્યમંત્રી ભૂપેન્દ્ર પટેલ કાલે રાજકોટ આવશે

વડાપ્રધાન કાર્યક્રમ સંદર્ભે કલેકટર કચેરીમાં મીટીંગ ઉપરાંત જૂની કલેકટર કચેરી ખાતે બે સબ રજીસ્ટ્રાર કચેરીનું લોકાર્પણ સહિત અન્ય કેટલાક કાર્યક્રમોમાં હાજરી આપશે

ખાસ-ખબર સંવાદદાતા
રાજકોટ જિલ્લા કલેકટર પ્રભવ જોષીએ પત્રકારોને જણાવ્યું હતું કે, શનિવારે બપોરે 2 વાગ્યે રાજ્યના મુખ્યમંત્રી ભૂપેન્દ્ર પટેલ રાજકોટ આવી રહ્યા છે, તેમના લોકાર્પણ – સન્માન – મીટીંગ – સ્થળ તપાસ સહિતના ઢગલાબંધ કાર્યક્રમો યોજાયા છે.

કલેકટરએ જણાવેલ છે કે, શનિવારે મુખ્યમંત્રી રાજકોટ આવ્યા બાદ જૂની કલેકટર કચેરી ખાતે સબ રજીસ્ટ્રાર કચેરીનું લોકાર્પણ કરશે, ત્યાંથી તેઓ ઝવેરચંદ મેઘાણી મોડલ સ્કૂલની મુલાકાત લેશે. આ પછી મુખ્યમંત્રી કલેકટર કચેરી ખાતે વડાપ્રધાન આગમન અંગે કલેકટર સહિતના અધિકારીઓ સાથે સમીક્ષા કરશે, ત્યાંથી તેઓ રેસકોર્ષ ખાતે જાહેરસભા સ્થળની તપાસ અર્થે જશે.

આ પછી તેઓ હેમુ ગઢવી હોલ ખાતે દિવ્યાંગ લોકોની સ્નેહ સ્પર્શ સંસ્થા, ગીર ગંગા ટ્રસ્ટ – ગૌશાળા સ્કીમ અંતર્ગત પશુપાલકો દ્વારા સીએમનું સ્વાગત, ચેકડેમમાં સહયોગ આપનાર સંસ્થાઓના અગ્રણીઓનું બહુમાન, કણસાગરા કોલેજ ખાતે પટેલ સમાજ સંસ્થાનો કાર્યક્રમ વિગેરેમાં હાજરી આપી અનુકૂળતાએ ગાંધીનગર જવા રવાના થશે.