રાજકોટના શાસ્ત્રી મેદાનની અને ઘંટેશ્વરમાં નિર્માણાધીન કોર્ટ બિલ્ડીંગની મુલાકાત લેતા કલેકટર

શાસ્ત્રી મેદાનમાં યોગા, આરોગ્ય સહિત વિવિધ રચનાત્મક પ્રવૃત્તિઓ થઈ શકે તે માટે રોડમેપ તૈયાર કરાશે.

રાજકોટ : રાજકોટના કલેકટર અરુણ મહેશ બાબુએ આજે રાજકોટના શાસ્ત્રી મેદાનની મુલાકાત લઇ આ મેદાનનો રચનાત્મક પ્રવૃત્તિઓ માટે ઉપયોગ થાય અને તેનું રી ડેવલપમેન્ટ થાય તે માટે ચર્ચા વિચારણા કરી હતી.

રાજકોટના પ્રાંત અધિકારી સિધ્ધાર્થ ગઢવીએ કલેકટરને  શાસ્ત્રી મેદાનનો હયાત વિસ્તાર અને તેમાં હાથ ધરી શકાય તેવી રચનાત્મક પ્રવૃત્તિઓ – કામગીરીઓની વિગતો રજુ કરી હતી. તેમજ લોકોના આરોગ્યને ધ્યાને લઈ આ જગ્યામાં વોકિંગ, સિનિયર સિટીઝન – બાળકો માટેની વિવિધ પ્રવૃત્તિઓ, યોગા સહિતની વ્યવસ્થાઓ માટેના આયોજનની રૂપરેખા આપી આ માટે હાથ ધરવામાં આવેલ સુચીત પ્લાન અંગે કલેકટરને માહિતગાર કર્યા હતા.

શાસ્ત્રી મેદાનની મુલાકાત બાદ જિલ્લા કલેકટર એ જામનગર રોડ સ્થિત ઘંટેશ્વર ખાતે નિર્માણાધીન ડીસ્ટ્રીક કોર્ટ બિલ્ડીંગની પણ મુલાકાત લીધી હતી. કામગીરી સમયસર પૂર્ણ થાય તે માટે સંબંધિત અધિકારીઓને માર્ગદર્શન આપ્યું હતું. અત્યાર સુધી થયેલી કામગીરી અને આગામી છ મહિનામાં પૂર્ણ થનાર કામગીરી અંગે જરૂરી વિગતો શહેર માર્ગ અને મકાન વિભાગના કાર્યપાલક ઇજનેર નિતેશ કામદારે આપી હતી. આ વેળાએ પ્રાંત અધિકારી ઉપરાંત રાજકોટ મહાનગરપાલિકાના અધિકારી સહિત સંબંધિત કચેરીઓના અધિકારીઓ ઉપસ્થિત રહ્યા હતા.