વિસાવદરની પ્રાચીન રામજી મંદિર ગરબી: પરંપરા અને ઉમંગનો અનોખો સંગમ

વિસાવદર શહેરની સૌથી જૂની અને જાણીતી રામજી મંદિરની ગરબી આજે પણ તેની પ્રાચીન પરંપરા અને નવા રંગરૂપ સાથે લોકોનું આકર્ષણનું કેન્દ્ર બની રહી છે. આ ગરબીની લોકપ્રિયતા એટલી છે કે આજે પણ ગ્રામ્ય વિસ્તારોમાંથી લોકો પોતાના પરિવાર સાથે રાત્રિના સમયે ખાસ આ ગરબી જોવા માટે આવે છે. આ અતિ પ્રાચીન અને અર્વાચીન ગરબાની શૈલીમાં બહેનો સુંદર સંગીતના તાલે ગરબા લે છે. આ ગરબીની એક મોટી ખાસિયત એ છે કે ખૂબ જ નાની વયની બાળાઓને પણ તેમાં સમાવેશ કરવામાં આવે છે. આ બાળાઓનો ઉત્સાહ જોઈને તેમને ગરબીમાં રાખવામાં આવે છે. આ અતિ નાની બાળાઓ પોતાની બોલીમાં ગરબા લેતી જાણે સાક્ષાત જગદંબાનું બાળસ્વરૂપ હોય તેવો અનુભવ કરાવે છે, અને તેમને જોવા માટે લોકોની ભીડ ઉમટી પડે છે. આ ગરબીની બીજી એક મહત્વની વિશેષતા એ છે કે અહીં કોઈ પણ જાતના નાત-જાતના ભેદભાવ વગર દરેક જ્ઞાતિની દીકરીને ગરબા લેવા માટે પ્રોત્સાહિત કરવામાં આવે છે. ગામની શરૂઆતથી જ રામજી મંદિર ચોક તરીકે ઓળખાતા રોડ પર આ ગરબીનું આયોજન થાય છે. આ ગરબીમાં દાતાઓ દ્વારા દરરોજ બાળાઓને લાણી આપવામાં આવે છે. જો કોઈ વ્યક્તિ કે સંસ્થા બાળાઓને ઇનામ આપવા ઈચ્છતી હોય તો તે સંચાલકોનો સંપર્ક કરી શકે છે.