રણજી ટ્રોફી: 14 વર્ષીય વૈભવ સૂર્યવંશી બિહાર ટીમના વાઇસ કેપ્ટન તરીકે નિયુક્ત

વૈભવ સૂર્યવંશીને 15 ઓક્ટોબરથી શરૂ થનારી રણજી ટ્રોફી 2025-26 સિઝન માટે બિહાર ટીમનો વાઈસ કેપ્ટન બનાવવામાં આવ્યો છે. ટીમની કેપ્ટનશીપ બેટ્સમેન સકીબુલ ગની કરશે. આવતા વર્ષની શરૂઆતમાં અંડર-19 વર્લ્ડ કપ યોજાવાનો છે. આવી સ્થિતિમાં વૈભવ માટે આખી સીઝન રમવું મુશ્કેલ છે.

બિહાર ક્રિકેટ એસોસિએશને રણજી ટ્રોફી 2025-26ના પ્રથમ બે રાઉન્ડ માટે ટીમ જાહેર કરી છે. બિહાર 15 ઓક્ટોબરે પોતાની પ્રથમ મેચમાં અરુણાચલ પ્રદેશ સાથે ટકરાશે. ત્યારબાદ 25 ઓક્ટોબરે તેનો સામનો મણિપુર સાથે થશે.

ઈંગ્લેન્ડ અને ઑસ્ટ્રેલિયામાં સદી ફટકારી હતી

14 વર્ષીય વૈભવે ભારતીય અંડર-19 ટીમ માટે રમતી વખતે ઈંગ્લેન્ડ અને ઑસ્ટ્રેલિયામાં સદી ફટકારી છે. વૈભવે તાજેતરમાં જ ઑસ્ટ્રેલિયા પ્રવાસ પર ઈન્ડિયા અંડર-19 ટીમ માટે રમતા બ્રિસ્બેનમાં રમાયેલી પ્રથમ યૂથ ટેસ્ટમાં 78 બોલમાં સદી ફટકારી હતી. ઑસ્ટ્રેલિયામાં યોજાયેલી મલ્ટી-ડે સીરીઝમાં તે બીજા ક્રમે સૌથી વધુ રન બનાવનાર બેટ્સમેન રહ્યો હતો. તેણે ત્રણ ઈનિંગ્સમાં કુલ 133 રન બનાવ્યા હતા. ભારતે આ સીરીઝ 2-0થી જીતી હતી.

તેણે ઓસ્ટ્રેલિયા સામે યૂથ વન-ડેમાં ત્રણ મેચોમાં 124 રન બનાવ્યા હતા, જેમાં 68 બોલમાં 70 રન સામેલ છે. તે પહેલા તેણે ઈંગ્લેન્ડ સામેની પાંચ યૂથ વન-ડેમાં 174.02ના સ્ટ્રાઈક રેટથી 355 રન બનાવ્યા હતા.

ડાબોડી બેટ્સમેન વૈભવ ઈન્ડિયન પ્રીમિયર લીગ (IPL) ના ઈતિહાસમાં સદી ફટકારનાર સૌથી યુવા ખેલાડી છે. 14 વર્ષની ઉંમરે સૂર્યવંશીએ IPL 2025માં ગુજરાત ટાઈટન્સ સામે 35 બોલમાં સદી ફટકારી હતી.

બિહાર ક્રિકેટ એસોસિએશન પાસે સિલેક્શન પેનલ નથી

બિહાર ક્રિકેટ એસોસિએશન (BCA) પાસે રણજી ટ્રોફી માટે ટીમ પસંદ કરવા માટે સિલેક્ટર્સ નહોતા. જોકે, BCCI ના આદેશ બાદ એસોસિએશને બે સભ્યોની પેનલ બનાવીને ટીમનું એલાન કર્યું. BCCI એ BCAને શક્ય તેટલી વહેલી તકે પાંચ સભ્યોની સિલેક્શન પેનલની નિમણૂક કરવાનો નિર્દેશ આપ્યો છે.

બિહારની રણજી ટીમ

સકીબુલ ગની (કેપ્ટન), વૈભવ સૂર્યવંશી (વાઈસ-કેપ્ટન), પીયૂષ કુમાર સિંહ, ભાસ્કર દૂબે, અર્ણવ કિશોર, આયુષ લોહારુકા, બિપિન સૌરભ, અમોદ યાદવ, નવાઝ ખાન, સાકિબ હુસૈન, રાઘવેન્દ્ર પ્રતાપ સિંહ, સચિન કુમાર સિંહ, હિમાંશુ સિંહ, ખાલિદ આલમ અને સચિન કુમાર.