એમેઝોન પર્યાવરણ સંતુલન માટે મહત્વનું હોવાથી તેને પૃથ્વીના ફેફસા ગણવામાં આવે છે
અંદાજે 40 હજાર જાતના કુલ 390 બિલિયન વૃક્ષો, 25 લાખથી વધુ પ્રકારના કિટકો જોવા મળે છે
- Advertisement -
ખાસ-ખબર સંવાદદાતા
વિશ્ર્વનો સૌથી વિશાળ રેન ફોરેસ્ટ વિસ્તાર એમેઝોન અનેક અજાયબીઓ માટે જાણીતો છે. દક્ષિણ અમેરિકાના એમેઝોન બેસિનમાં એમેઝોનિયા તરીકે પણ ઓળખાતું આ જંગલ પૃથ્વીને 17 ટકા જેટલો ઓકિસજન પૂરો પાડે છે. એમેઝોન પર્યાવરણ સમતુલન માટે મહત્વનું હોવાથી તેને પૃથ્વીના ફેફસા ગણવામાં આવે છે. એમેઝોન જંગલ દક્ષિણ અમેરિકાનો 40 ટકા જેટલો ભાગ રોકે છે. આ વિશાળ રેન ફોરેસ્ટની સરહદો 9 દેશોને સાંકળે છે. જેમાં બ્રાઝિલ,પેરુ, કોલંબિયા, વેનેઝુએલા, ઇકવાડોર, બોલીવિયા,ગુયાના, સૂરીનામ, ફેંચ ગુયાના વગેરે દેશોનો સમાવેશ થાય છે. જેમાંથી એમેઝોન વનનો 60 ટકા જેટલો વિસ્તાર બ્રાઝિલમાં આવેલો છે.
વિશ્ર્વના કુલ રેન ફોરેસ્ટના 50 ટકા વિસ્તારમાં અસંખ્ય જીવ જંતુઓ, પ્રાણીઓ અને વનસ્પતિઓ પર સંશોધન થયા છે. એમેઝોન પર હોલીવૂડમાં અનેક ફિલ્મો બની છે તેમાં તેનો એક ચોકકસ ભાગ જ દર્શાવવામાં આવે છે, બાકી વિશાળ રહસ્યમયી આ જંગલના કેટલાક સ્થળે તો સૂર્યના કિરણો જમીન સુધી પણ પહોંચતા નથી. 70 લાખ વર્ગ કિમીથી પણ વઘુ વિસ્તારમાં ફેલાયેલા જંગલમાં પહોળા પાન ધરાવતી વનસ્પતિઓ અને ભેજવાળું વાતાવરણ રહે છે.એમેઝોન જંગલનું અસ્તિત્વ 5.5 કરોડ વર્ષ જેટલું જુનું હોવાનું માનવામાં આવે છે.
વિશ્ર્વની 10 ટકા જેટલી પ્રાણીઓની પ્રજાતિઓ અને 2000થી વધુ પક્ષી પ્રજાતિઓ જોવા મળે છે. આ ફોરેસ્ટમાં અંદાજે 40 હજાર જાતના કુલ 390 બિલિયન વૃક્ષો અને 25 લાખથી વધુ પ્રકારના કિટકો જોવા મળે છે. એમેઝોન નદીની આસપાસ ફેલાયેલું વર્ષાવન પૃથ્વી પરનો સૌથી મોટો કુદરતી ખજાનો ગણાય છે. દુનિયામાં નદીઓ દ્વારા સમુદ્રમાં મીઠું પાણી જાય છે તેનો 20 ટકા હિસ્સો એમેઝોન નદીનો છે. એમેઝોનની સહાયક નદીઓની સંખ્યા 1100 છે. જેમાંથી 12 નદીઓની લંબાઇ 1500 કિમી કરતા પણ વધારે છે. જયારે એમેઝોન જંગલ પૃથ્વી પરથી ગાયબ થશે ત્યારે પૃથ્વીનો વિનાશ થશે. જેમ માણસ શ્ર્વાસ લીધા વિના જીવી ના શકે તેવી રીતે પૃથ્વીવાસીઓનું જીવન એમેઝોનનું ઓશિયાળું છે.
