મોરબીના યંગ ઇન્ડિયા ગ્રૂપ દ્વારા શ્રાવણ માસમાં અનોખું સેવાકાર્ય

ખાસ-ખબર ન્યૂઝ મોરબી, તા.5
મોરબીના યંગ ઇન્ડિયા ગ્રૂપ દ્વારા દરેક તહેવાર અને જન્મદિવસને સેવાકાર્યમાં પરિવર્તિત કરવાની પ્રણાલી જાળવી રાખતા, શ્રાવણ માસના બીજા સોમવારે પણ એક પ્રેરણાત્મક કાર્યક્રમનું આયોજન કરવામાં આવ્યું. આ કાર્યક્રમનો મુખ્ય હેતુ શ્રદ્ધા સાથે સેવાનો ઉત્તમ સંદેશ આપવાનો હતો.
આ દિવસે, ગ્રૂપ દ્વારા શહેરના ઝૂંપડપટ્ટી વિસ્તારમાં રહેતા આશરે 2,000 થી વધુ બાળકો અને જરૂરિયાતમંદોને પૌષ્ટિક ભોજન પીરસવામાં આવ્યું. તેમને દૂધપાક અને પૂરી-ભાજી ખવડાવીને તૃપ્ત કરવામાં આવ્યા. આ સેવાકાર્ય પાછળનો હેતુ પ્રથમ જીવ રાજી, પછી જ શિવ રાજીની ભાવનાથી પ્રેરિત હતો.
યંગ ઇન્ડિયા ગ્રૂપના સ્થાપક અને મેન્ટોર ડો. દેવેનભાઈ રબારીએ આ પ્રસંગે જણાવ્યું કે, તેમનું કાર્ય દૂધને શિવલિંગ પર ચઢાવવાને બદલે ભૂખ્યા બાળકોને ખવડાવવાનું છે. તેમણે કહ્યું કે, “જ્યારે ભગવાન શિવને પ્રસન્ન કરવા માટે દૂધ અર્પણ કરીએ છીએ, ત્યારે એ જ દૂધ જો પીડાતા જીવ માટે આશીર્વાદરૂપ બને તો તે સાચી પૂજા ગણાય.” તેઓ માને છે કે ભગવાનને ખુશ કરવા માટે પહેલા ભૂખ્યા જીવને તૃપ્ત કરવા જરૂરી છે, અને ત્યારબાદ શિવ આપમેળે રાજી થશે.
યંગ ઇન્ડિયા ગ્રૂપ છેલ્લા 17 વર્ષથી શ્રાવણ માસના દરેક સોમવારે આવા સેવા અભિયાનો ચલાવે છે. આ કાર્યક્રમ દ્વારા તેમણે ફરી એકવાર સાબિત કર્યું છે કે શ્રદ્ધા અને સેવા જ્યારે સાથે ચાલે છે, ત્યારે સમાજમાં સકારાત્મક પરિવર્તન લાવી શકાય છે. આ ઉમદા કાર્ય સમાજ માટે એક જીવંત ઉદાહરણ બની રહ્યું છે.