20,000 કિલો વાસી ટુટી ફ્રુટી અને જેલીનો જથ્થો પકડાયો

રાજકોટના પટેલ મહિલા ગૃહઉદ્યોગનાં યુનિટ પર રેડ

ખાસ-ખબર ન્યૂઝ રાજકોટ, તા.21

શહેરના પટેલ મહિલા ગૃહ ઉદ્યોગની તમામ ખાદ્ય ચીજો લોકોને ખાવાલાયક નથી સાથે જ આ પેઢી દ્વારા લોકોના સ્વાસ્થ્ય સાથે ચેડાં કરતાં હોવાનું માલુમ પડ્યું છે. પટેલ મહિલા ગૃહ ઉદ્યોગની જેલી ક્યુબ્સ, ટુટી-ફુટીમાં ભેળસેળ કરવામાં આવતી હોવાનો ખુલાસો થયો છે.આજરોજ રાજકોટ મહાનગરપાલિકાની ફૂડ વિભાગની ટીમ સાથે આરોગ્ય અધિકારી ડો. જયેશ વકાણી, ડેઝીગ્નેટેડ ઓફિસર ડો. હાર્દિક મેતા, ફૂડ સેફ્ટી ઓફિસર કે. એમ. રાઠોડ, ફૂડ સેફ્ટી ઓફિસર કે. જે. સરવૈયા, ફૂડ સેફ્ટી ઓફિસર સી. ડી. વાઘેલા તથા ફૂડ સેફ્ટી ઓફિસર આર. આર. પરમાર સાથે સર્વેલન્સ ચેકિંગ દરમિયાન ખોખડદડી નદીના કાંઠે, કોઠારીયા રિંગ રોડ, નેશનલ હાઇ વે-8ઇ, ઓમ ઇન્ડ. એરીયા, રાજકોટ ખાતે આવેલ જયેશભાઇ પરસોતમભાઇ સાવલીયાની માલિકી પેઢી પટેલ મહિલા ગૃહ ઉદ્યોગની સ્થળ તપાસ કરવામાં આવી હતી.

પેઢીની સ્થળ તપાસ દરમિયાન અનેક ખામીઓ જોવા મળી હતી જેમાં ઉત્પાદન સ્થળે ખુલ્લામાં પ્રોસેસિંગ થતું જોવા મળ્યું, જેમાં છાપરા, ફ્લોરિંગ તથા ઉપયોગમાં લેવાતો ટાંકો ગંદકીયુકત તથા તૂટેલી હાલતમાં, સંગ્રહ કરેલ કાચો માલ તથા તૈયાર કરેલ ખાદ્યચીજોનું સ્ટોરેજ અનહાઇજેનિક કન્ડિશનમાં જોવા મળ્યું જેમાં સ્થળ પર ધૂળ ચીકાશ અને કરોળિયાના જાળા જોવા મળ્યા, રો-મટિરિયલ માટે કાચો માલ-કાચા પપૈયાંના કટકા કરીને જમીન પર રાખ્યા હતા અને કામદારો ફૂડ હેન્ડલર્સના મેડિકલ સર્ટિફિકેટ રજૂ કર્યું નથી, ઉત્પાદનમાં સ્થળ પર જવાબદાર ટેકનીકલ પર્સન ગેરહાજર છે, તેમજ બેચવાઇઝ ઉત્પાદન અંગેના રજીસ્ટર નિભાવેલ નથી, તેમજ રજૂ કરેલ નથી તેમજ ઉપયોગમાં લેવાતા બોરના પાણીનો રિપોર્ટ પણ રજૂ કર્યો નથી.

આમ સ્થળ પર સંગ્રહ કરેલ જથ્થા પૈકી અનહાઇજેનિક રીતે સંગ્રહ કરેલ ફરમેન્ટેડ પપૈયાંનો તથા જમીન પર રાખેલ કાચા પપૈયાં મળીને અંદાજીત કુલ 20,000 કિ.ગ્રા. (20 ટન) જથ્થો આરોગ્યની દ્રષ્ટિએ માનવ આહાર માટે યોગ્ય ન હોવાનું ફૂડ બિઝનેશ ઓપરેટરે સ્વીકારેલ તેમજ આરોગ્ય અધિકારીની સૂચના મુજબ પેઢીમાં ઉત્પાદન અનહાઈજેનિક કન્ડિશનમાં થતું હોય, જથ્થો જઠખ વિભાગના કોમ્પેકટ વાહન સ્થળ પર લાવી તેના દ્રારા નાશ કરવામાં આવ્યો હતો. આ સાથે જ પેઢીના સ્થળ પરથી ફૂડ સેફ્ટી સ્ટાન્ડર્ડ એક્ટ -2006 મુજબ કુલ 4 નમૂના લેવાની કાર્યવાહી કરવામાં આવી હતી, જેમાં ટૂટી ફ્રૂટી (લુઝ-ગ્રીન), જેલી ક્યુબ્સ (ઓરેન્જ ફ્લેવર-લુઝ), ટૂટી ફ્રૂટી (લુઝ-રેડ), જેલી ક્યુબ્સના નમૂના લેવામાં આવ્યા છે.