‘ચૂંટણી જંગ’: 8.25 લાખ મતદાર, 1010 મતદાન મથક અને 2138 EVM સાથે તંત્ર તૈયાર

જૂનાગઢ જિલ્લામાં પંચાયત – નગરપાલિકાની ચૂંટણી માટે વહીવટી તંત્ર સજ્જ

જિલ્લા પંચાયતના ઉમેદવાર માટે 6 લાખ અને તાલુકા પંચાયત માટે 3 લાખની લિમિટ નક્કી

ખાસ-ખબર ન્યૂઝ જૂનાગઢ, તા.29

જૂનાગઢ જિલ્લા ચૂંટણી અધિકારી અને કલેક્ટર અનિલકુમાર રાણાવસિયાએ સ્થાનિક સ્વરાજ્યની ચૂંટણી સંદર્ભે જાણકારી આપતા જણાવ્યું હતું, જિલ્લા પંચાયતની 30, જિલ્લાની તમામ 9 તાલુકા પંચાયતની 158, કેશોદ નગરપાલિકાની 9 વોર્ડની 36 બેઠકોની સામાન્ય ચૂંટણી અને બાંટવા નગરપાલિકાના એક બેઠકની પેટા ચૂંટણી યોજવા માટે જરૂૂરી તૈયારીઓ પૂર્ણ કરી દેવામાં આવી છે અને તા.26મી એપ્રિલના રોજ મતદાન પ્રક્રિયા માટે જિલ્લા ચૂંટણી તંત્ર સંપૂર્ણ સજ્જ છે.
જિલ્લા ચૂંટણી અધિકારીએ સ્થાનિક સ્વરાજ્યની ચૂંટણીઓ સંદર્ભે જાણકારી આપતા જણાવ્યું હતું કે, આ સ્થાનિક સ્વરાજ્યની ચૂંટણીઓમાં કુલ 8.25 લાખથી વધુ મતદારો પોતાના મતાધિકારનો ઉપયોગ કરશે. જેમાં જિલ્લા- તાલુકા પંચાયતના કુલ 7, 71,029 અને કેશોદ નગરપાલિકાના 53,495 મતદારો ઉપરાંત બાંટવા નગરપાલિકાની પેટા ચૂંટણીના 1262 મતદારોનો સમાવેશ થાય છે. તેમણે એમ પણ ઉમેર્યું કે, આ સમગ્ર ચૂંટણી માટે 1010 મતદાન મથકો પર મતદાન થશે. જેમાં જિલ્લા- તાલુકા પંચાયતના 950 અને નગરપાલિકાના 60 મતદાન મથકોનો સમાવેશ થાય છે. જિલ્લા કલેક્ટર દ્વારા તા.26મી એપ્રિલે તમામ મતદારોને લોકશાહીના આ પર્વમાં ઉત્સાહભેર ભાગ લઈ અચૂક મતદાન કરવા અપીલ કરી હતી. આ સ્થાનિક સ્વરાજ્યની ચૂંટણી માટે સવારે 7 કલાકે થી સાંજના 6 કલાક દરમિયાન મતદાન કરી શકાશે.
જિલ્લા કલેક્ટરે જણાવ્યું કે, આજથી ઉમેદવારી પત્રો ભરવાની શરૂૂઆત થઈ ચૂકી છે, ઉમેદવારી પત્ર ભરવાની છેલ્લી તા. 11 એપ્રિલ, ઉમેદવારી પત્રો ચકાસણીની તા.13 એપ્રિલ અને ઉમેદવારોએ પોતાના નામાંકન પરત ખેંચવાની તા.15 એપ્રિલ છે. ત્યારબાદ તા.26મી એપ્રિલે મતદાન અને તા.28 એપ્રિલના રોજ મત ગણતરી થશે. આ સ્થાનિક સ્વરાજ્યની ચૂંટણીમાં રાજ્ય ચૂંટણી આયોગના નિર્દેશો મુજબ જિલ્લા પંચાયતના ઉમેદવાર 6 લાખ, તાલુકા પંચાયતના ઉમેદવાર 3 લાખની મર્યાદામાં ચૂંટણી પ્રચાર માટે ખર્ચ કરી શકશે, કેશોદ નગરપાલિકાના ઉમેદવાર 2.25 લાખની મર્યાદામાં ચૂંટણી ખર્ચ કરી શકશે. જિલ્લા તથા તાલુકા પંચાયતની ચૂંટણી માટે ઇવીએમ દ્વારા ચૂંટણી પ્રક્રિયા થવાની છે. આ માટે રિઝર્વ સહિત 2138 બી. યુ. (બેલેટ યુનિટ) અને તેટલા જ સી. યુ. (કંટ્રોલ યુનિટ) ઉપલબ્ધ છે. તેવી રીતે કેશોદ નગરપાલિકાની સામાન્ય ચૂંટણી અને બાંટવા નગરપાલિકાની એક બેઠકની પેટા ચૂંટણી માટે 81 સી.યુ. અને અને 162 બી.યુ. ઉપલબ્ધ છે. જિલ્લા કલેકટરે જણાવ્યું કે, જિલ્લા પંચાયતની ચૂંટણીમાં વર્ગ-1ના અધિકારીઓ ચૂંટણી અધિકારી તરીકે અને વર્ગ-2ના મદદનીશ ચૂંટણી અધિકારી તરીકે ફરજ બજાવશે. તાલુકા પંચાયત ચૂંટણીમાં વર્ગ-2ના અધિકારી ચૂંટણી અધિકારી રહેશે અને વર્ગ-3ના મદદનીશ ચૂંટણી અધિકારી તરીકે ફરજ બજાવશે. આ સ્થાનિક સ્વરાજ ચૂંટણી સંદર્ભે જિલ્લા પોલીસ વડા સુબોધ ઓડેદરા અને નિવાસી અધિક કલેકટર સુશ્રી બી.એસ. બારડ ઉપસ્થિત રહ્યા હતા.

પ્રથમ દિવસે પંચાયત અને પાલિકાના જંગ માટે 317થી વધુ ઉમેદવારી ફોર્મ ઉપડ્યા

જૂનાગઢ જિલ્લામાં ચૂંટણી જંગમાં તા.06/04/2026ના રોજ જિલ્લા પંચાયત ચૂંટણીમાં ઉમેદવારી માટે કુલ – 59 ફોર્મ ઉપડ્યા હતા જયારે તાલુકા પંચાયતની ચૂંટણીમાં ઉમેદવારી માટે કુલ – 242 ફોર્મ તથા નગર પાલિકાની ચૂંટણીમાં ઉમેદવારી માટે કુલ – 16 ફોર્મ ચૂંટણી અધિકારીઓની કક્ષાએથી વિતરણ કરવામાં આવ્યા હતા આમ હવે સ્થાનિક સ્વરાજની ચૂંટણીમાં ધીરે ધીરે ગરમાવો જોવા મળી રહ્યો છે. અને ચૂંટણીમાં પોતાની દાવેદારી કરવા ફોર્મ ઉપાડવાનું શરુ થયું છે.