રશિયા યુક્રેન યુદ્ધ વચ્ચે પ્રધાનમંત્રી મોદી યુક્રેનના પ્રવાસે, 23 ઓગસ્ટે ઝેલેન્સકી સાથે કરશે મુલાકાત

30 વર્ષ બાદ ભારતીય વડાપ્રધાન પહેલીવાર જશે યુક્રેન

યુક્રેને એક નિવેદન જારી કરીને કહ્યું કે દ્વિપક્ષીય સહયોગના મુદ્દાઓ પર ચર્ચા કરવામાં આવશે. આ પહેલા પીએમ બે દિવસની મુલાકાતે પોલેન્ડ જશે. જ્યાં તેઓ ભારતીય સમુદાયના લોકોને સંબોધિત કરશે.

વડાપ્રધાન નરેન્દ્ર મોદી 23 ઓગસ્ટે યુક્રેનની મુલાકાત લેશે. 30 વર્ષ પછી કોઈ ભારતીય વડાપ્રધાન અહીં આવશે. આ પહેલા પીએમ મોદી 21 થી 22 ઓગસ્ટ સુધી પોલેન્ડ જશે. 45 વર્ષ પછી કોઈ ભારતીય PM પોલેન્ડ જશે. પીએમ મોદીની યુક્રેનની મુલાકાત રશિયાના રાષ્ટ્રપતિ વ્લાદિમીર પુતિન સાથે મોસ્કોમાં મુલાકાતના એક મહિના બાદ થઈ રહી છે.

પીએમ યુક્રેન પહેલા પોલેન્ડ પ્રવાસ પર હશે

વડાપ્રધાન નરેન્દ્ર મોદી 21 અને 22 ઓગસ્ટના રોજ પોલેન્ડમાં હશે. જ્યાં તેઓ ભારતીય સમુદાયના લોકો અને અહીંના વેપારીઓ સાથે વાત કરશે. પીએમ મોદી પોલેન્ડમાં એવા સ્મારકોની મુલાકાત લેશે જે જામનગર અને કોલ્હાપુરના ઐતિહાસિક સંબંધોને તેમના મૂળ સાથે પ્રતિબિંબિત કરે છે. વિદેશ મંત્રાલયે કહ્યું કે ભારત હંમેશા યુક્રેનમાં યુદ્ધના ઉકેલ માટે કૂટનીતિ અને વાતચીતની હિમાયત કરતું આવ્યું છે જેથી કાયમી શાંતિ સ્થાપિત થઈ શકે.

યુક્રેને સત્તાવાર નિવેદન જારી કર્યું

રાષ્ટ્રપતિ વોલોડીમિર ઝેલેન્સકીના કાર્યાલયે પીએમ મોદીની યુક્રેનની મુલાકાત અંગે સત્તાવાર નિવેદન બહાર પાડ્યું છે. નિવેદનમાં જણાવવામાં આવ્યુ હતુ કે અમારા દ્વિપક્ષીય સંબંધોના ઈતિહાસમાં ભારતીય વડાપ્રધાનની યુક્રેનની આ પ્રથમ મુલાકાત છે. મુલાકાત દરમિયાન દ્વિપક્ષીય અને બહુપક્ષીય સહયોગના મુદ્દાઓ પર ચર્ચા કરવામાં આવશે. ખાસ કરીને યુક્રેનિયન રાષ્ટ્રપતિ વોલોડીમિર ઝેલેન્સકી સાથે. એવી પણ અપેક્ષા છે કે યુક્રેન અને ભારત વચ્ચે ઘણા દસ્તાવેજો પર હસ્તાક્ષર થશે.

વડાપ્રધાન નરેન્દ્ર મોદીની આ મુલાકાત, જે 1991માં યુક્રેન સ્વતંત્ર થયા બાદ ભારતીય વડાપ્રધાનની પ્રથમ મુલાકાત હશે. ગયા મહિને રાષ્ટ્રપતિ વોલોડીમિર ઝેલેન્સકીના ચીફ ઓફ સ્ટાફ એન્ડ્રે યેરમાકે કહ્યું હતું કે પીએમ મોદી યુક્રેનમાં શાંતિ સ્થાપવામાં મહત્વની ભૂમિકા ભજવી શકે છે. વર્ષ 2022 માં યુદ્ધ પછી ભારતે રશિયા અથવા રશિયન અધિકારીઓની નિંદા કરવાનો ઇનકાર કર્યો હતો, જેના કારણે પશ્ચિમના ઘણા દેશોએ ભારતને નિશાન બનાવ્યું હતું.

વડા પ્રધાન મોદીની મોસ્કોની મુલાકાત 9-10 જુલાઈ વચ્ચે યોજાયેલી નાટો સમિટ સાથે સુસંગત છે. સમિટમાં, યુ.એસ. અને નાટો સહયોગીઓ રશિયાનો સામનો કરવા માટે યુક્રેનને સમર્થન વધારવા પર એક થયા. તે સમયે અમેરિકાએ પણ રશિયા સાથે ભારતના સંબંધો અંગે ચિંતા વ્યક્ત કરી હતી.