ખાસ-ખબર સંવાદદાતા
વાંકાનેર તાલુકાના જાલસીકા ગામ નજીક આવેલ મચ્છુ-1 ડેમ અંતે આજે છલકાઈ ગયો છે. ઉપરવાસમાં સારા વરસાદને પગલે છેલ્લા અઠવાડિયાથી મચ્છુ ડેમમાં નવા નીરની સતત આવક ચાલુ હોવાથી ડેમ ઓવરફ્લો થયો છે અને ડેમના હેઠવાસના 24 ગામના લોકોને નદીના પટ્ટમાં અવર જવર નહીં કરવા સૂચના આપવામાં આવી છે. વાંકાનેર તાલુકાના જાલસીકા નજીક આવેલ મચ્છુ-1 ડેમમાં ઉપરવાસના સારા વરસાદને કારણે નવા નીરની સારી એવી આવક થઈ રહી છે.
જેથી હાલમાં મચ્છુ-1 ડેમ સંપૂર્ણ ભરાઈ જતા ડેમ ઓવરફ્લો થયો હોય વાંકાનેર તાલુકાના હોલમઢ, જાલસીકા, વાંકાનેર-શહેર, મહિકા, કોઠી, ગારીયા, જોધપર, પાજ, રસીકગઢ, લુણસરીયા, કેરાળા, હસનપર, પંચાસર, વઘાસીયા, રાતીદેવળી, વાંકીયા, રાણેકપર, પંચાસીયા, ઢુવા ધમલપર તેમજ મોરબી તાલુકાના અદેપર, મકનસર, લખધીરનગર અને લીલાપર ગામના લોકોને નદીના પટ્ટમાં અવરજવર નહીં કરવા ચેતવણી આપવામાં આવી છે.
