33 વૈજ્ઞાનિકોને રાષ્ટ્રીય વિજ્ઞાન પુરસ્કાર એનાયત

બાયોકેમિસ્ટ ગોવિંદરાજન પદ્મનાભનને વિજ્ઞાન રત્ન, ઈસરો ચંદ્રયાન ટીમને વિજ્ઞાન ટીમ એવોર્ડ મળ્યો

ખાસ-ખબર ન્યૂઝ નવી દિલ્હી, તા.23

રાષ્ટ્રપતિ દ્રૌપદી મુર્મુએ આજે 22 ઓગસ્ટે 33 લોકોને રાષ્ટ્રીય વિજ્ઞાન પુરસ્કારથી સન્માનિત કર્યા. આ સમારોહ રાષ્ટ્રપતિ ભવનમાં યોજાયો હતો. બાયોકેમિસ્ટ ગોવિંદરાજન પદ્મનાભનને વિજ્ઞાનના ક્ષેત્રમાં તેમના યોગદાન બદલ વિજ્ઞાન રત્ન એવોર્ડ આપવામાં આવ્યો હતો. આ સિવાય ઈસરોની ચંદ્રયાન ટીમને વિજ્ઞાન ટીમ એવોર્ડ એનાયત કરવામાં આવ્યો હતો.33 એવોર્ડ વિજેતાઓની યાદીમાં 18 યુવા વૈજ્ઞાનિકો માટે ’વિજ્ઞાન યુવા શાંતિ સ્વરૂપ ભટનાગર’ એવોર્ડ અને13 ’વિજ્ઞાન શ્રી’ એવોર્ડનો સમાવેશ થાય છે.વિજ્ઞાન અને ટેકનોલોજી ક્ષેત્રે આજીવન સિદ્ધિઓ અને યોગદાનને માન્યતા આપવા માટે ’વિજ્ઞાન રત્ન’ આપવામાં આવે છે, જ્યારે ’વિજ્ઞાન શ્રી’ વિશિષ્ટ યોગદાનને માન્યતા આપવા માટે આપવામાં આવે છે.

સરકારે પદ્મ પુરસ્કારની જેમ દેશના તમામ વિજ્ઞાન એવોર્ડની શરૂઆત કરતા જાન્યુઆરીમાં નેશનલ સાયન્સ એવોર્ડની શરૂઆત કરી હતી, જ્યાં એવોર્ડ વિજેતાઓને મેડલ અને પ્રશસ્તિપત્ર આપવામાં આવશે. અગાઉના વિજ્ઞાન એવોર્ડથી અલગ નેશનલ સાયન્સ એવોર્ડમાં રોકડ રકમ હોતી નથી.વિજ્ઞાન શ્રી પુરસ્કાર માટે પસંદ કરાયેલા લોકોમાં આનંદરામકૃષ્ણન સી, ઉમેશ વાશ્ર્નેય, ભીમ સિંહ, આદિમૂર્તિ આદી, સૈયદ વજીહ અહેમદ નકવી, સંજય બિહારી અને રાહુલ મુખર્જીનો સમાવેશ થાય છે.વિજ્ઞાન યુવા પુરસ્કાર માટે નોંધાયેલ એવોર્ડ વિજેતાઓમાં ડો. બપ્પી પોલ, ડો. અભિલાષ, રાધાકૃષ્ણન મહાલક્ષ્મી, પુરબી સૈકિયા, દિગેન્દ્રનાથ સ્વેન, પ્રભુ રાજગોપાલ અને પ્રશાંત કુમારનો સમાવેશ થાય છે.