પ્યાસીઓના કંઠો સુકાયા!: 4.94 કરોડના દારૂ પર બુલડોઝર વળ્યું

2022-23 દરમિયાન કરોડો રૂપિયાની કિંમતનો વિદેશી દારૂનો જથ્થો ઝડપાયો હતો : સોખડા નજીક ઉચ્ચ અધિકારીઓની હાજરીમાં દારૂનો નાશ

ખાસ-ખબર સંવાદદાતા
રાજકોટ શહેર પોલીસે વર્ષ 2022-23 દરમિયાન કરોડો રૂપિયાની કિંમતનો વિદેશી દારૂનો જથ્થો ઝડપી પાડ્યો હતો. આજરોજ નામદાર કોર્ટનાં આદેશ મુજબ સોખડા નજીક કુલ રૂપિયા 4.94 કરોડનાં આ વિદેશી દારૂના જથ્થા ઉપર ઉચ્ચ અધિકારીઓની હાજરીમાં બુલડોઝર ફેરવી દેવામાં આવ્યું હતું. જેને લઈને અનેક પ્યાસીઓમાં ભારે કચવાટ જોવા મળી રહ્યો છે. જોકે વર્ષ 2022 – 23 દરમિયાન રાજકોટ શહેર પોલીસ પર દારૂની ખેપ મારવાનો આક્ષેપ પણ લાગી ચૂક્યો છે. જે મામલે પોલીસ તપાસ ચાલી રહી છે.

ડીસીપી સજ્જનસિંહે જણાવ્યું હતું કે, છેલ્લા દસેક મહિનામાં રાજકોટનાં જુદા-જુદા 12 પોલીસ મથકો તેમજ ક્રાઈમ બ્રાન્ચ દ્વારા ઝડપાયેલા કરોડોનાં વિદેશી દારૂના જથ્થાનો નાશ કરવામાં આવ્યો છે. જેમાં નશાબંધી અને આબકારી જકાત વિભાગનાં અધિકારીઓ તેમજ ડેપ્યુટી કલેક્ટર સહિતનાઓની હાજરીમાં કુલ 12 પોલીસ મથક અને ક્રાઈમ બ્રાન્ચ મળીને દ્વારા કરાયેલા પ્રોહીબિશનનાં મુદ્દામાલનો નાશ કરવામાં આવ્યો છે. જેમાં ઝોન-1 355 કેસની 81 હજાર બોટલો કિ. 2.81 કરોડ, ઝોન-2 286 કેસની 16116 બોટલો કિ. રૂ. 53.79 લાખ અને ક્રાઈમ બ્રાન્ચનાં 192 કેસની 42,778 બોટલો કિ. રૂ. 1.59 કરોડ મળી કુલ 833 કેસોની 1.40 લાખ બોટલ સહિત રૂ. 4.94 કરોડનાં વિદેશી દારૂ ઉપર બુલડોઝર ફેરવી નાશ કરવામાં આવ્યો છે.