ભારતમાં નવેમ્બરથી ડિસેમ્બર સુધીમાં 35 લાખ લગ્ન થશે

4.25 લાખ કરોડનો ખર્ચ થવાનો અંદાજ, 2023માં સમાન સમયગાળામાં 32 લાખ લગ્ન થયા

ખાસ-ખબર ન્યૂઝ નવી દિલ્હી, તા.19
એવો અંદાજ છે કે નવેમ્બરથી ડિસેમ્બરના મધ્યમાં ભારતમાં 35 લાખ લગ્નો પર 4.25 લાખ કરોડ રૂપિયાનો ખર્ચ થશે. પીએલ કેપિટલ-પ્રભુદાસ લીલાધરના અહેવાલમાં આ માહિતી આપવામાં આવી છે. એવું કહેવામાં આવ્યું છે કે 2023 માં સમાન સમયગાળા દરમિયાન 32 લાખ લગ્નો થયા હતા. ‘બેન્ડ બાજા બારાત અને બજારો’ શીર્ષકવાળા અહેવાલમાં જણાવાયું છે કે જુલાઈના બજેટમાં સોનાની આયાત ડ્યૂટીમાં ઘટાડો તહેવારો અને લગ્નની સિઝનમાં મોટા ખર્ચને પ્રોત્સાહન આપશે. તાજેતરમાં સોનાની આયાત ડ્યુટી 15% થી ઘટાડીને 6% કરવામાં આવતા સમગ્ર દેશમાં સોનાની ખરીદીમાં વૃદ્ધિ થવાની ધારણા છે. ખાસ કરીને આગામી તહેવારો અને લગ્નની સિઝન દરમિયાન સોનાની ખરીદીમાં ભારે વૃદ્ધિ જોવા મળી શકે છે. અહેવાલમાં જણાવાયું છે કે સોનાના સાંસ્કૃતિક અને ધાર્મિક મહત્વ અને મૂલ્યવાન રોકાણ તરીકે તેની સ્થિતિને જોતાં, આ અછતથી માંગમાં વધારો થવાની ધારણા છે.

ભારતમાં 15 જાન્યુઆરીથી 15 જુલાઈ વચ્ચે 42 લાખથી વધુ લગ્નો થયા કોન્ફેડરેશન ઓફ ઓલ ઈન્ડિયા ટ્રેડર્સ (CAIT)ના એક સરવેને ટાંકીને રિપોર્ટમાં કહેવામાં આવ્યું છે કે 15 જાન્યુઆરીથી 15 જુલાઈની વચ્ચે ભારતમાં 42 લાખથી વધુ લગ્નો થયા, જેના પર અંદાજે 5.5 લાખ કરોડ રૂપિયાનો ખર્ચ થયો. તહેવાર અને લગ્નની સિઝનમાં પણ શેરબજારમાં ઉછાળો જોવા મળે તહેવાર અને લગ્નની સિઝનમાં પણ ભારતીય શેરબજારમાં ઉછાળો જોવા મળે છે, જેનું મુખ્ય કારણ ગ્રાહકોના ખર્ચમાં વૃદ્ધિ છે. રિટેલ, હોસ્પિટાલિટી, જ્વેલરી અને ઓટોમોબાઈલ જેવા ક્ષેત્રોને આ વધેલી માગથી ઘણો ફાયદો થાય છે. લગ્ન-તહેવારોની સિઝનમાં એરલાઇન-હોટલ બુકિંગ પર વધુ ખર્ચ કરવામાં આવે છે ભારતમાં, લગ્ન અને તહેવારોની સિઝનમાં એરલાઇન અને હોટેલ બુકિંગ જેવી પ્રીમિયમ વસ્તુઓ અને સેવાઓ પર વધુ નાણાં ખર્ચવામાં આવે છે. આ વધેલી માગ કંપનીઓના નફાના માર્જિનમાં વધારો કરે છે, જે દેશના એકંદર આર્થિક વિકાસને ટેકો આપે છે.

25 મુખ્ય સ્થળોને લગ્નના સ્થળો તરીકે ઓળખવામાં આવશે અહેવાલમાં જણાવાયું છે કે ભારતમાં 25 મુખ્ય સ્થળોને લગ્નના સ્થળો તરીકે ઓળખવા અને આંતરરાષ્ટ્રીય લગ્નો માટે ભારતને ટોચની પસંદગી તરીકે પ્રમોટ કરવાની સરકારની યોજના દેશમાં ફોરેક્સ પ્રવાહમાં વૃદ્ધિ તરફ દોરી જશે. આ પહેલ દેશભરમાં લગભગ 25 મુખ્ય સ્થળોની ઓળખ કરીને શરૂ કરવામાં આવશે. જેમાં એ બતાવવામાં આવશે કે કેવી રીતે ભારત લગ્નની અનેક પસંદગીઓ પૂરી કરી શકે છે. મેક ઈન ઈન્ડિયા ઝુંબેશની સફળતાના આધારે, વ્યૂહરચનાનો હેતુ અંદાજે 12.1 બિલિયન (રૂ. 1 લાખ કરોડ)નો ઉપયોગ કરવાનો છે જે હાલમાં વિદેશમાં ડેસ્ટિનેશન વેડિંગ પર ખર્ચવામાં આવે છે.