બ્રાઝિલનું સૌથી ભયંકર પોલીસ ઓપરેશન: રિયોમાં ફોજદારી ગેંગ રેડ કમાન્ડ પર ક્રેકડાઉનમાં મૃત્યુઆંક વધીને 132 થયો

રિયો ડી જાનેરોના બહારના વિસ્તારમાં એક ચાર રસ્તા પરના ફૂટપાથ પર, આ મૃતદેહોને એક જ કતારમાં રાખવામાં આવ્યા હતા. નિવાસીઓએ જણાવ્યું કે, તેમના સંબંધીઓ દ્વારા ઓળખ થઈ શકે તે માટે ઘણા મૃતદેહોના અન્ડરવેર સુધી ઉતારી દેવામાં આવ્યા હતા, જ્યારે બાકીના મૃતદેહોને ચાદરોથી ઢાંકી દેવામાં આવ્યા હતા.

આ બધું કેવી રીતે થયું?

બ્રાઝિલની રાજ્ય પોલીસે જણાવ્યું કે, એક મોટી ડ્રગ ગેંગને ખતમ કરવાના ઉદ્દેશ્યથી કરવામાં આવેલી આ કાર્યવાહીનું આયોજન બે મહિનાથી વધુ સમયથી ચાલી રહ્યું હતું. આ પ્લાનિંગનો ઉદ્દેશ્ય શંકાસ્પદોને જંગલી પહાડી વિસ્તારમાં લઈ જવાનો હતો, જ્યાં તેમને રોકવા માટે એક વિશેષ ઓપરેશન યુનિટ તૈનાત કરવામાં આવ્યું હતું.

જોકે, આ મોટા પાયે કરવામાં આવેલું અભિયાન કેવી રીતે આગળ વધ્યું અને મૃતકોમાં સામાન્ય નાગરિકો પણ સામેલ હતા કે નહીં તે અંગે હજુ પણ અનિશ્ચિતતા જળવાઈ રહી છે. બાદમાં એક અધિકારીએ સ્વીકાર્યું કે આ અભિયાન ટોચના ગેંગ નેતાને પકડવાના તેના મુખ્ય લક્ષ્યમાં સફળ થઈ શક્યું નથી.

યુદ્ધ જેવી સ્થિતિ: ‘રેડ કમાન્ડો’ પર પોલીસનો સકંજો

બ્રાઝિલ પોલીસનું ઓપરેશન રિયો ડી જાનેરોમાં ચાલ્યું ત્યારે યુદ્ધ જેવી સ્થિતિ હતી. આ શહેર લાંબા સમયથી Comando Vermelho (CV) (જેને રેડ કમાન્ડો પણ કહેવાય છે) અને Terceiro Comando Puro (TCP) જેવા ‘ડ્રગ લોર્ડ્સ’ના નિયંત્રણમાં છે. ડ્રગ તસ્કરીનું સિન્ડિકેટ ચલાવતી આ ગેંગ ગેરકાયદેસર હથિયારો, જમીન પર કબજો અને સ્થાનિક લોકો પાસેથી સુરક્ષા ટેક્સ પણ વસૂલે છે. ઓક્ટોબર 2025ના અંતમાં રિયોના મેયર અને રાજ્ય સરકારે આ હેતુથી ઓપરેશન રિયો પેસિફિકાડો (Operation Rio Pacificado) નામનું એક અભિયાન શરૂ કર્યું છે.

રાષ્ટ્રપતિની પ્રતિક્રિયા

રાષ્ટ્રપતિ લુઇસ ઇનાસિયો લૂલા દા સિલ્વાએ બુધવારે એક મંત્રી સ્તરીય સમિતિને રિયો ડી જાનેરો મોકલી અને ફોરેન્સિક તપાસ માટે સંઘીય સમર્થનનું વચન આપ્યું. લૂલાએ X પર એક પોસ્ટ દ્વારા કહ્યું, ‘અમે એ સ્વીકારી શકીએ નહીં કે સંગઠિત ગુનાઓ પરિવારોને નષ્ટ કરવાનું, નિવાસીઓ પર અત્યાચાર કરવાનું તથા શહેરોમાં નશીલી દવાઓ અને હિંસા ફેલાવવાનું ચાલુ રાખે.’

રેડ કમાન્ડોનો ભૂતકાળ

‘Comando Vermelho’ (રેડ કમાન્ડો) બ્રાઝિલની સૌથી જૂની અને પ્રભાવશાળી માફિયા ગેંગ છે, જેની સ્થાપના 1970ના દાયકામાં જેલમાં રાજકીય કેદીઓના સમૂહ તરીકે થઈ હતી અને હવે તે આંતરરાષ્ટ્રીય ડ્રગ તસ્કરી નેટવર્ક બની ગયું છે. માફિયાના વિસ્તરણને રોકવા માટે આ અભિયાન એક વર્ષથી વધુ સમયથી આયોજિત કરાયું હતું.

UN ઇવેન્ટ્સ (COP30ની પ્રી-ઇવેન્ટ્સ, જેમ કે C40 ગ્લોબલ મેયર્સ સમિટ અને અર્થશૉટ પ્રાઇઝ – જે નવેમ્બરના પહેલા સપ્તાહમાં યોજાવાની છે) પહેલા શહેરની સુરક્ષા અને શાંતિ જાળવવા માટે રિયો ડી જાનેરોમાં ડ્રગ માફિયા વિરુદ્ધ આ મોટી અને સખત કાર્યવાહી જરૂરી માનવામાં આવી છે, કારણ કે માફિયાના વધતા પ્રભાવને કારણે અગાઉથી જ ચિંતા હતી.