નાનો પણ રાઈનો દાણો

તિલકની કંપની સાથે કામ કરવા તેના કાકાએ બેંકની નોકરી છોડી દીધી અને 13 વર્ષનાં ટાબરીયાએ ‘પેપર્સ એન્ડ પાર્સલ્સ’ નામની કંપની શરૂ કરી

તિલક સોમથી શનિ સ્કૂલ જાય છે અને રવિવાર તથા રજાના દિવસોમાં એની કંપની સંભાળે છે : ડબ્બાવાળા ભાઈઓને તાલીમ આપવી, એમના રૂટ નક્કી કરવા જેવી મહત્ત્વની કામગીરી આ કિશોર સંભાળી રહ્યો છે, અત્યારે 300 ડબ્બાવાળા એમની સાથે જોડાયેલા છે અને રોજ 1200 જેટલી ઓફિસમાં કુરિયર પહોંચાડે છે

શૈલેષ સગપરિયા

મુંબઈમાં રહેતો અને 8માં ધોરણમાં અભ્યાસ કરતો તિલક મહેતા એકવાર એના મામાના ઘરે ગયેલો. મામાના ઘરેથી પાછો આવ્યો પણ સાથે લઈ ગયો હતો એ અભ્યાસના કેટલાક પુસ્તક મામાના ઘરે જ ભૂલીને આવ્યો. બીજા દિવસે મામાને ફોન કર્યો કે મારા ભૂલાઈ ગયેલા પુસ્તક મને આજે ને આજે કુરિયર દ્વારા મળી શકે ? મામાએ જવાબ આપ્યો કે બેટા કદાચ આજ ને આજ તો ન મળે આવતીકાલે મળે અને કુરિયરનો ખર્ચ તારા પુસ્તકોની કિંમત કરતા પણ વધી જાય.

આ વાત સાંભળ્યા બાદ તિલકનું મન ચકરાવે ચડયું. સામાન્ય માણસને પોસાય એવા દરથી એ જ દિવસે કુરિયર ન પહોંચાડી શકાય? તિલક એ દિશામાં એ વિચારવા લાગ્યો અને એને મુંબઈના ડબ્બાવાળા યાદ આવ્યાં. રોજ બે લાખથી વધુ લોકોને ડબ્બા પહોંચાડવાનું કામ કરતા ડબ્બાવાળા ભાઈઓની સેવાનો લાભ લેવામાં આવે તો ઓછા ખર્ચે પણ એ જ દિવસે લોકોને કુરિયર પહોંચાડી શકાય.

તિલકે બધી ગણતરીઓ કરી અને 13 વર્ષની ઉંમરના છોકરાને કુરિયર સેવાનો એક મોટો બિઝનેસ દેખાયો. તિલક મુંબઇ ડબ્બાવાળા એસોસિએશનના પ્રમુખ શ્રી સુભાષ તાલેકરને મળ્યો અને પોતાની વાત જણાવી. સુભાષ તાલેકરને પણ લાગ્યું કે તિલકની સાથે જોડાવાથી ડબ્બાવાળા ભાઈઓને થોડી વધુ કમાણી થશે.

તિલકે બેંકમાં નોકરી કરતા એના કાકા ઘનશ્યામભાઈને પોતાનો આઈડિયા શેર કર્યો. ઘનશ્યામભાઈ તો નાણા સાથે કામ કરનારા બેંકર હતા એમને પણ તિલકના વિચારમાં મોટો બિઝનેસ દેખાયો. તિલકની કંપની સાથે કામ કરવા એને બેંકની નોકરી છોડી દીધી અને 13 વર્ષના ટાબરીયાએ ‘પેપર્સ એન્ડ પાર્સલ્સ’ નામની કંપની શરૂ કરી.
તિલક સોમથી શનિ સ્કૂલ જાય છે અને રવિવાર તથા રજાના દિવસોમાં એની કંપની સંભાળે છે. ડબ્બાવાળા ભાઈઓને તાલીમ આપવી, એમના રૂટ નક્કી કરવા જેવી મહત્ત્વની કામગીરી આ કિશોર સંભાળી રહ્યો છે. અત્યારે 300 ડબ્બાવાળા એમની સાથે જોડાયેલા છે અને રોજ 1200 જેટલી ઓફિસમાં કુરિયર પહોંચાડે છે. બે વર્ષમાં 100 કરોડના ટર્નઓવર સુધી પહોંચવાનો એનો ટાર્ગેટ છે.

તિલકની ઉંમરના અને એનાથી પણ મોટા હજુ મોબાઈલ પર પબજી રમવામાંથી નવરા નથી થતા. ભણેલા ગણેલા નોકરી નથી મળતી એવી ફરિયાદો કરે છે, ત્યારે આ 14 વર્ષનો કિશોર પોતાના આગવા વિચારોને અમલમાં મૂકીને એક કંપનીનો માલિક બની ગયો છે.