ખાસ-ખબર ન્યૂઝ ઈન્ડોનેશિયા
ઈન્ડોનેશિયાની મુલાકાતે આવેલા પોપ ફ્રાન્સિસે કહ્યું કે અહીંના દરેક ઘરમાં 3 થી 5 બાળકો છે. દરેક દેશ માટે આ ઉદાહરણ છે. ખાસ કરીને એવા લોકો માટે કે જેઓ કૂતરા અને બિલાડીઓને પાળવાનું વધુ સારું માને છે. ઈન્ડોનેશિયાએ આ પરંપરા જાળવી રાખવી જોઈએ. પોપના આ નિવેદન પર ઈન્ડોનેશિયાના રાષ્ટ્રપતિ જોકો વિડોડો હસી પડ્યા હતા. આ પહેલા મે મહિનામાં પણ ઈટાલીની રાજધાની રોમમાં એક કોન્ફરન્સ દરમિયાન પોપે કહ્યું હતું કે આજકાલ ઘરો ઉદાસીભર્યા બની રહ્યા છે. આ એટલા માટે છે કારણ કે તેઓ સામાનોથી ભરેલા છે પરંતુ અહીં કોઈ હસતા-રમતા બાળકો નથી. જો કે, આ ઘરોમાં નાના કૂતરા અને બિલાડીઓની કોઈ કમી નથી.અગાઉ 2022માં પણ પોપે બાળકોની જગ્યાએ પાલતુ પ્રાણીઓને પ્રાધાન્ય આપતા લોકો પર નારાજગી વ્યક્ત કરી હતી. તેમણે કહ્યું હતું કે આવા યુગલો સ્વાર્થી છે અને માનવ સંસ્કૃતિ માટે ખતરો છે. પોપે કહ્યું હતું કે, “પાલતુ પ્રાણીઓને દત્તક લઈને, લોકો તેમની સાથે ભાવનાત્મક બંધન કેળવે છે પરંતુ માતાપિતા અને બાળક વચ્ચેના જટિલ સંબંધોને ક્યારેય અનુભવી શકતા નથી.” પોપે કહ્યું હતું કે જ્યારે બાળકો નથી તો વૃદ્ધ લોકોને પેન્શન આપવા માટે ટેક્સ કોણ ભરશે? વૃદ્ધ લોકોની સંભાળ કોણ લેશે? બાળકો વિનાના લોકોની વૃદ્ધાવસ્થા ખરાબ જશે. ઈન્ડોનેશિયામાં પોપ ફ્રાન્સિસના નિવેદન બાદ સોશિયલ મીડિયા પર તેમની મજાક ઉડાવવામાં આવી રહી છે.
એક યુઝરે લખ્યું, “કેટલાક લોકો માનવ સભ્યતા પર ધ્યાન કેન્દ્રિત કરવાને બદલે પોતાના ખિસ્સાને મહત્વ આપી રહ્યા છે. છેવટે, જ્યારે કૂતરા મોટા થાય છે, ત્યારે તેની ટ્યુશન ફીના પૈસા આપવા પડતા નથી.” અન્ય એક યુઝરે લખ્યું છે કે ઇન્ડોનેશિયાનું ભવિષ્ય પોપની અપેક્ષાઓ કરતા વધારે જોખમમાં છે, કારણ કે અહીં જન્મ દર સતત ઘટી રહ્યો છે. થોડા વર્ષો પછી ઇન્ડોનેશિયા જાપાન જેવું બની જશે. 2022 ના ડેટા અનુસાર ઇન્ડોનેશિયાની કુલ વસ્તી 27.55 કરોડ છે. અહીં દરેક મહિલા સરેરાશ 2 બાળકોને જન્મ આપે છે. જો કે, વિશ્ર્વ બેંકના ડેટા અનુસાર, ઇન્ડોનેશિયાનો જન્મ દર 1960થી અડધો થઈ ગયો છે.
