શક્તિ સ્વરૂપા બાળાઓએ હાથમાં મશાલ લઇ સળગતી ઈંઢોણી સાથે રાસ લીધો

રાજકોટની પરંપરાગત ગરબીઓમાં ભક્તિની શક્તિનો સમન્વય

મવડી ચોકડીએ યોજાતી શ્રી બજરંગ ગરબી મંડળનો પ્રસિદ્ધ ઈંઢોણી રાસ

રાજકોટની વર્ષો જૂની પરંપરાગત ગરબીમાં આજે પણ ભક્તિ સાથે શક્તિનો સમન્વય સર્જાય છે. મા દુર્ગાના સ્વરૂપ સમાન છ બાળાઓએ હાથમાં મશાલ, માથે સળગતી ઈંઢોણીનો રાસ લઈ સૌને મંત્રમુગ્ધ કરી લીધા હતા. સળગતી ઈંઢોણી, કપાળે પરસેવો, પગમાં જોમ અને હૈયામાં માતાની ભક્તિ. આ છે રાજકોટની મવડી ચોકડીએ યોજાતી શ્રી બજરંગ ગરબી મંડળનો પ્રસિદ્ધ ઈંઢોણી રાસ. આયોજક યુવરાજસિંહ ઝાલા કહે છે કે લગભગ 15થી 20 મિનિટમાં રજૂ થતો આ રાસ તૈયાર કરવામાં દોઢ મહિનાની આકરી મહેનત લાગે છે.

પરંપરાગત ગરબીઓમાં આપણી સંસ્કૃતિની વિરાસત સચવાઈ: આયોજક યુવરાજસિંહ ઝાલા
મશાલ અને બધેનું કાપડ વિંટતા જ દોઢ દિવસ જેટલો સમય લાગે છે. આયોજક યુવરાજસિંહ ઝાલા સહિત કુલ પાંચ વ્યક્તિઓ 15 વર્ષથી નાની ઉંમરની બાળાઓ દાઝે નહીં કે એમને કંઈ તકલીફ ન પડે એ માટેની જહેમત ઉઠાવીને આ રાસ તૈયાર કરાવે છે. અર્વાચીન રાસોત્સવોના યુગમાં રાજકોટ શહેરમાં પરંપરા અને પ્રગતિનો એક અનોખો સમન્વય રચાય છે. આ શહેરની પરંપરાગત ગરબીઓમાં આપણી સંસ્કૃતિની વિરાસત સચવાયેલી છે.