PM મોદીને કુવૈતનું સર્વોચ્ચ સન્માન મળ્યું: ધ ઓર્ડર ઓફ મુબારક અલ કબીર’ મેળવનાર પ્રથમ ભારતીય પ્રધાનમંત્રી બન્યા

વડાપ્રધાન નરેન્દ્ર મોદીને કુવૈતની મુલાકાતના બીજા દિવસે સર્વોચ્ચ સન્માન’ધ ઓર્ડર ઓફ મુબારક અલ કબીર’ આપવામાં આવ્યું છે. તેમને આ સન્માન કુવૈતના અમીર શેખ મિશાલ અલ-અહમદ અલ-જાબેર અલ-સબા દ્વારા આપવામાં આવ્યું હતું. આ સન્માન મેળવનાર મોદી પ્રથમ ભારતીય પીએમ છે. પ્રધાનમંત્રી મોદીને અત્યાર સુધી 20 દેશોએ તેમનું સર્વોચ્ચ નાગરિક સન્માન આપ્યું છે. આ ઓર્ડર રાષ્ટ્રાધ્યક્ષો અને વિદેશી વડાઓ અને વિદેશી શાહી પરિવારોના સભ્યોને મિત્રતાના પ્રતીક તરીકે આપવામાં આવે છે. આ અગાઉ બિલ ક્લિન્ટન, પ્રિન્સ ચાર્લ્સ અને જ્યોર્જ બુશ જેવા વિદેશી નેતાઓને એનાયત કરવામાં આવ્યો છે.

બે દિવસના કુવૈત પ્રવાસે પહોંચેલા વડાપ્રધાન નરેન્દ્ર મોદીએ કુવૈતના અમીર અને વડાપ્રધાન મોહમ્મદ મિશાલ અલ-અહમદ અલ-જબર અલ-સબા સાથે મુલાકાત કરી હતી. અહીં પીએમ મોદીને અમીરના મહેલ બાયન પેલેસમાં ગાર્ડ ઓફ ઓનર આપવામાં આવ્યું હતું. વડાપ્રધાન નરેન્દ્ર મોદી શનિવારે બે દિવસની મુલાકાતે કુવૈત પહોંચ્યા હતા. 4 દાયકા બાદ ભારતીય પીએમની કુવૈતની આ પ્રથમ મુલાકાત છે. પીએમ મોદી પહેલા ઈન્દિરા ગાંધી જ્યારે વડાપ્રધાન હતા ત્યારે 1981માં કુવૈત ગયા હતા. એરપોર્ટ પર મોદીનું રેડ કાર્પેટ વેલકમ કરવામાં આવ્યું હતું.

પ્રધાનમંત્રી મોદીએ કુવૈત પ્રવાસના પહેલા દિવસે એક લેબર કેમ્પની મુલાકાત લીધી હતી. તેમણે ભારતીય મજૂરો સાથે વાત કરી, તેમની સુખાકારી વિશે પૂછપરછ કરી અને સાથે નાસ્તો પણ કર્યો હતો. આ પહેલા મોદીએ એનઆરઆઈને સંબોધન કર્યું હતું.

NRIને સંબોધતા મોદીએ કહ્યું કે 43 વર્ષ પછી એક ભારતીય  પ્રધાનમંત્રી કુવૈત આવ્યા છે. ભારતથી આવવું હોય તો 4 કલાક લાગે છે, વડાપ્રધાનને 4 દાયકા લાગ્યા. મોદીએ કહ્યું કે કુવૈતમાં લોકોને દરેક તહેવાર ઉજવવાની સુવિધા છે. પણ હું તમને સેલિબ્રેટ કરવા આવ્યો છું.