હૈદરાબાદે લખનઉને Do-or-Die મેચમાં હરાવી પ્લ-ઑફ્ફમાંથી બહાર ફેંકી : પંત ફરી ફ્લોપ

લખનૌ પ્લે-ઑફ્ફની રેસમાંથી બહાર થનારી પાંચમી ટીમ બની, હૈદરાબાદે સિઝનની ચોથી જીત નોંધાવી

ખાસ-ખબર ન્યૂઝ નવી દિલ્હી, તા.31
સનરાઇઝર્સ હૈદરાબાદે લખનૌ સુપર જાયન્ટ્સને છ વિકેટે હરાવીને પ્લેઓફની રેસમાંથી બહાર ફેંકી દીધો. આ રીતે, ઋષભ પંતના નેતૃત્વ હેઠળની ટીમ પ્લેઓફની રેસમાંથી બહાર થનારી પાંચમી ટીમ બની.સોમવારે રમાયેલી મેચમાં ટોસ હારીને પ્રથમ બેટિંગ કરતા લખનૌએ 20 ઓવરમાં સાત વિકેટ ગુમાવીને 205 રન બનાવ્યા હતા. જવાબમાં, હૈદરાબાદે 18.2 ઓવરમાં ચાર વિકેટ ગુમાવીને 206 રન બનાવ્યા અને મેચ જીતી લીધી.તેમના તરફથી અભિષેક શર્માએ સૌથી વધુ 59 રન બનાવ્યા.

લખનૌ માટે દિગ્વેશ રાઠીએ બે વિકેટ લીધી. જ્યારે વિલિયમ ઓ’રોર્ક અને શાર્દુલ ઠાકુરે એક-એક વિકેટ લીધી.હૈદરાબાદ લક્ષ્યનો પીછો કરવા ઉતર્યું અને આ મેચમાં તેમની શરૂઆત આઘાતજનક રહી. અથર્વ તાઈડે 13 રન બનાવીને આઉટ થયો હતો. આ પછી, અભિષેક શર્માએ ઇશાન કિશન સાથે મળીને ઇનિંગ્સની કમાન સંભાળી.બંને વચ્ચે બીજી વિકેટ માટે 35 બોલમાં 82 રનની ભાગીદારી થઈ. અભિષેક 20 બોલમાં 59 રન બનાવીને આઉટ થયો. તેને શાર્દુલ ઠાકુરે દિગ્વેશ રાઠીની બોલ પર કેચ આઉટ કરાવ્યો હતો.
આ પછી ઇશાન કિશનને હેનરિક ક્લાસેનનો ટેકો મળ્યો. બંનેએ કેટલાક સારા શોટ રમ્યા અને 41 રન ઉમેર્યા. કિશન 28 બોલમાં 35 રન બનાવીને આઉટ થયો હતો જ્યારે ક્લાસેન 47 રન બનાવીને પેવેલિયન પાછો ફર્યો હતો.

આ દરમિયાન, કમિન્ડુ મેન્ડિસ 32 રન બનાવીને રિટાયર્ડ હર્ટ થયો. તે હેમસ્ટ્રિંગ સાથે સંઘર્ષ કરતો જોવા મળ્યો હતો. અનિકેત વર્મા અને નીતિશ કુમાર રેડ્ડી પાંચ-પાંચ રન બનાવી અણનમ રહ્યા.અગાઉ, મિશેલ માર્શ અને એડન માર્કરામે વિસ્ફોટક બેટિંગ કરીને લખનૌને શાનદાર શરૂઆત અપાવી હતી. બંને વચ્ચે પહેલી વિકેટ માટે 115 રનની ભાગીદારી થઈ હતી જેને હર્ષ દુબેએ તોડી હતી.તેણે માર્શને પોતાનો શિકાર બનાવ્યો, જે 39 બોલમાં 65 રન બનાવીને પેવેલિયન પાછો ફર્યો. આ દરમિયાન હર્ષલ પટેલે માર્કરમને બોલ્ડ કર્યો હતો. તે 38 બોલમાં 61 રન બનાવીને આઉટ થયો હતો.બંનેએ પોતાની કારકિર્દીની પાંચમી અડધી સદી ફટકારી. લખનૌ માટે નિકોલસ પૂરને 45 રન બનાવ્યા જ્યારે કેપ્ટન ઋષભ પંતનું બેટ ફરી એકવાર શાંત રહ્યું.
તેણે ફક્ત સાત રન બનાવ્યા. આયુષ બદોની ત્રણ, અબ્દુલ સમદ ત્રણ અને શાર્દુલ ઠાકુર ચાર રન બનાવીને આઉટ થયા હતા.
જ્યારે, આકાશ દીપ છ રન બનાવીને અણનમ રહ્યો અને રવિ બિશ્નોઈ ખાતું ખોલાવ્યા વિના અણનમ રહ્યો. હૈદરાબાદ તરફથી ઈશાન મલિંગાએ બે વિકેટ અને હર્ષ દુબે, હર્ષલ પટેલ અને નીતિશ કુમાર રેડ્ડીએ એક-એક વિકેટ લીધી.