શ્રી નવદુર્ગા ગરબીમાં ચોથા-આઠમાં નોરતે સળગતા અંગારાઓ પર રમાય છે મશાલ રાસ

ગરબીમાં ભાગ લેનાર પાસેથી કોઈપણ પ્રકારની ફી લેવામાં આવતી નથી તેમજ લ્હાણી પણ નથી માંગવામાં આવતી

ખાસ-ખબર ન્યૂઝ ઉપલેટા

નવરાત્રી મહોત્સવ એટલે જગતજનની મા જગદંબાની આરાધના, સાધના તેમજ ભક્તિભાવ માટેનો વિશેષ તહેવાર એટલે નવરાત્રી ઉજવવામાં આવે છે.
આ નવરાત્રીમાં નવરાત્રી દરમિયાન રાસ ગરબાઓનું વિશેષ રૂપે આયોજન થતું હોય છે જેમાં આધુનિક યુગમાં અર્વાચીન ગરબા અને ડીજેના તાલ ઉપર અર્વાચીન રાસ ગરબા રમવામાં આવે છે ત્યારે આ આધુનિક યુગમાં પણ ઘણા વિસ્તારો અને ગ્રામ્ય વિસ્તારોની અંદર પરંપરાગત નવરાત્રી મહોત્સવનું આયોજન થતું હોય છે અને નવરાત્રિના પાવન પર્વની આધુનિક યુગમાં પણ અર્વાચીન ગરબાની સામે લોકોને વધુ આકર્ષણ કરતી પ્રાચીન રાસ ગરબીઓ પણ યોજાઇ રહી છે.

ઉપલેટા તાલુકાના નિલાખા ગામે જ્યારથી ગામની સ્થાપના કરવામાં આવી છે ત્યારથી લઈને આજદિન સુધી દર વર્ષે સમસ્ત ગામના સાથ અને સહકારથી ગામની એકમાત્ર ગરબી એટલે કે શ્રી નવદુર્ગા ગરબી મંડળનું દર વર્ષે આયોજન થતું હોય છે. આ ગરબીની વિશેષતા એ છે કે અહીંયા ગરબીની અંદર પરંપરાગત સાજિન્દાઓ અને લાઈવ ગાયક કલાકારો દ્વારા માતાજીના ગરબાઓ અને માતાજીની ભક્તિ માટેના ગરબાઓ ગાય અને સૌ કોઈ આ ગરબીની અંદર ભાગ લેનારા ખેલૈયાઓ માતાજીના સ્થાપનની ફરતે રાસ ગરબા રમતા નજરે પડે છે.

ઉપલેટાના નીલાખા ગામે વર્ષોથી ચાલતી અને એકમાત્ર ગરબીની વિશેષ વાત એ છે કે, આ ગરબીમાં ભાગ લેનાર પાસેથી કોઈપણ પ્રકારની ફી લેવામાં આવતી નથી. આ સાથે જ આ ગરબીના આયોજકો દ્વારા ક્યારે પણ કોઈપણ વ્યક્તિ પાસે ફંડ ફાળો કે ઇનામ વિતરણ અથવા લહણી વિતરણ માટે ઉઘરાણી કરવા માટે નીકળવાનો નિયમ નથી કારણ કે, અહીંયા ગામના લોકો તેમજ સેવાભાવી લોકો આ ગરબીમાં સ્વૈચ્છિક રીતે રોજનો હજારો રૂપિયાનો ફંડ ફાળો અને લ્હાણી સ્વેચ્છિક રીતે આપી જાય છે જે ગરબીના આયોજકો માટે ખૂબ સારી અને ફાયદાકારક બાબત છે.આ ગરબીમાં છેલ્લા ત્રણ વર્ષથી ખેલૈયાઓ દ્વારા વિશેષ રૂપે નવરાત્રીના ચોથા નોરતે અને નવરાત્રીના આઠમા નોરતે મસાલ રાસનું આયોજન કરવામાં આવે છે જ્યારે છેલ્લા બે વર્ષથી આ ગરબીની અંદર ઢાલ-તલવાર રાસનું પણ વિશેષ રૂપે આયોજન થાય છે ત્યારે આ ઢાલ તલવાર રસમાં પણ ઢાલ અને તલવારનો રાસ જ્યારે રજૂ કરવામાં આવે છે ત્યારે રાસ રમતી વખતે જ્યારે ઢાલ અને તલવાર અથડાય છે ત્યારે તણખલા પણ ઉદ્ભવે છે પરંતુ આ રાસ દરમિયાન અને પ્રેક્ટિસ દરમિયાન કોઈપણ વ્યક્તિને માતાજીની સાક્ષાત્કારની હાજરી હોવાથી ઈજા કે નુકસાન નથી થતું. જ્યારે મસાલા રાસની અંદર સળગતા અંગારા ઉપર જ્યારે મશાલ રાસ રજુ કરવામાં આવે ત્યારે પણ કોઈપણ ખેલૈયાને કોઈપણ પ્રકારની ઇજા કે નુકસાની પણ નથી થતી.

આ રાસ ક્યારે રજૂ કરવામાં આવે છે ત્યારે માતાજીની સાક્ષાત્કાર શક્તિ આ ગરબીમાં જોવા મળી રહી હોવાથી સૌ કોઈ લોકો આ ગરબીને નિહાળવા અને શક્તિના સાક્ષાત્ત દર્શન કરવા માટે બહોળી સંખ્યામાં ઉમટી પડે છે.

આ ગરબીમાં ભાગ લેતી દીકરીઓ હોય તેમને આયોજકો, સેવકો, દાતાઓ અને સ્વયંસેવકો દ્વારા રોજબરોજ રોકડની તેમજ વિવિધ વસ્તુઓની ખાણીપીણી સાહિતની તમામ વસ્તુઓની લ્હાણી વિતરણ કરવામાં આવે છે જ્યારે અંતિમ દિવસે આ ગરબીમાં ભાગ લેતી દીકરીઓને દર વર્ષે મોટા પ્રમાણમાં અનેક પ્રકારના ઈનામો અને ભેટ આપવામાં આવે છે.