પોરબંદરના માંડવા ગામે મંજૂરી વિના રાજકીય સભા યોજાઈ : મહિલા સરપંચના પુત્ર સામે ગુનો નોંધાયો

આમ આદમી પાર્ટીની સભા માટે કોઈ સત્તાવાર મંજૂરી લેવામાં ન આવતા પોલીસ જાતે ફરિયાદી બની કાર્યવાહી હાથ ધરી
ખાસ-ખબર ન્યૂઝ પોરબંદર

પોરબંદર નજીકના માંડવા ગામે આમ આદમી પાર્ટી દ્વારા મંજૂરી વિના રાજકીય સભાનું આયોજન કરાયા બાદ પોલીસએ કાર્યવાહી હાથ ધરી છે. કુતિયાણા પોલીસ મથકે આ મામલે મહિલા સરપંચના પુત્ર વેજાભાઈ મારખી વરુ સામે જાહેરનામાંના ભંગનો ગુનો નોંધ્યો છે.

કુતિયાણા પોલીસ મથકમાં ફરજ બજાવતા હેડ કોન્સ્ટેબલ અશોક જાડેજા દ્વારા દાખલ થયેલી ફરિયાદ મુજબ, તા. 12 ઓક્ટોબર 2025 ના રોજ સાંજે લગભગ 6 વાગ્યે માંડવા ગામના રામ મંદિર ચોક ખાતે આમ આદમી પાર્ટી દ્વારા મંજૂરી વગર સભાનું આયોજન થયું હતું.
આ સભામાં પક્ષના કાર્યકરો, આગેવાનો તથા આશરે 100 જેટલા ગ્રામજનો હાજર રહ્યા હતા. જાગૃત નાગરિક દ્વારા આ સભાના ફોટા અને વિડિયો પુરાવા સાથે પોલીસને જાણ કરવામાં આવતાં પોલીસએ તપાસ હાથ ધરી હતી.

પ્રાથમિક પૂછપરછ દરમિયાન મહિલા સરપંચ રૂપીબેન મારખી વરુના પુત્ર વેજાભાઈએ સ્વીકાર્યું હતું કે તેમણે આ સભાનું આયોજન કર્યું હતું. પોલીસ દ્વારા તેમને કોઈ સક્ષમ અધિકારી પાસેથી મંજૂરી લીધી હોય તે અંગે પુરાવા રજૂ કરવા જણાવાયું હતું, પરંતુ તેઓ કોઈ પણ પ્રકારની મંજૂરી રજૂ ન કરી શક્યા. આથી પોલીસએ જાહેર સભા યોજવા માટેની મંજૂરી વિના કાર્યક્રમ યોજવાના આરોપે વેજાભાઈ મારખી વરુ સામે ગુનો નોંધ્યો છે. કુતિયાણા પોલીસે ધોરણસર અટક કરી આગળની કાર્યવાહી હાથ ધરી છે.