એક વર્ષમાં બેન્ક કરતાં વધુ વ્યાજ અને નફાની લાલચ આપી શિશામાં ઉતાર્યા
હમણાં પૈસા નથી વ્યવસ્થા થશે તો કટકે કટકે આપીશ ફરિયાદ કરવી હોય તો કરી દયો કહેતા નોંધાવી ફરિયાદ
ખાસ-ખબર ન્યૂઝ રાજકોટ
- Advertisement -
રાજકોટના રૈયા રોડ પર આવેલ સોપાન હાઈટ્સમાં રહેતા અને 150 ફૂટ રીંગ રોડ પર આવેલા શો રૂમમાં 10 વર્ષથી કૈશીયર તરીકે નોકરી કરતાં જગતભાઈ મહાશંકરભાઈ પાઠક ઉ.38એ અને અન્યો ભોગ બનેલા રોકાણકારોની ફરિયાદ પરથી દંપતી સહિત કુલ ચાર આરોપીઓ વિરુધ્ધ 85 લાખની છેતરપિંડી અંગે ફરિયાદ નોંધાવી છે.
ફરિયાદમાં જણાવ્યું છે કે તેની સાથે નોકરી કરતા ભાવિન જોશીએ 2023ની સાલમાં તેને કહ્યું કે વિમલ ઇન્ડીયન ટેરીનના શો રૂમમાં નોકરી કરે છે. તેની પત્ની સોનીયા બે મિત્રો ભાવિન અને ચંદ્રદિપ સાથે સીએમ એન્ટરપ્રાઈઝ નામની પેઢી ચલાવે છે. તેઓ ભાગીદારીમાં સિમેન્ટના બ્લોક બનાવવાની ફેક્ટરી શરૂ કરવાના છે. જેમાં રૂપિયાનું રોકાણ કરવાથી એક વર્ષ બાદ સારુ વળતર મળશે તેણે પણ રોકાણ કર્યું છે તેના દસેક દિવસ બાદ ભાવિને તેને આ માટેની મીટીંગ બીગ બજાર મોલ પાસેની શેરીમાં આવેલ અમરનાથ મહાદેવના મંદિર નજીકના આરએમસીના બગીચામાં ગોઠવાયાનું કહ્યું હતું જેથી તે ભાવિન સાથે તે મીટીંગમાં જતાં ચારેય આરોપીઓએ કહ્યું કે તેઓ સિમેન્ટના બ્લોકની ફેક્ટરી બનાવે છે. જે માટેના ગર્વમેન્ટ કોન્ટ્રાક્ટ રાખ્યા છે પેઢીમાં રોકાણ કરવાથી એક વર્ષ બાદ વધુ વ્યાજ અને નફા સાથે રકમ પરત કરશે. આ વખતે તેણે વિમલને પોતાની પાસે રોકડ રકમ નહીં હોવાનું કહેતા વિમલે કહ્યું કે ક્રેડીટ કાર્ડ સ્વાઈપ કરવાથી પણ રોકાણ કરી શકાય છે.
પરિણામે તેણે તેનું અને પત્ની અર્ચનાબેન આહુજાનું ક્રેડિટ કાર્ડ આપ્યું હતું. જેમાંથી કુલ રૂા.6.30 લાખ વિમલે સ્વાઈપ કરીને નક્કી થયા મુજબ રોટેશન બીલનો ચાર્જ ઓનલાઈન ટ્રાન્સફર કરી આપ્યો હતો. એકાદ વર્ષ બાદ તેણે વિમલને કોલ કરી નફાની અને મુળ રકમ પરત આપવાની વાત કરતાં એક મહિનાની મુદત માંગી હતી. એક મહિના બાદ ફરીથી કોલ કરતાં બહાના શરૂ કર્યા હતા.
ત્યારપછી અવાર-નવાર વિમલ પાસે ઉઘરાણી કરતાં હતા. આખરે તેણે ફરીથી આરએમસીના તે જ બગીચામાં મીટીંગ ગોઠવી હતી. જ્યાં ચારેય આરોપીઓએ કહ્યું કે હાલ તેમની પાસે રૂપિયા નથી, રૂપિયાનો મેળ આવશે ત્યારે કટકે-કટકે પરત આપી દેશે. સાથોસાથ ફરિયાદ કરવી હોય તો પણ કરી નાખવા કહ્યું હતું તે વખતે તેને જાણવા મળ્યું હતું કે તેના મિત્ર કાર્તિકભાઈ જોશીના રૂા.9.49 લાખ, પારસભાઈ પંચાલના રૂા.1.94 લાખ, મિહિરભાઈ વિરાણીના રૂા. 10.15 લાખ, જયભાઈ વાછાણીના રૂા.11.79 લાખ અને અજયભાઈ તેરૈયાના રૂા. 13.67 લાખ પણ સલવાયા છે. આ તમામે પણ વિમલના કહેવાથી રોકાણ કરી જુદા-જુદા ક્રેડિટ કાર્ડ સ્વાઈપ કરી રકમ આપી હતી. આ રીતે ચારેય આરોપીઓએ કુલ રૂા.85.18 લાખની છેતરપીંડી કરી હતી જેથી વિમલ ખેર, તેના પત્ની સોનિયાબેન, બે મિત્રો ભાવિન મહાલિયા અને ચંદ્રદિપ મહાલીયાએ રૂા. 85.18 લાખની છેતરપિંડી કર્યાની રાજકોટ તાલુકા પોલીસ મથકમાં ફરિયાદ નોંધાઇ છે.
