રાહુલ ગાંધીની યાત્રાનું નામ બદલાયું: 14મીએ મણીપુરથી પ્રારંભ થશે

• 66 દિવસની યાત્રા 6700 કી.મીનો વિસ્તાર-15 રાજયોના 110 જીલ્લા કવર કરશે: ‘ઈન્ડિયા’ ગઠબંધન નેતાઓને પણ તેડાવશે

કોંગ્રેસે રાહુલ ગાંધીના નેતૃત્વમાં આયોજિત ભારત ન્યાય યાત્રાનું નામ બદલી નાખ્યું છે. હવે આ ભારત જોડો ન્યાય યાત્રા કહેવાશે. કોંર્ગેસના મહાસચિવ જયરામ રમેશે આપી. તેમણે કહ્યું કે- રાહુલ ગાંધીની ગત વર્ષે 5 મહિના સુધી ચાલેલી ભારત જોડો યાત્રા સાથે મોટી સંખ્યામાં લોકો જોડાયા હતા અને આ નામ લોકોના મનમાં બેસી ગયું હતું. તેથી અમે નવી યાત્રામાં પણ ભારત જોડો સામેલ કર્યું છે.

જયરામ રમશે કહ્યું કે- મહાસચિવો, પ્રભારીઓ, પ્રદેશ અધ્યક્ષો અને વિધાનસભામાં વિપક્ષના નેતાઓની મીટિંગમાં આ નિર્ણય લેવામાં આવ્યો.તેમણે કહ્યું કે- ભારત જોડો યાત્રા એક બ્રાન્ડ બની ગઈ હતી. જેણે લોકોના હ્વદય અને મગજમાં જગ્યા બનાવી લીધી હતી, ત્યારે આ વાતને આપણે ભૂલવી ન જોઈએ. આ યાત્રાએ કન્યાકુમારીથી શ્રીનગર સુધીની સફર પુરી કરી હતી અને તેની અસર પણ જોવા મળી.

જયરામ રમેશે આ દમરિયાન ભારત જોડો ન્યાય યાત્રાનો રુટમેપ પણ રજૂ કર્યો. તેમણે કહ્યું કે આ યાત્રાની શરુઆત હિંસાથી પ્રભાવિત મણિપુરની રાજધાની ઈમ્ફાલથી 14 જાન્યુઆરીએ બપોરે 12 વાગ્યાથી થશે. આ માર્ચનો કુલ રુટ 6,700 કિલોમીટર લાંબો હશે. તેમણે કહ્યું કે આ યાત્રા 66 દિવસ સુધી ચાલશે અને દરરોજ બે વખત રાહુલ ગાંધીનું ભાષણ હશે.

રુટમાં એક ફેરફાર એ થયો છે આ યાત્રા અરુણાચલ પ્રદેશમાં પણ જશે. અરુણાચલ સહિત 15 રાજ્યોમાંથી આ યાત્રા પસાર થશે. શરુઆત તબક્કામાં કોંગ્રેસે યાત્રાનું પ્લાનિંગ અરુણાચલના પાસીઘાટથી ગુજરાતના પોરબંદર સુધીનું કર્યું હતું. જે બાદ મણિપુરમાં હિંસાને જોતા કોંગ્રેસે પ્લાન બદલાવ્યો અને મણિપુરથી મુંબઈ સુધીની માર્ચનું નક્કી કર્યું.

આ યાત્રા અંતર્ગત સૌથી લાંબો 1000 કિલોમીટર સુધી યુપીમાંથી નીકળશે. આ રાજ્યમાં કોંગ્રેસનો એક જ સાંસદ છે એવામાં તેમની આ મહેનત કેટલી અસર દેખાડશે તે જોવાનું રહેશે. પશ્ર્ચિમ બંગાળના 7 જિલ્લામાં 523 કિલોમીટરની સફર રહેશે જે 5 દિવસ સુધી ચાલશે. જયરામ રમેશે કહ્યું કે આ યાત્રામાં વિપક્ષી ગઠબંધન I.N.D.I.A.ના તમામ નેતાઓને બોલાવવામાં આવશે.

તેમણે કહ્યું કે, માર્ચ અંતર્ગત 15 રાજ્યોના કુલ 110 જિલ્લાઓને કવર કરવામાં આવશે. મહત્વપૂર્ણ છે કે ભારત જોડો યાત્રાની સફળતાને લઈને હજુ સવાલ ઉઠે છે કેમકે યાત્રા દરમિયાન જ પાર્ટીને ગુજરાતમાં હારનો સામનો કરવો પડ્યો હતો. જે બાદ ત્રણ હિન્દી ભાષા રાજ્યોમાં તેમણે હારનો સામનો કરવો પડ્યો હતો.