વ્યાજખોરોની દાદાગીરી: રૂપિયા 2.5 લાખની લોન સામે 30 લાખની ધમકી

મકનસરમાં યુવાન પાસેથી કોરા ચેક પડાવી ડબલ વ્યાજખોરીનો પ્રયાસ: 15 લાખનો ચેક બેંકમાં નાખતા ફરિયાદ

ખાસ-ખબર ન્યૂઝ મોરબી, તા.14
મોરબી તાલુકાના મકનસર ગામમાં એક યુવાન પાસેથી ઊંચા વ્યાજે લીધેલી રકમ પરત ચૂકવાઈ ગયા બાદ પણ કોરા ચેકનો દુરુપયોગ કરી ₹30 લાખની બળજબરીથી ઉઘરાણી કરવાનો પ્રયાસ થતાં ચકચાર મચી ગઈ છે. મકનસરના અમિતભાઈ વિનોદભાઈ વાડોલીયા (ઉં.વ. 26) એ આ મામલે દિલીપ ઉર્ફે ભગવાનભાઈ આલ, ઈમરાન અને અન્ય ત્રણ અજાણ્યા ઈસમો વિરુદ્ધ મોરબી તાલુકા પોલીસ મથકમાં ફરિયાદ નોંધાવી છે.

ફરિયાદ મુજબ, અમિતભાઈએ ચારેક મહિના પૂર્વે ધંધા માટે દિલીપ આલ પાસેથી 30 ટકાના વ્યાજે ₹2.50 લાખ લીધા હતા અને સિક્યુરિટી પેટે બે કોરા ચેક આપ્યા હતા. પાછળથી મુદ્દલ રકમ પરત ચૂકવી દેવા છતાં, દિલીપ આલે ’ખોવાઈ ગયા છે’ કહીને ચેક પરત આપ્યા નહોતા અને આ ચેક ઈમરાનને આપ્યા હતા. ઈમરાને અવારનવાર ફોન કરીને ₹30 લાખની માંગણી શરૂ કરી અને ઘરે આવી ગાળો આપી જાનથી મારી નાખવાની ધમકી આપી હતી. તાજેતરમાં, આરોપીઓમાંથી કોઈએ ₹15,51,000 નો ચેક ખાતામાંથી ઉપાડવા માટે બેંકમાં નાખતાં આ સમગ્ર કૌભાંડનો પર્દાફાશ થયો હતો. મોરબી તાલુકા પોલીસે આર્મ્સ એક્ટ અને ધમકીની કલમો હેઠળ ગુનો નોંધી તપાસ હાથ ધરી છે.