BCCI વિશ્વનું સૌથી ધનિક ક્રિકેટ બોર્ડ બન્યું: મંત્રી પંકજ ચૌધરીએ રાજ્યસભામાં આપી માહિતી

પાંચ વર્ષમાં 4200 કરોડનો ટેકસ ચૂકવ્યો: શિવ સેના (ઉદ્ધવ જૂથ) ના સાંસદ અનિલ દેસાઈના પ્રશ્ન પર કેન્દ્રીય મંત્રી પંકજ ચૌધરીએ આપ્યા જવાબ

બોર્ડ ઓફ કંટ્રોલ ફોર ક્રિકેટ ઈન ઈન્ડિયા (BCCI) એ વિશ્વનું સૌથી ધનિક ક્રિકેટ બોર્ડ છે અને તેણે કમાણીની બાબતમાં ફરી એકવાર પોતાનું વર્ચસ્વ દર્શાવ્યું છે. BCCIએ પાંચ વર્ષમાં 27,000 કરોડ રૂપિયાથી વધુની કમાણી કરી છે. નાણાકીય વર્ષ 2018-2022ના પાંચ વર્ષ દરમિયાન, BCCIને કુલ 27,411 કરોડ રૂપિયાથી વધુની આવક થઈ છે. નાણા રાજ્ય મંત્રી પંકજ ચૌધરીએ રાજ્યસભામાં આ માહિતી આપી છે.

રાજ્યસભામાં માહિતી આપતા મંત્રી પંકજ ચૌધરીએ કહ્યું કે BCCIને આ આવક ઈન્ટરનેશનલ ક્રિકેટ કાઉન્સિલ (ICC)ના મીડિયા અધિકારો, સ્પોન્સરશિપ અને રેવન્યુ શેર દ્વારા પ્રાપ્ત થઈ છે. પંકજ ચૌધરીએ શિવસેના (ઉદ્ધવ ઠાકરે જૂથ) સાંસદ અનિલ દેસાઈના પ્રશ્નના જવાબમાં આ માહિતી આપી હતી. અનિલ દેસાઈએ સંસદમાં પ્રશ્ન પૂછ્યો હતો કે શું કેન્દ્ર સરકારને એ વાતની જાણ છે કે BCCI વિશ્વની બીજી સૌથી ધનિક રમત સંસ્થા છે? આ સિવાય તેમણે સરકારને છેલ્લા પાંચ વર્ષમાં બીસીસીઆઈની આવક, ખર્ચ અને ટેક્સની વિગતોની માહિતી આપવા પણ વિનંતી કરી. સરકાર વૈશ્વિક સ્તરે રમતગમત સંસ્થાઓની નાણાકીય સ્થિતિ અંગેનો ડેટા જાળવી શકતી નથી, પરંતુ તેમણે BCCIનો ડેટા ઉપલા ગૃહ એટલે કે રાજ્યસભા સાથે શેર કર્યો છે.

ટેક્સ ભરવામાં પણ BCCI મોખરે :
બીસીસીઆઈએ પણ આ પાંચ વર્ષમાં સારો એવો ટેક્સ ચૂકવ્યો છે અને તેનો આંકડો 4298 કરોડ રૂપિયા રહ્યો છે. બીસીસીઆઈએ આ પાંચ વર્ષમાં 15,170 કરોડ રૂપિયાનો ખર્ચ દર્શાવ્યો છે. બીસીસીઆઈએ નાણાકીય વર્ષ 2018માં રૂ. 2917 કરોડની આવક દર્શાવી હતી, જે નાણાકીય વર્ષ 2022માં વધીને રૂ. 7606 કરોડ થઈ હતી. તેની પાછળનું મુખ્ય કારણ IPL અને ભારતીય ક્રિકેટના મીડિયા અધિકારોની કિંમતમાં વધારો છે.

નાણાકીય વર્ષ 2024માં BCCIની કમાણી વધુ થશે:
નાણાકીય વર્ષ 2024માં બીસીસીઆઈની કમાણી વધી જશે કારણ કે તેણે ડિઝની સ્ટાર અને વાયાકોમ 18 સાથે પાંચ વર્ષ માટે રૂ. 48,390 કરોડનો સોદો કર્યો છે. તે જ સમયે, તેણે એડિડાસ અને ડ્રીમ11 જેવા નવા પ્રાયોજકો પણ પ્રાપ્ત કર્યા છે. પાંચ વર્ષ માટે આઈપીએલના મીડિયા અધિકારો ઉપરાંત અન્ય કેટલાક સોદા પણ છે. 2017 માં, BCCI એ ઇન્ડિયન પ્રીમિયર લીગના મીડિયા અધિકારો સ્ટાર ઇન્ડિયાને, જે હવે ડિઝની સ્ટાર તરીકે ઓળખાય છે, રૂ. 16,147 કરોડમાં વેચ્યા હતા. આ રકમ બમણી કરતાં પણ વધુ થઈ ગઈ છે કારણ કે 2008 થી 2017 સુધીના 10 વર્ષ દરમિયાન, સમાન આઈપીએલ અધિકાર સોની પિક્ચર્સ નેટવર્ક્સને રૂ. 8200 કરોડમાં વેચવામાં આવ્યા હતા.