બાંધકામ ઓછું બતાવી દસ્તાવેજ નોંધણી કરાવતી ચતુરાઈ પકડાઈ, સરકારી ખજાનાને નુકસાન પહોંચાડવાના પ્રયાસ સામે તંત્ર સજાગ
ખાસ-ખબર ન્યૂઝ રાજકોટ
- Advertisement -
રાજકોટ શહેર અને જિલ્લામા સ્ટેમ્પ ડ્યૂટી ચોરી સામે કડક પગલાં તરીકે અભિયાન હાથ ધરાયું છે. ગુરુવારે સ્ટેમ્પ ડ્યૂટી વિભાગ દ્વારા 18 આસામીઓ સામે ચોરીના કેસ પકડી લેવામાં આવ્યા છે. તદ્દન ચતુરાઈથી બાંધકામ ઓછું બતાવી દસ્તાવેજ નોંધણી કરાવનારાઓ સામે કુલ રૂ. 1.07 કરોડનો દંડ ફટકારવામાં આવ્યો છે. સ્ટેમ્પ ડ્યૂટી વિભાગના નાયબ કલેક્ટરે જણાવ્યું હતું કે, “આ તમામ કેસ ઓડિટ દરમિયાન ઝડપાયા હતા. સ્થળ પર તપાસ કરાતા બાંધકામ વિસ્તાર અને નોંધાયેલા દસ્તાવેજ વચ્ચે ભિન્નતા જોવા મળી હતી. આવી રીતે સ્ટેમ્પ ડ્યૂટીની ચોરી સ્પષ્ટ રીતે સાબિત થઈ.” તંત્રએ પ્રથમ તબક્કે તમામ શંકાસ્પદ લોકોને નોટિસ આપી હતી અને ખુલાસો કરવા સૂચના આપી હતી. જોકે સંતોષકારક જવાબ નહીં આપતા, ચોરી સામે સીધી કાર્યવાહી શરૂ કરાઈ છે. દરેક કેસમાં અલગ રીતો અપનાવી સ્ટેમ્પ ડ્યૂટી ટાળી દેવાઈ હતી – જેમ કે બિલ્ટઅપના બદલે કાર્પેટ વિસ્તાર દર્શાવવો, ખોટી જંત્રી દર્શાવવી વગેરે. નાયબ કલેક્ટરએ ઉમેર્યું કે, ગુજરાત સ્ટેમ્પ અધિનિયમ 1958ની કલમ 39(1, ખ, 2) અનુસાર જો 90 દિવસમાં બાકી સ્ટેમ્પ ડ્યૂટી નહીં ભરવામાં આવે તો 12% વ્યાજ સાથે રકમ વસૂલ થશે. દંડ ઉપરાંત વ્યાજની પણ ભરપાઈ ફરજિયાત રહેશે.
વિભાગે ખાસ ધ્યાન દોર્યું છે કે કેટલાક એડવોકેટ જમીન કે મકાન ખરીદનારને ઓછા ખર્ચ માટે ખોટી સલાહ આપે છે, જેનો તંત્રની ઓડિટમાં પર્દાફાશ થાય છે. વાસ્તવિક રીતે, દસ્તાવેજોની નિયમિત ચકાસણી, સિસ્ટમમાં ડેટા મેચિંગ, અને જંત્રી દરના આધારે અનુસંધાન રાખવામાં આવે છે.
એક મામલામાં એક વ્યક્તિએ ખોટી જંત્રી બતાવી બેંકમાંથી કરોડોની લોન પણ મેળવી હતી, જે અન્ય પ્રકારની ફાળવણી અને કાયદાકીય કાર્યવાહી માટે પાત્ર બને છે. સરકાર દ્વારા દરેક વિસ્તાર માટે નક્કી કરાયેલા જંત્રી દર હોવા છતાં અમુક તત્વોએ તેમાં છટકબારી શોધીને ઓછી ડ્યૂટી ભરવાનો પ્રયાસ કર્યો હતો, જેને હવે પગારવાની વેળા આવી છે.
