પાકિસ્તાનનો ખેલ ખતમ

ભારતે 65 વર્ષ જૂનો સિંધુ જળકરાર અટકાવ્યો, પાકિસ્તાની નાગરિકોના વિઝા રદ, અટારી સરહદ બંધ: ભારતના 5 મોટા નિર્ણયોથી પાકિસ્તાન વીજળી-અનાજ-પાણી માટે તરસશે

ખાસ-ખબર ન્યૂઝ નવી દિલ્હી

પહેલગામ હુમલાના બીજા દિવસે, ભારતે તેના માટે પાકિસ્તાનને જવાબદાર ઠેરવ્યું છે. પીએમ નરેન્દ્ર મોદીની અધ્યક્ષતામાં મળેલી બેઠકમાં ભારતે પાકિસ્તાનને પાઠ ભણાવવા માટે 5 મોટા નિર્ણયો લીધા છે. આમાં, 65 વર્ષ જૂની સિંધુ જળ સંધિને અટકાવી દેવામાં આવી છે. અટારી ચેકપોસ્ટ બંધ કરી દેવામાં આવી છે. વિઝા સસ્પેન્ડ કરવામાં આવ્યા છે અને ઉચ્ચ કમિશનરોને હટાવવામાં આવ્યા છે.

પાકિસ્તાનમાં પાણીનું સંકટ સર્જાશે
પાકિસ્તાનની 80% ખેતીલાયક જમીન, આશરે 1.6 કરોડ હેક્ટર, સિંધુ નદી પ્રણાલીના પાણી પર આધાર રાખે છે. આ પાણીનો 93% ઉપયોગ સિંચાઈ માટે થાય છે, જે ઘઉં, ચોખા, શેરડી અને કપાસ જેવા પાકોને ટેકો આપે છે. ભારત પાણીનો પ્રવાહ ઘટાડવા જઈ રહ્યું છે. આનાથી પાકિસ્તાનના પાક ઉત્પાદનમાં ભારે ઘટાડો થઈ શકે છે, જેના કારણે ગ્રામીણ વિસ્તારોમાં ખાદ્ય અસુરક્ષા અને આર્થિક અસ્થિરતા સર્જાઈ શકે છે. પાકિસ્તાનની રાષ્ટ્રીય આવકમાં કળષિ ક્ષેત્રનો ફાળો 23%છે અને તે ગ્રામીણ વસ્તીના 68% ભાગનું ગુજરાન ચલાવે છે.

લાઈટ પણ બંધ થઈ જશે
પાકિસ્તાનના મુખ્ય જળવિદ્યુત મથકો, જેમ કે તારબેલા અને મંગલા, સિંધુ નદી પ્રણાલીના પાણી પર આધાર રાખે છે. પાણીના પ્રવાહમાં અવરોધ આવવાથી વીજળીનું ઉત્પાદન ઘટી શકે છે, જેના કારણે ઉદ્યોગો અને ઘરોમાં ઊર્જા સંકટ સર્જાય છે. આનાથી પાકિસ્તાનની અર્થવ્યવસ્થા વધુ નબળી પડશે, જે પહેલાથી જ ઊંચા ફુગાવા અને દેવાના સંકટનો સામનો કરી રહી છે.સંરક્ષણ સલાહકારોને પણ પાછા બોલાવ્યા

પાકિસ્તાનના સંરક્ષણ સલાહકારોને હટાવવાની સાથે, ભારત ઇસ્લામાબાદ સ્થિત ભારતીય ઉચ્ચાયોગમાંથી તેના લશ્ર્કરી, નૌકાદળ અને હવાઈ સલાહકારોને પણ પાછા ખેંચશે. સંબંધિત હાઇ કમિશનમાં આ જગ્યાઓ રદ ગણવામાં આવશે.

વિઝા સેવા સાથે, આતંકવાદીઓનો પ્રવેશ પણ અટકશે
ભારતે પાકિસ્તાનીઓ માટે વિઝા પર પ્રતિબંધ મૂક્યો છે. એટલું જ નહીં, પાકિસ્તાનના લોકો સાર્ક વિઝા મુક્તિ યોજના હેઠળ પણ ભારત આવી શકશે નહીં. આ નિર્ણયથી પાકિસ્તાનના ઘણા લોકોના સંબંધીઓ ભારતમાં છે. આવી પરિસ્થિતિઓમાં, ઘણી વખત પાકિસ્તાની લોકો સગાં તરીકે ભારત આવે છે. આ ઉપરાંત, તેઓ ધાર્મિક પ્રવાસોના બહાને ભારત આવે છે અને આતંકવાદી હુમલાઓ કરે છે. આવી સ્થિતિમાં, વિઝા સેવા બંધ થવાને કારણે, આતંકવાદીઓના ભારત આવવાનો માર્ગ પણ બંધ થઈ જશે. નોંધનીય છે કે, હાલ જે પાકિસ્તાનના નાગરીકો ભારતમાં છે તેમને 48 કલાકમાં પરત ફરવાનો આદેશ કરાયો છે.