સૌરાષ્ટ્રની કેસર કેરીનો સ્વાદ અમેરિકનોના દાઢે વળગ્યો: કેસર સહિતની કેરીની નિકાસ રેકર્ડ સ્તરે

રાજયની કેરી નિકાસ માટે હવે અમદાવાદ નજીક જ કાર્ગો સેન્ટર ઉભુ થતા સરળતા: ગુજરાત એગ્રો દ્વારા નિકાસ પ્રોત્સાહન

સૌરાષ્ટ્રની કેસર કેરીનો સ્વાદ એક વખત જો ‘દાઢે’ વળગી જાય તો પછી ઉનાળાની રાહ જોવા સિવાય ભાગ્યે જ કોઈ વિકલ્પ રહે છે અને આ સીઝનમાં માવઠાનો માર ઝીલીને પણ સૌરાષ્ટ્ર અને ખાસ કરીને તાલાલા-ગીર-જુનાગઢ જીલ્લાની કેસર કેરીનું ઉત્પાદન નવા રેકોર્ડ નોંધાવશે તેની સાથે હવે નિકાસ પણ નવી ઉંચાઈએ જશે તે નિશ્ર્ચિત છે.

ગુજરાત એગ્રો ઈન્ડસ્ટ્રીયલ કોર્પોરેશન લી. જે દેશ વિદેશમાં સૌરાષ્ટ્રની કેસર કેરીના પ્રમોશનમાં મહત્વની ભૂમિકા ભજવે છે તેના આંકડા મુજબ આ વર્ષ કેરીની નિકાસ 45% જેટલી ઉંચી હશે અને આંતરરાષ્ટ્રીય બજારમાં પણ આ કેરીની માંગ સતત વધી રહી છે. જેમાં સાઉદી અરેબીયા અને બ્રિટનમાંથી આ વર્ષ 4.45 મેટ્રીક ટન કેરીની નિકાસના ઓર્ડર છે.

અમેરિકાએ એકલાએજ 65 મેટ્રીક ટન કેરીની નિકાસ આ સીઝનમાં થશે અને તેમાં 55% ગુજરાતનો ફાળો છે. ગુજરાતમાં કેરી પકાવવા માટે હવે આધુનિક પદ્ધતિ રેડીએશન પ્રોસેસીંગને માન્યતા આપી છે અને ગુજરાત એગ્રોએ તે જુલાઈ 2022માં આ સુવિધા સર્જી લીધી હતી જેને અમેરિકાના એગ્રીકલ્ચર એનીમલ પ્લાંટ હેલ્થ ઈન્સ્પેકશનની પણ માન્યતા મળી છે જેના કારણે અમેરિકામાં પણ નિકાસના દ્વાર ખુલી ગયા છે.

આ ઉપરાંત અમદાવાદ નજીક એક નવી કાર્ગો સુવિધા પણ ઉભી કરવામાં આવી છે. જેના કારણે નિકાસ પ્રક્રિયા સરળ બની છે. અત્યાર સુધી આપણે મહારાષ્ટ્રના કાર્ગો મારફત આ નિકાસ કરવી પડતી હતી જે હવે ઘરઆંગણે સુવિધા મળી છે.