વ્યંઢળોનો આતંક: નગ્ન કરી, માર મારી વિડીયો રેકોર્ડ કર્યાનો ટ્રાન્સજેન્ડરનો આક્ષેપ

 ભાવિકા ઉર્ફે સેન્ડી અને મીરાં ઉર્ફે ફટાકડી નામની કિન્નરે છેલ્લાં બે મહિનાથી નાણાંવટી ચોક પાસેના કવાર્ટરમાં ટ્રાન્સજેન્ડર ચાર્મી મકવાણાને બંધક બનાવી હતી

35થી 40 જેટલા કિન્નરોએ ટ્રાન્સજેન્ડરના ઘરે પહોંચી ધમાલ મચાવી જાનથી મારી નાખવાની ધમકી આપી

ખાસ-ખબર સંવાદદાતા
શહેરમાં કિન્નરોનો આતંક વધ્યો છે કાયદા-કાનૂનનો ડર રાખ્યા વિના ટ્રાન્સજેન્ડરને માર મારવાનો બીજો બનાવ સામે આવ્યો છે જેમાં સામા કાંઠે રહેતા ટ્રાન્સજેન્ડર ચાર્મી મકવાણાને કિન્નરોએ સાથે મળી મોરબી રોડ પર નગ્ન કરીને માર મારી વીડિયો રેકોર્ડ કર્યો હતો ત્યારબાદ 35થી 40 જેટલા કિન્નરો આ ટ્રાન્સજેન્ડરના ઘરે પહોંચી ધમાલ મચાવી ટ્રાન્સજેન્ડર તેમજ તેના પરિવારને જાનથી મારી નાખવાની ધમકી આપી હતી જેથી ટ્રાન્સજેન્ડર તથા તેનો પરિવાર આ બનાવ અંગેની જાણ કરવા સી.પી. કચેરી ખાતે પહોંચી આવ્યો હતો અને આ કિન્નરો ઉપર આકરા પગલાં લેવામાં આવે ઉપરાંત તેને પોલીસ પ્રોટેકશન મળે તેવી માગણી પોલીસ કમિશનર સમક્ષ કરી હતી.

ટ્રાન્સજેન્ડર ચાર્મી મકવાણાએ જણાવ્યું હતું કે કિન્નરો તેની પાસેથી જબરદસ્તી બજારમાં પૈસા માંગવા લઈ જતા હતા. તો સાથે જ કિન્નરો દ્વારા ચાર્મીને માનસિક અને શારીરિક ત્રાસ પણ આપવામાં આવતો હતો. ઘરની બહાર કોઈ વસ્તુ લેવા પણ જવા માટે ચાર્મી સાથે કાયમ એક કિન્નર રહેતા હતા. કિન્નરોનું એવું કહેવું હતું કે, ચાર્મી મકવાણા જે ટ્રાન્સજેન્ડર છે તે તેમની સાથે રહે અને કમાયને આપે. પરંતુ આ વાત જ્યારે ચાર્મીએ નકારી તેને લઈને કિન્નરો દ્વારા તેને શારીરિક અને માનસિક ત્રાસ આપવાનું શરૂ કર્યું જેથી ચાર્મી આ કિન્નરોના ચુંગાલમાંથી ભાગી પોતાના ઘરે પહોંચી ગઈ હતી તેથી આ કિન્નરો ચાર્મીના ઘર પર તોડફોડ પણ કરી હતી. અગાઉ પણ પાયલ રાઠવા નામની ટ્રાન્સજેન્ડર વુમન પર કિન્નરોએ હુમલો કર્યો હતો. પોલીસ કમિશનર કચેરી ખાતે રજુઆત કરવા માટે પાયલ રાઠવા પણ જોડાઇ હતી. તેણે જણાવ્યું હતું કે, મારી સાથે પણ આવું જ થયું હતું. નગ્ન અવસ્થામાં મારો વીડિયો ઉતાર્યો હતો. મને માર માર્યો હતો. આથી મે એ લોકો પર એફઆઇઆર પણ દાખલ કરી હતી. ત્યારબાદ મારી સમક્ષ તે લોકોએ માફી માગી હતી. આથી તે વખતે મેં તેઓને કહ્યું હતું કે, હવે રાજકોટની કોઇ ટ્રાન્સજેન્ડર સાથે આવું વર્તન કરશો નહીં. જેને લઇને આજરોજ ટ્રાન્સજેન્ડર ચાર્મી મકવાણા અને તેના પરિવારના લોકો તેમજ પાયલ રાઠવાએ સાથે મળીને પોલીસ કમિશનર કચેરી ખાતે આવેદનપત્ર પાઠવી ન્યાયની માંગ કરી છે.