ગુજરાતી મીડિયાના ઈતિહાસમાં સૌ પ્રથમવાર ગુજરાત ફર્સ્ટનું અભૂતપૂર્વ કદમ

પોતાના તમામ કર્મચારીઓને આપ્યું પરિવારનું બિરૂદ; કર્મચારીઓ
માટે અનોખી લોયલ્ટી યોજના

કર્મચારીઓને મળશે લોયલ્ટી ગોલ્ડન કાર્ડ; લોયલ્ટી ગોલ્ડન કાર્ડધારકને મળશે અસંખ્ય લાભ

ખાસ-ખબર ન્યૂઝ નવી દિલ્હી, તા.3

ગુજરાતી મીડિયામાં ગુજરાત ફર્સ્ટ હંમેશા પાથબ્રેકિંગ નિર્ણયો લેવા માટે જાણીતું છે. ગુજરાત ફર્સ્ટે હવે મીડિયા ઈન્ડસ્ટ્રીમાં ક્યારેય ન બન્યું હોય તેવું અભૂતપૂર્વ કદમ ઉઠાવ્યું છે. ગુજરાત ફર્સ્ટે પોતાના તમામ કર્મચારીઓને પરિવારનું બિરૂદ આપ્યું છે. ગુજરાત ફર્સ્ટે પોતાના તમામ કર્મચારી માટે લોયલ્ટી ગોલ્ડન કાર્ડ યોજનાની જાહેરાત કરી છે. આ યોજના અંતર્ગત કર્મચારીઓને દર વર્ષે નિશ્ચિત ઈન્ક્રીમેન્ટ તો અપાશે જ તે ઉપરાંત કાર્ડધારક કર્મચારીને વર્ષે સેલરીના 100 ટકા સુધીનું બોનસ આપવામાં આવશે.

આ ઉપરાંત ઈમરજન્સી સંજોગોમાં કર્મચારીઓને વ્યાજે નાણાં ન લેવા પડે તે માટે 50 હજારની ઈન્સ્ટન્ટ લોન કોઈપણ વ્યાજ વિના આપવામાં આવશે. સામાન્યત: કર્મચારીઓને અપાતા હેલ્થ ઈન્સ્યોરન્સનું પ્રિમિયમ તેમની સેલેરીમાંથી કપાતું હોય છે પરંતુ ગુજરાત ફર્સ્ટના દરેક કર્મચારીને અને તેના પરિવારને 2 લાખ સુધીનો હેલ્થ ઈન્સ્યોરન્સ કોઈપણ શુલ્ક વિના આપવામાં આવશે.

ઉપરાંત અનિવાર્ય સંજોગોમાં કાર્ડધારક કર્મચારીને 15 દિવસની વધારાની એડવાન્સ લીવનો લાભ પણ આપવામાં આવશે. કોઈપણ કર્મચારીનું ચાલુ ફરજ દરમિયાન મૃત્યુ થાય તો પરિવારના ખાતામાં સીધા 5 લાખ રૂપિયા ટ્રાન્સફર કરવાની જોગવાઇ પણ આ યોજના અંતર્ગત કરાઇ છે. આ યોજનાના આકર્ષણનું વધુ એક પાસું એ છે કે વિશેષ કાર્ય કરનારા કર્મચારીઓને ક્રેડિટ પોઈન્ટ્સના આધારે 1 લાખ રૂપિયાના કેશ રિવોર્ડ્ઝ પણ આપવામાં આવશે.