ભારત સાથે તણાવ વચ્ચે આજે ચીનના પ્રવાસે માલદીવના રાષ્ટ્રપતિ: શી જિનપિંગે આપ્યું હતું આમંત્રણ

માલદીવના રાષ્ટ્રપતિ મોહમ્મદ મુઈઝુ જેઓ ભારત વિરુદ્ધ પોતાની અપમાનજનક ટિપ્પણીઓને કારણે ચારેબાજુ ટીકાઓનો સામનો કરી રહ્યા છે તેઓ રવિવારે રાત્રે ચીન જવા રવાના થયા

હાલ આપણાં દેશમાં માલદીવનો મુદ્દો ખૂબ જ ચર્ચામાં છે. આ દરમિયાન એક મોટા સમાચાર સામે આવ્યા છે કે, માલદીવના રાષ્ટ્રપતિ મોહમ્મદ મુઈઝુ જેઓ ભારત વિરુદ્ધ પોતાની અપમાનજનક ટિપ્પણીઓને કારણે ચારેબાજુ ટીકાઓનો સામનો કરી રહ્યા છે તેઓ રવિવારે રાત્રે ચીન જવા રવાના થયા છે. આ મુલાકાત દરમિયાન મુઈઝુ ચીનના રાષ્ટ્રપતિ શી જિનપિંગને પણ મળશે. બંને નેતાઓ તેમના દેશો વચ્ચેના દ્વિપક્ષીય સંબંધોને વધુ મજબૂત કરવા પર ચર્ચા કરશે. તમને જણાવી દઈએ કે, માલદીવના રાષ્ટ્રપતિ મુઈઝુને ચીનની ખૂબ નજીક માનવામાં આવે છે. તાજેતરમાં યોજાયેલી રાષ્ટ્રપતિની ચૂંટણીમાં તેમને ચીનનું સમર્થન હતું.

શી જિનપિંગ સાથે કરશે મુલાકાત
માલદીવના રાષ્ટ્રપતિ મોહમ્મદ મુઈઝુના કાર્યાલય દ્વારા આપવામાં આવેલી માહિતી અનુસાર મુઈઝુ અને ફર્સ્ટ લેડી સાજીદા મોહમ્મદ રવિવારે રાત્રે ચીનની સરકારી મુલાકાતે રવાના થયા હતા. ચીનના રાષ્ટ્રપતિ શી જિનપિંગના આમંત્રણ બાદ આ મુલાકાત થઈ રહી છે. આ મુલાકાતમાં રાષ્ટ્રપતિ અને પ્રથમ મહિલા સાથે એક ઉચ્ચ સ્તરીય પ્રતિનિધિમંડળ પણ આવ્યું છે. તમને જણાવી દઈએ કે, આ મુલાકાત એવા સમયે થઈ રહી છે જ્યારે રાષ્ટ્રપતિ મુઈઝુની સરકારના મંત્રીઓની ટિપ્પણીઓને કારણે ભારત અને માલદીવ વચ્ચે તણાવ ચરમસીમા પર છે.

વિગતો મુજબ શી જિનપિંગ અને મુજીજુ દેશો વચ્ચેના દ્વિપક્ષીય સંબંધોને વધુ મજબૂત કરવા પર ચર્ચા કરશે. બંને નેતાઓ ઘણા કરારો પર હસ્તાક્ષર પણ કરશે. એક વરિષ્ઠ અધિકારીએ આ માહિતી આપી હતી. ચીનના વિદેશ મંત્રાલયના પ્રવક્તા વાંગ વેનબિને જણાવ્યું હતું કે, રાષ્ટ્રપતિ શી જિનપિંગ 8-12 જાન્યુઆરી સુધી રાજ્યની મુલાકાતે આવેલા મુઇઝુને આવકારવા માટે ભોજન સમારંભનું આયોજન કરશે. બંને દેશોના વડાઓ વાતચીત કરશે અને સહકાર દસ્તાવેજો પર હસ્તાક્ષર સમારોહમાં ભાગ લેશે.

ભારત-માલદીવના સંબંધોના ખટાશ
માલદીવમાં મોહમ્મદ મુઈઝુ રાષ્ટ્રપતિ બન્યા ત્યારથી બંને દેશો વચ્ચેના સંબંધો તંગ બની ગયા છે. મુઈઝુને ચીનના સમર્થક માનવામાં આવે છે. લગભગ 2 મહિના પહેલા માલદીવના રાષ્ટ્રપતિ બન્યા બાદ મુઈઝુએ ભારતીય સેનાને પોતાના દેશમાંથી હટાવવાનો પહેલો નિર્ણય લીધો હતો. તેઓ વારંવાર ભારત વિરોધી નિવેદનો આપવા માટે જાણીતા છે. મુઈઝુએ માલદીવ સરકારની પરંપરા તોડીને અને બે મુસ્લિમ દેશોની મુલાકાત લેવાનો નિર્ણય કરીને ભારત સાથેના સંબંધો વધુ બગડ્યા. મુસ્લિમ દેશ તુર્કીયેની પ્રથમ મુલાકાત લીધા બાદ મુઈઝુએ હવે ભારતને બાયપાસ કરીને 8 જાન્યુઆરીથી ચીનની મુલાકાત લેવાનું પ્રાથમિકતા આપી છે.