રાજકોટ જિલ્લા પંચાયતનું 1193 કરોડનું બજેટ રજૂ: શહીદ સૈનિકોના પરિવારની સહાયમાં બમણો વધારો

ઉઉઘએ કારોબારી સમિતિના ચેરમેનને વર્ષ 2026-27નું બજેટ સોંપ્યુ: 27 ફેબ્રુઆરીએ સામાન્ય સભામાં મંજૂર થશે

ખાસ-ખબર ન્યૂઝ રાજકોટ

રાજકોટ જિલ્લા પંચાયતની કારોબારી સમિતિની ખાસ બેઠક આજે મંગળવારે ચેરમેન પી.જી. ક્યાડાના અધ્યક્ષ સ્થાને યોજાઈ હતી. આ બેઠકમાં વર્ષ 2026-27નું કુલ 1193.68 કરોડનું પુરાંતવાળું અંદાજપત્ર ડીડીઓ અનંદુ સુરેશ ગોવિંદે કારોબારી ચેરમેન પી.જી.ક્યાડાને સોંપ્યું હતું. આ અંદાજપત્રમાં સ્વભંડોળના રૂ. 26 કરોડ, રાજ્ય સરકારના અનુદાનના રૂ. 1144.13 કરોડ અને દેવા વિભાગની રૂ. 23.54 કરોડની જોગવાઈનો સમાવેશ થાય છે. માનવીય અભિગમ દાખવતા આ અંદાજપત્રમાં શહીદ સૈનિકોના પરિવારને અપાતી સહાયમાં બમણો વધારો કરવામાં આવ્યો છે. હવેથી શહીદ સૈનિકના પરિવારને રૂ. 1 લાખના બદલે રૂ. 2 લાખની સહાય ચૂકવવામાં આવશે. આ ઉપરાંત, પંચાયત સેવાના વર્ગ-3 અને વર્ગ-4ના કર્મચારીઓના ચાલુ નોકરીએ અવસાનના કિસ્સામાં નાણાકીય સહાય રૂ. 50 હજારથી વધારીને રૂ. 1 લાખ કરવાની જાહેરાત કરવામાં આવી છે. જિલ્લામાં પ્રાકૃતિક ખેતીને પ્રાત્સાહન આપવા માટે જિલ્લા અને તાલુકા કક્ષાએ વેચાણ કેન્દ્રો ઊભા કરવા રૂ. 60 લાખની જોગવાઈ કરાઈ છે. શિક્ષણ ક્ષેત્રે વિચરતી વિમુક્તિ જાતિની દીકરીઓ માટે રૂ. 20 લાખની સહાય અને પ્રાથમિક શાળાઓમાં વિજ્ઞાન મેળા તેમજ રોબોટિક્સ પ્રશિક્ષણ માટે રૂ. 7 લાખ ફાળવવામાં આવ્યા છે. કારોબારી સમિતિ દ્વારા કુલ રૂ. 30.55 કરોડના 40 જેટલા વિકાસકામોને મંજૂરી આપવામાં આવી છે. જેમાં બાંધકામ શાખા દ્વારા રૂ. 20.39 કરોડના ખર્ચે 96 નવી ગ્રામ પંચાયત બિલ્ડિંગ અને 15 આંગણવાડીઓના કામોનો સમાવેશ થાય છે. સિંચાઈ શાખા હેઠળ રૂ. 7.67 કરોડના ખર્ચે ચેકડેમ રિપેરિંગ અને ફ્લડ પ્રોટેક્શન વોલ જેવા 13 કામોને મંજૂરી અપાઈ છે. આ બેઠકમાં જિલ્લા વિકાસ અધિકારી અનંદુ સુરેશ ગોવિંદ, નાયબ જિલ્લા વિકાસ અધિકારી, કારોબારી સમિતિના સભ્યો અને જિલ્લા પંચાયતના વિવિધ શાખાધિકારીઓ ઉપસ્થિત રહ્યા હતા.

જિલ્લા પંચાયતની કારોબારી સમિતિ ₹28 કરોડથી વધુના વિકાસકામોને મંજૂરી

રાજકોટ જિલ્લા પંચાયતની કારોબારી સમિતિની ખાસ બેઠક તાજેતરમાં ચેરમેન પી.જી. ક્યાડાના અધ્યક્ષ સ્થાને યોજાઈ હતી. આ બેઠકમાં જિલ્લાના કુલ 28,09,26,934 (28.09 કરોડ)ના કામોને મંજૂરી આપવામાં આવી છે. જેમાં 55 ગામમાં તલાટી આવાસ અને 39 ગ્રામ પંચાયત બિલ્ડિંગનો સમાવેશ થાય છે. જેમાં રાજકોટ તાલુકાના લાખાપર, વડાળી, બાડપર, રાજગઢ, ગોંડલ તાલુકાના મોટા દડવા, વાસાવડ, નાના મહિકા, ભરૂડી, પીપળીયા, જસદણ તાલુકાના ઝુંડાળા, રાણપરડા, જીવાપર, લાખાવડ, બળધોઈ, લીલાપુર, વાડોદ, કાનપર, જૂના પીપળીયા, ગઢડીયા જામ, રાજાવડલા, કુંઢણી, વેરાવળ(ભા), કોટડા સાંગાણીના પડવલા, હડમતાળા અને નોંઘણચોરા ગામનો સમાવેશ થાય છે. જ્યારે 55 ગામડામાં ગ્રામ પંચાયતની સાથે તલાટી આવાસ પણ બનશે. જેમાં રાજકોટ તાલુકાના પરાપીપળીયા, બેડી-હડમતિયા, જાળીયા, ધમલપર, નાકરાવાડી, ગોંડલ તાલુકાના લીલાખા, દેવચડી, જેતપુર તાલુકાના મોણપર, અકાળા, જૂની સાંકળી, નવી સાંકળી, પાંચ પીપળા, ખીરસરા, જેતલસર, વાડાસડા, બોરડી સમઢીયાળા, જામકંડોરણા તાલુકાના પીપરીયા, ગુંદાસરી, ચરેલ, થોરડી, મેઘાવડ, સાતોદડ, ખજૂરડા, વૈભવનગર, ખાટલી, લોધિકા અને પડધરી તાલુકાના ઢોલરા, ધૂળીયા દોમડા, હડમતિયા(જં), કાંગશીયાળી, નાની-મોટી ચણોલ, પીપળીયા (પાળ), ઉંડ ખીજડીયા, છાપરા, ચીભડા, ખજૂરડી-1, હરીપર (ખારી), દોમડા ભાયુના, ખાખરાબેલા, જીવાપર, વચલી ઘોડી, કેરાળા, વણપરી, રામપર (પાટી), ઉકરડા ગામનો સમાવેશ કરાયો છે.

કેન્દ્રના આદેશનું પાલન: વંદે માતરમના ગાન સાથે બેઠકનો પ્રારંભ

કેન્દ્ર સરકારના ગૃહ મંત્રાલય દ્વારા સરકારી કચેરીઓમાં ’વંદે માતરમ’ના ગાનને ફરજિયાત કરવામાં આવ્યું છે. આ આદેશના અમલીકરણના ભાગરૂપે આજે રાજકોટ જિલ્લા પંચાયત ખાતે મળેલી કારોબારી સમિતિની ખાસ બેઠકમાં એક નવી પરંપરા જોવા મળી હતી. બેઠકની વિધિવત શરૂઆત રાષ્ટ્રીય ગીત ‘વંદે માતરમ’ ના સમૂહ ગાન સાથે કરવામાં આવી હતી.