વેરાવળમાં માછીમાર સાથે છેતરપિંડી કરતી ગેંગનો પર્દાફાશ

 ત્રણ શખ્સોને ઝડપી લેતી ક્રાઇમ બ્રાન્ચ
ખાસ-ખબર સંવાદદાતા
વેરાવળના માછીમારને બજાર ભાવ કરતા 20 રૂપીયા સસ્તુ ડીઝલ આપાવીની લાલચ આપી રૂ.4 લાખની છેતરપીંડી આચરતી ગેંગનો પર્દાફાશ ક્રાઇમ બ્રાન્ચે કર્યો હતો ઉનાના અને જાફરાબાદના ત્રણ શખ્સો ની ઝડપી પડ્યા જ્યારે ગેંગનાઅન્ય પાંચ શખ્સોને પકડવા માટે પોલીસે ચક્રો ગતિમાન કર્યા છે. આ ગેંગના સભ્યો માછીમાર સાથે ખોટા વ્યક્તિઓના નામે વાતો કરી સસ્તુ ડીઝલ ખરીદવા માટે ત્રાહિત બે વ્યક્તિઓના મુંબઈ અને બિહારના કીશનગઢ ખાતેના બેંક ખાતાઓમાં 4 લાખની રકમ ટ્રાન્સફર કરાવી યુપીઆઈ ટ્રાન્ઝેક્શન મારફત ઉપાડી લઈ છેતરપીંડી આચરતા હોવાનું એલસીબીની તપાસમાં સામે આવ્યું હતું
આ અંગે પોલીસમાંથી પ્રાપ્ત વિગતો મુજબ વેરાવળ બંદરમાં ત્રણ ફિશીંગ બોટોના માલીક કિશોર બચુ જુંગી સાથે છેતરપિંડી થઈ હોવાની ફરિયાદ નોંધાઈ હતી.
પોલીસે ગુનો નોંધીને અકરમ જાવીદ શેખ, ઈસ્માઈલ દાઉદ ગઢીયા બંન્ને રહે. ઉના, ઈરફાન રહેમાન મન્સુરી રહે. જાફરાબાદ વાળાની ધરપકડ કરી હતી જ્યારે ગેંગના અન્ય પાંચ સાગરીતોને ઝડપી પાડવા પોલીસે તપાસ હાથ ધરી છે.
આ અંગે એલસીબીના પીઆઈ એ.એસ.ચાવડા, પીએસઆઈ વી.કે.ઝાલાના જણાવ્યા મુજબ, માછીમારોને સસ્તા ભાવે ડીઝલ આપવાની લાલચ આપી છેતરપીંડી આચરતી ગેંગ બોટ માલીક માછીમારોને જુદા જુદા ડમી મોબાઇલ નંબરોમાંથી ખોટું નામ ધારણ કરી તેઓને બજારભાવ કરતા વીસ રૂપીયા ઓછા ભાવે સસ્તામાં ડીઝલ આપવાની લાલચ આપતા હતા. ડીલ નક્કી થયા બાદ માછીમારો પાસેથી ગુજરાત બહારની બેંકોમાં એકાઉન્ટ ધારકોના ખાતામાં કમિશન આપી રૂપીયા જમા કરાવડાવતા હતા. બાદમાં આવા ખાતાઓમાંથી યુ.પી.આઇ. ટ્રાન્ઝેક્શનથી થર્ડ પાર્ટી જેવા કે, દુધનો વેપાર, નાની લારી ગલ્લા વાળાઓનાના ખાતામાં રૂપીયા ટ્રાન્સફર કરાવી પોતાની પાસે એ.ટી.એમ. કાર્ડ ન હોય તેવા બહાના બતાવી તેઓની પાસેથી રોકડ રકમ મેળવી છેતરપીંડી આચરવાનું સુવ્યવસ્થિત નેટવર્ક ચલાવતા હતા.
આ ગેંગના સભ્યો ડમી નંબરોમાંથી માછીમારોને કોલ કરવા માટે સુવ્યવસ્થિત રીતે અમરેલી જિલ્લાના જાફરાબાદ આસપાસ ગેરકાયદેસર કોલ સેન્ટર ઉભુ કરી ચલાવતા હોવાની માહિતી પોલીસને તપાસમાં મળી છે. આવી છેતરપીંડીનો ભોગ મહારાષ્ટ્રના મુંબઈથી લઈને ગુજરાતના જખ્ખો બંદર સુધીની દરીયાઈ પટ્ટીમાં વસતા અનેક માછીમારો બન્યા હોવાની માહિતી સામે આવી રહી છે.
ત્યારે આવી રીતે કોઈ માછીમાર સાથે સસ્તા ભાવે ડીઝલ કે મચ્છી બાબતે છેતરપીંડી થઈ હોય તો આધાર પુરાવા સાથે પોલીસનો સંપર્ક કરવા અપીલ કરી છે.